Azərbaycan səfiri etimadnaməsini Ekvadorun vitse-prezidentinə təqdim edib
Bakı, 8 may, AZƏRTAC
Mayın 8-də Azərbaycanın iqamətgahı Brazilia şəhərində olan Ekvadordakı fövqəladə və səlahiyyətli səfiri Elxan Poluxov etimadnaməsini bu ölkənin Prezidenti vəzifəsini icra edən, vitse-prezident xanım Maria Alexandra Vikunyaya təqdim edib.
Azərbaycanın Braziliyadakı səfirliyindən AZƏRTAC-a bildiriblər ki, görüşdə xanım Maria Vikunya Azərbaycan Prezidentinə və xalqına öz səmimi salamlarını çatdıraraq ölkələrimiz arasında əlaqələrin hər bir sahəsində inkişafı üçün geniş imkanların olduğunu söyləyib. Qeyd edib ki, hər iki ölkə bir sıra beynəlxalq təşkilatlara üzvdür.
Öz növbəsində E.Poluxov Prezident İlham Əliyevin salamlarını xanım Maria Alexandra Vikunyaya çatdıraraq Ekvador Respublikasında səfir olmasından məmnun olduğunu bildirib. Səfir fəaliyyəti dövründə ölkələrimiz arasında münasibətlərin daha da genişləndirilməsi və dərinləşdirilməsi istiqamətində səylərini əsirgəməyəcəyini söyləyib. Görüşdə diplomat ölkəmiz haqqında ətraflı məlumat verib.
Söhbət zamanı ikitərəfli münasibətlərin inkişaf etdirilməsi istiqamətdə müzakirələr aparılıb.
Bölmənin digər xəbərləri
