QAN YADDAŞI
AZƏRBAYCAN TEXNİKİ UNİVERSİTETİNDƏ 20 YANVAR ŞƏHİDLƏRİ YAD EDİLMİŞDİR
Bakı, 18 yanvar (AZƏRTAC). Yanvarın 18-də Azərbaycan Texniki Universitetində (ATU) 20 Yanvar faciəsinin 20-ci ildönümünə həsr olunmuş anım günü keçirilmişdir.
Faciə qurbanlarının xatirəsi bir dəqiqəlik sükutla yad edilmişdir.
Universitetin rektoru, professor Havar Məmmədov 1990-cı il yanvarın 19-dan 20-nə keçən gecə xalqımıza qarşı dəhşətli cinayət törədildiyini, yalnız ulu öndər Heydər Əliyevin ikinci dəfə hakimiyyətə qayıtdıqdan sonra bu qətliama siyasi qiymət verildiyini diqqətə çatdırmışdır.
Təhsil nazirinin müavini Elmar Qasımov, Milli Məclisin deputatı Astan Şahverdiyev, Bakı Metropoliteninin rəisi Tağı Əhmədov sovet dövlətinin öz vətəndaşlarına qarşı törətdiyi 20 Yanvar qırğınının azadlığı və müstəqilliyi uğrunda ayağa qalxmış xalqın mübarizə əzmini qırmağa yönəldilmiş siyasi aksiya olduğunu vurğulamış, şəhidlərin xatirəsinin ürəklərdə əbədi yaşayacağını bildirmişlər.
Tədbir çərçivəsində Qara Yanvar hadisəsini əks etdirən fotosərgi təşkil olunmuşdur.
Sonda tələbələr şəhidlərə həsr olunmuş ədəbi-bədii kompozisiya göstərmişlər.