Bakı, 12 yanvar, N.Məmmədova, AZƏRTAC

Dövlətimizin başçısının yanvarın 30-da yerli televiziya kanallarına müsahibəsinin əsas məğzi ondan ibarətdir ki, Azərbaycan təkcə özünə güvənərək, zamanın tələbləri dalğasında qalıb və indi də qalmaqdadır. Çünki biz həm ərazilərimizin erməni işğalından azad edilməsi zamanı, həm də postmünaqişə dövründə - dağıdılmış şəhər və rayonların bərpası prosesində öz gücümüzü və imkanlarımızı nümayiş etdirdik, habelə gələcək üçün zəmin hazırlayırıq. Söhbət “yaşıl” enerjidən, müasir şəraitdə alternativ enerji mənbələrindən istifadədən gedir.

Bu fikirləri Prezident İlham Əliyevin yanvarın 10-da verdiyi geniş müsahibəni şərh edən siyasi icmalçı Tofiq Abbasov AZƏRTAC-la bölüşüb.

Agentliyin müsahibi qeyd edib: “Prezidentin ilin əvvəlində yerli televiziya kanallarının nümayəndələrinə müsahibə verməsi, ölkəmizin həyat fəaliyyətinin bütün əsas sahələrini əhatə etməsi, uğurlardan və problemlərdən danışması xoş bir ənənəyə çevrilib. Bu il də istisna olmadı. Yanvarın ilk dekadasının sonunda Prezident televiziya kanallarının nümayəndələrinə vaxt ayırdı və bir daha xatırlatdı ki, biz çox uğurlu, çox əlamətdar, düşərli il keçirmişik. Bu il respublikamızın və xalqımızın tarixində Qələbə ili kimi qalacaq. Biz ərazi bütövlüyümüzü tam təmin etmişik, inamlı zəfər qazanmışıq, təkcə Ermənistana deyil, həm də onun çoxsaylı havadarlarına, ilhamvericilərinə və tərəfdarlarına heç bir şans buraxmamışıq. Onlar Azərbaycanı qaralamaq istəyir, bizim haqqımızda yalan məlumatlar yayır, guya işğalçı olduğumuzu bəyan edirlər. Halbuki, Azərbaycan heç vaxt özünü hansısa işğalçı məqsədlər və ya düşüncələrdə ittiham etmək üçün heç bir səbəb verməyib”.

Onun sözlərinə görə, 2023-cü ildə Azərbaycan təkcə respublikanın özü və Azərbaycan xalqı üçün deyil, həm də zülmə, təzyiqə, imperiya güclərinin təsirinə məruz qalan digər ölkələr və xalqlar üçün də böyük irəliləyişlərə nail olub. Ekspert vurğulayıb: “Bu kontekstdə neokolonialist cəhdlərin ən “parlaq” təcəssümü Fransadır və Prezident İlham Əliyev öz müsahibəsində Parisin dəfələrlə Bakıya problemlər yaratmaq cəhdlərindən, BMT Təhlükəsizlik Şurasında Azərbaycan xalqının özünün işğal olunmuş ərazilərini azad etmək uğrunda ədalətli mübarizəsini pisləyən qətnamə qəbul etdirməyə çalışmasından, əksinə, qorxunc cinayətlər törədən və indi də Azərbaycana və xalqımıza qarşı onları törətməyə cəhd edən Ermənistanın təmizə çıxarılması səylərindən danışıb. Prezidentin öz müsahibəsində qeyd etdiyi kimi, bütün bu cəhdlər əbəsdir və bizim gücümüz haqlı olmağımız, heç bir səhvə və yanlış hərəkətə yol verməməyimizdədir. Bunun nəticəsində kimsə bizə qarşı hər hansı hesab tələb edə və ölkəmizi ittiham edə bilməz. Əksinə, Azərbaycan istisnasız olaraq beynəlxalq hüquq normaları çərçivəsində hərəkət edib, ölkəmiz öz inkişafını təmin etməklə yanaşı, region üçün də əlverişli şərait yaradır”.

Siyasi icmalçı bununla bağlı qeyd edib ki, “3+3” qarşılıqlı fəaliyyət formatının təşəbbüskarının məhz Prezident İlham Əliyev olması heç də təsadüfi deyil. Dövlətimizin başçısı zəruri hesab edir ki, regionumuzda olan bütün problemlər burada fiziki iştirakı olan ölkələrin səyləri və gücü ilə həll olunsun. Xarici güclər isə, yad proseslərə əngəl olmaq, qarışıqlıq yaratmaq və ümumi vəziyyəti xaosa çevirmək istəyirlər.

T.Abbasov hələ də açıq qalan məsələlərə diqqəti çəkərək deyib: “Prezident öz müsahibəsində Fransanın hazırkı şəraitdə oynadığı destruktiv rola mühüm yer ayırıb. Bəli, bu, fransız xalqının təqsiri deyil. Hərçənd, onlar Makronu və onun komandasını ölkəyə rəhbərlik etmək üçün seçiblər, amma rəsmi Parisin etdiyi bütün səhvlərə görə məsuliyyət dövlətin birinci şəxsi kimi məhz Emmanuel Makronun üzərinə düşür. Beşinci respublikanın prezidenti Azərbaycana münasibətdə öz səhvlərini etiraf etmək istəmir, həmçinin uğursuz oyunu ilə təhlükə yaradaraq erməni radikalizmini və milliyyətçiliyini təmizə çıxarmağa çalışır. O gizlətmir ki, öz daxili siyasətində məhz erməni seqmentinə arxalanır. Azərbaycan isə qətiyyətlə öz maraqlarını müdafiə edir və kənardan daxili işlərinə müdaxiləyə imkan vermir. Dövlətimizin başçısı auditoriyanın diqqətini ona yönəltdi ki, Azərbaycanda “casusluq” qalmaqalından sonra köməksizlik və çarəsizlik hiss edən Paris bütün dünyaya hay-küy saldı, Fransanın müəyyən siyasi dairələri Azərbaycana qarşı sanksiya siyasətini qanunverici orqanlarda, beynəlxalq strukturlarda yaymağa çalışırlar. Bunun səbəbi nədir? Məgər Azərbaycan haqsızdır? O, kimin hüquqlarını pozub?”

Ermənistanın xarici güclərin dəstəyini qazanmaq cəhdi haqqında danışan politoloq qeyd edib ki, Fransa ilə yanaşı iki-üç ölkə də erməni radikalizmi və milliyyətçiliyinə dəstək verir. Eyni zamanda, beynəlxalq ictimaiyyətin böyük bir hissəsi Azərbaycanı həmişə sağlam məntiq orbitində yerləşən və beynəlxalq mühitdə təhlükəsizlik çalarlarının güclənməsinə töhfələr verən ölkə kimi tanıyır.

Siyasi icmalçı bildirib: “Prezidentin, həmçinin bizə dost olan bir çox dövlətlərin nümayəndələrindən ibarət Bakı Təşəbbüs Qrupun fəaliyyətinə toxunması heç də təsadüfi deyil. Bu təşəbbüsü Azərbaycanın və şəxsən Prezident İlham Əliyevin Qoşulmama Hərəkatının sədri qismində atdığı uğurlu addımlar kontekstində qiymətləndirmək lazımdır. Azərbaycan elə bir qrup yaradıb ki, o, köhnə metropoliyalar metodikasının artıq işə yaramadığı barədə hər kəsin eşidəcəyi gur səslə bəyanatlar verir”.

Prezidentin toxunduğu daha bir mühüm məsələ Böyük Qayıdış Proqramıdır.

Ekspert qeyd edir: “Prezident tikinti-bərpa işlərinin hansı ardıcıllıqla davam etməsindən danışdı, həmçinin Azərbaycanın müvafiq şəkildə həll etdiyi içməli su probleminə də diqqət yetirdi. O, ermənilərin işğal siyasəti dövründə çirkləndirdiyi Sərsəng və digər su anbarlarından bəhs etdi. Dövlət başçısı, ilk növbədə, Azərbaycanın özəl biznesini ərazilərimizin bərpasında fəal olmağa çağırdı və digər tərəfdən, Bakı, Sumqayıt, başqa şəhər və rayonlardan olan vətəndaşlarımızı bu prosesə töhfə verməyə dəvət etdi. Müsahibənin bu fraqmenti, əlbəttə, böyük diqqətə layiqdir, ölkənin lideri kimi İlham Əliyevin çağırışı eşidilməlidir”.

2023-cü ilin Azərbaycan üçün dönüş ili olduğunu bir daha vurğulayan T.Abbasov bildirib ki, Prezidentin yerli telekanallana müsahibəsi bizim qarşıya qoyduğumuz məqsədlərə nail olduğumuz, ən başlıcası gələcəkdə hər hansı böhranın olmaması üçün zəmin yaratdığımız 20-dən çox məsələni ehtiva edirdi. Agentliyin müsahibi hesab edir: “Əlbəttə, bu, bütün Azərbaycan vətəndaşlarına, hətta ölkəmizin hüdudlarından kənarda yaşayan soydaşlarımıza edilən çağırışdır. Vəzifələr, istiqamətlər çoxdur və bütün bu istiqamətlər üzrə fəal mövqe nümayiş etdirən Prezident hazırkı şəraitdə insan amilinin necə həlledici rol oynadığını göstərir. Ən başlıcası, Prezidentimiz vəd verən insanın məsuliyyətlə çalışaraq öz vədlərini yerinə yetirməsinin, yəni, onun sözü ilə əməlinin həmişə uyğun gəlməsinin parlaq nümunəsini nümayiş etdirir. Bütün müasirlərimiz məhz bu mövqe ilə silahlanmalıdır. Şübhəsiz ki, biz illüziyalardan uzağıq, hələ ki, məsuliyyətli yanaşma tələb edən çoxlu problemlər var. Xüsusən, Ermənistan ilə sülh sazişinin imzalanması hələ ki, alınmır. Bu ölkə Azərbaycanın nümunəsini, yəni məsuliyyətli yanaşmasını, metodların ifadə edilməsində konkretliyi, qarşıya qoyulan vəzifələri həyata keçirilməsinə nail olunmasında əminliyi örnək almalıdır”.

Siyasi icmalçı əmin olduğunu bildirib ki, iqtisadiyyatın inkişafı kursu öz qüvvəsində qalacaq, çünki cəmiyyətimizin sosial tonusu məhz bu amildən asılıdır.

Ekspert yekunda deyib: “Prezident İlham Əliyevin səyləri ilə 2018-ci ildən əhalinin həssas təbəqələrinin dəstəklənməsini nəzərdə tutan bir neçə iri investisiya layihəsi həyata keçirilir. İqtisadi artım ümumilikdə sosial rıçaqların fəaliyyətində çox böyük rola malikdir. Bu kontekstdə Azərbaycan hamı üçün, o cümlədən çalxalanan və həmişə xaricdən yardım gözləyən qonşu Ermənistan üçün də yaxşı model təklif edir. Bildiyimiz kimi, Ermənistan öz büdcəsində xaricdən - diaspordan maliyyə resurslarının cəlb olunduğunu ayrıca bir bölməyə daxil edən yeganə ölkədir. Prezident İlham Əliyev öz müsahibəsində bir daha xatırlatdı ki, gördüyümüz bütün işlər öz resurslarımız hesabına həyata keçirilir. Qazaxıstan və Özbəkistanın Qarabağda inşa etdiyi iki məktəb istisna olmaqla, qalan bütün layihələr bizim özümüz tərəfindən yerinə yetirilir, yəni, bizə donorlar lazım deyil. Bəli, arzu edənlər varsa, qoy onlar öz qabiliyyətlərini, iştirakını nümayiş etdirsin, amma biz Ermənistan kimi dənizdən səmt küləyinin əsməsini gözləmirik, əksinə, həmişə yüksəkdə olmağa çalışırıq. Çünki özümüzə, öz gücümüzə inanırıq və bununla bağlı şübhəsiz ki, dünya ictimaiyyətinin diqqətini cəlb edə bilərik. Təsadüfi deyil ki, son illər tərəfdaşlarımızın sıraları xeyli genişlənib və bu, bizi sevindirir. Tərəfdaşlarımızla, müttəfiqlərimizlə birlikdə həll olunmamış problemlərin aradan qaldırılması üçün öz şərtlərimizi və imkanlarımızı tətbiq etməyə həmişə hazırıq”.