AZƏRBAYCAN RESPUBLİKASININ PREZİDENTİ, YENİ AZƏRBAYCAN PARTİYASININ SƏDRİ CƏNAB HEYDƏR ƏLİYEVƏ
- Hörmətli cənab Prezident!
Azərbaycanda fəaliyyət göstərən 26 gənclər təşkilatından ibarət “Prezident seçkiləri - 2003” təbliğat qrupu yaradılmışdır. Bu qrupun yaradılmasında əsas məqsəd prezident seçkilərində fəal iştirak etmək, Azərbaycana rəhbərliyiniz dövründə gənclərə göstərdiyiniz diqqət və qayğını təbliğ etməkdir.
Xalqımızın azadlıq mübarizəsini boğmaq üçün Sovetlər Birliyinin başçısı Mixail Qorbaçova Azərbaycanın böyük oğlu Heydər Əliyevi vəzifədən uzaqlaşdırmaq, xüsusi xidmət orqanları tərəfindən nəzarətdə saxlamaq lazım idi. Ancaq türk-müsəlman dünyasının əvəzsiz lideri olan cənab Heydər Əliyev şəxsi həyatından belə qorxmadan 20 Yanvar hadisələrində geniş mətbuat qarşısına çıxaraq, bu faciəni törədən Sovetlər İttifaqının rəhbərliyini pisləmiş və bununla da İttifaqın artıq dağıldığını bəyan etmişdir. Azərbaycanda isə hakimiyyətdə olanlar öz kürsüləri barədə düşünür, qarşıdurma yaradır və xalqı vətəndaş müharibəsi təhlükəsi ilə üzbəüz qoymuşdular. Belə bir vaxtda xalqımızın təkidli xahişi ilə Azərbaycanda siyasi hakimiyyətə qayıtmağınızla dövlətçiliyimiz üçün təhlükə olan vətəndaş müharibəsinin, ictimai-siyasi sabitsizliyin, iqtisadi tənəzzülün, bir sözlə, Azərbaycan deyilən məmləkətin planlı şəkildə məhv edilməsinin qarşısını aldınız. Belə çətin bir vaxtda cəmiyyətin fəal təbəqəsi hesab olunan gəncləri diqqətdən kənarda qoymadınız. İkili standartlı dünya siyasəti ilə tənzimlənən Ermənistan-Azərbaycan müharibəsində atəşkəs rejimi yaratmaqla minlərlə gənci ölümdən sovuşdurdunuz.
Dövlət səviyyəsində gənclər siyasətini həyata keçirmək üçün Gənclər və İdman Nazirliyi yaratdınız. Ölkə gənclərinin problemlərini bilavasittə öyrənmək üçün Azərbaycan Gənclərinin 1-ci Forumunun keçirilməsi barədə Fərman imzaladınız. 1-ci Forum keçirilən gün - 2 fevral Azərbaycan gəncləri günü kimi qeyd olunur. Azərbaycan gənclərinin təşkilatlanması, gənclərimizin beynəlxalq aləmdə təmsil olunması, təhsildə aparılan islahatlar, ana dilimizin yüksək səviyyədə təbliği, gənclərimizin dövlət quruculuğu prosesinə cəlb edilməsi, dövlət strukturlarının təşkilatlanmış gənclərə diqqət və qayğı ilə yanaşması və digər məsələlərin dövlət səvviyəsində tənzimlənməsi üçün 1999-cu ildə “Dövlət gənclər siyasəti haqqında” Fərman imzaladınız. Bunun ardınca Milli Məclis tərəfindən müvafiq qanun qəbul edildi. Ali məktəbdə ödənişli təhsil alan qaçqın və məcburi köçkün gənclərin ödəniş haqlarından azad edilməsi, Qarabağ müharibəsi əlilləri və veteranları olan gənclərin problemlərinə diqqətlə yanaşılması, mətbuat və mədəniyyət sahəsində çalışan gənclərimizlə bağlı verdiyiniz sərəncam və fərmanlar, gənclərimizin istər dövlət strukturlarına cəlb edilməsi, istərsə də seçkili orqanlarda təmsil olunmasına şərait yaradılması məhz Sizin - möhtərəm Heydər Əliyevin Azərbaycan gəncliyinə göstərdiyi diqqət və qayğının nəticəsidir.
Son illərdə idmanımızın inkişafına göstərdiyiniz diqqəti də qeyd etməmək olmaz. Bildirmək istəyirik ki, Milli Olimpiya Komitəsinin rəhbərliyində olan dəyişiklik, gəncliyimizin lideri cənab İlham Əliyevin MOK-a prezident seçilməsi idmanımızda çox böyük uğurlara gətirib çıxarmışdır. Sizin yaratdığınız şərait və cənab İlham Əliyevin səyləri nəticəsində idmançılarımız Avropa, dünya və olimpiya yarışlarının qalibləri olmuşlar. Azərbaycan gəncliyinin lideri İlham Əliyevin Avropa Şurası Parlament Assambleyası sədrinin müavini və Büro üzvü seçilməsi Azərbaycan diplomatiyasının böyük qələbəsidir.
Bütün bunlar Heydər Əliyev siyasətinin, diqqət və qayğısının nəticəsidir.
Hörmətli cənab Prezident!
Azərbaycanda fəaliyyət göstərən, on minlərlə gənci özündə birləşdirən 26 gənclər təşkilatı müstəqil ölkəmizin işıqlı gələcəyinin təminatçısı kimi Sizi görür və Azərbaycan Həmkarlar İttifaqları Konfederasiyasının təşəbbüsünə qoşularaq, növbəti prezident seçkilərində Heydər Əlliyevin namizədliyini irəli sürməyi qərara almışdır. Sizi əmin edirik ki, bu seçki kampaniyasında Sizin namizədliyiniz Azərbaycan gəncliyi tərəfindən dəstəklənəcək və gənclərimiz yalnız Sizə səs verəcəklər.
Bölmənin digər xəbərləri
