RƏSMİ XRONİKA
AZƏRBAYCAN TİBB UNİVERSİTETİNİN REKTORU ƏHLİMAN ƏMİRASLANOVUN ÇIXIŞI
- Möhtərəm cənab Prezident!
Çox hörmətli Mehriban xanım!
Çox hörmətli professor-müəllim heyəti, tələbələr!
Ölkəmizin ən qocaman ali təhsil müəssisələrindən biri olan
Tibb Universiteti bu gün tarixinin ən əlamətdar günlərindən birini yaşayır. Ulu öndərin siyasətinin layiqli davamçısı, Zati-aliləri möhtərəm cənab Prezident İlham Əliyev, YUNESKO-nun və İSESKO-nun xoşməramlı səfiri, Heydər Əliyev Fondunun prezidenti, Milli Məclisin deputatı Mehriban xanım Əliyeva bu gün universitetimizə qonaq gəliblər və çoxprofilli klinikanın təməlqoyma mərasimində iştirak edirlər.
İcazə verin, Tibb Universitetinin professor-müəllimləri və tələbələri adından möhtərəm Prezident, Sizi, Mehriban xanım, Sizi səmimi qəlbdən salamlayım və “Universitetimizə xoş gəlmisiniz!” deyim.
Universitetimizin əsas binalarının yerləşdiyi tibb şəhərciyinin yaranması ideyası 1930-cu illərdə bu ali məktəbə rəhbərlik etmiş, onun qurulmasında böyük xidmətlər göstərmiş, görkəmli ictimai-siyasi xadim Əziz Əliyevə məxsusdur və şəhərciyin ilk təməl daşını da o, qoymuşdur.
Universitetimizin inkişafının böyük bir dövrü ulu öndərimiz Heydər Əliyevin adı ilə bağlıdır. Universitet binalarının tam əksəriyyəti, idman, yataqxana kompleksləri, elmi tədqiqat mərkəzinin və s. inşa edilib istifadəyə verilməsi və müasir avadanlıqla təchiz olunması ulu öndərimizin xidmətləridir. O, universitetin kadr potensialının formalaşmasında da çox böyük işlər görmüşdür. 1970-1980-ci illərdə ulu öndərimizin göstərişi ilə ən istedadlı, ən qabiliyyətli gənc mütəxəssislər keçmiş SSRİ-nin böyük, tanınmış elmi-tibbi mərkəzlərinə göndərilir, onlar yüksək ixtisaslı mütəxəssis, alim kimi Azərbaycana dönüb və indi də xalqımıza xidmət edirlər. Məhz o dövrdə aparılan uzaqgörən müdrik siyasətin nəticəsidir ki, indi Azərbaycanda, Azərbaycan Tibb Universitetində kadr qıtlığı hiss olunmur. Tam məmnuniyyətlə demək olar ki, Tibb Universitetinin bütün kafedralarına rəhbərlik edən akademiklər, professorlar o dövrdə yetişmiş mütəxəssislər, o dövrdə hazırlanmış kadrlardır.
Böyük qürur hissi ilə demək istəyirik ki, ulu öndərimiz 1993-cü ildə xalqın təkidli dəvəti ilə Azərbaycanda yenidən siyasi hakimiyyətə gəldikdən sonra iki dəfə Azərbaycan Tibb Universitetində olmuşdur. Qarşısında dayandığımız 11 mərtəbəli bu yeni tədris binasının inşa edilib istifadəyə verilməsi də məhz ulu öndərimizin qayğısı sayəsində mümkün olmuşdur. 1998-ci ildə yeni tədris binasının istifadəyə verilməsi mərasiminə ulu öndərimizi dəvət etdik. O, böyük məmnuniyyətlə bu mərasimə gəldi, məhz bu yerdə universitetin kollektivi qarşısında geniş nitq söylədi. Biz fəxr edirik ki, ulu öndərimiz o vaxt Tibb Universitetinin fəaliyyətinə çox yüksək qiymət verdi, dedi ki, şəhərin müxtəlif yerlərində yerləşən klinik kafedraları da bu şəhərciyə yığmaq məqsədəuyğun olardı. İndi ulu öndərimizin tövsiyələri reallaşır.
Əziz dostlar, hörmətli mərasim iştirakçıları, bu gözəl ənənələr bu gün də davam edir. Zati-aliləri, möhtərəm Prezidentimiz cənab İlham Əliyevin qayğısı sayəsində ölkəmizin bütün regionlarında məktəblər, səhiyyə ocaqları, idman kompleksləri inşa edilib xalqın istifadəsinə verilir. Bu gün cənab İlham Əliyevin universitetimizin çoxprofilli klinikasının təməlqoyma mərasimində iştirakı da təkcə Tibb Universitetinin kollektivinə deyil, bütövlükdə təhsilimizə, səhiyyəmizə, elmimizə olan qayğının nümunəsidir.
Hörmətli mərasim iştirakçıları, bu gözəl ənənə Heydər Əliyev Fondunun prezidenti Mehriban xanım Əliyeva tərəfindən də davam etdirilir. “Yeniləşən Azərbaycana yeni məktəb” proqramı məhz Mehriban xanımın təşəbbüsü ilə hazırlanıb həyata keçirilir və onun gözəl nəticələrini hamımız görürük. Səhiyyəmizin, təhsilimizin, elmimizin, mədəniyyətimizin inkişafında da Mehriban xanımın böyük xidmətləri var.
Möhtərəm cənab Prezident, biz bir müddət əvvəl universitetimizdə şəhərin müxtəlif rayonlarında yerləşən klinik kafedraların bir yerə toplanması barədə təşəbbüs qaldırdıq. Bu, onunla əlaqədar idi ki, tələbələrimizin şəhərin müxtəlif qütblərində yerləşən kafedralara gedib-gəlmələri çox çətinlik törədirdi. Əgər küçələrdəki tıxacları da nəzərə alsaq, bu məsələnin nə dərəcədə ciddi olduğunu görərik. Biz bu problemi nəzərə alaraq, möhtərəm Prezidentimiz cənab İlham Əliyevə müraciət etdik. O, tez bir zamanda bu müraciətlə maraqlandı və qısa bir müddətdə, 2007-ci il sentyabrın 11-də Sərəncam imzalandı. Bu Sərəncamla Azərbaycan Tibb Universitetinin çoxprofilli tədris klinikasının tikintisi və avadanlıqla təchizi üçün böyük vəsait ayrıldı.
Möhtərəm Prezident, sözün düzü, biz tikintiyə bu il başlaya biləcəyimizə inanmırdıq. Sizin qayğınız, səyiniz nəticəsində Prezidentin Ehtiyat Fondundan ayrılmış 3 milyon manat vəsait hesabına artıq bu gün bu klinikanın təməli qoyuldu. İcazə verin, bu diqqət və qayğıya görə bir daha universitet kollektivi adından Sizə öz dərin təşəkkürümüzü və səmimi minnətdarlığımızı bildirək.
Hörmətli mərasim iştirakçıları, möhtərəm Prezidentimiz cənab İlham Əliyevin fədakar əməyi və uzaqgörən siyasəti nəticəsində indi Azərbaycanda bütün sahələrdə böyük yüksəliş var və respublikamız regionun lider ölkəsinə çevrilibdir. Biz hesab edirik ki, möhtərəm cənab İlham Əliyevin apardığı həm xarici, həm daxili siyasət düzgün, uzaqgörən siyasətdir və Tibb Universitetinin kollektivi bunu ürəkdən bəyənir.
Möhtərəm cənab İlham Əliyev, Sizin kimi Prezidentlə biz özümüzü son dərəcə güclü və inamlı hiss edirik, müstəqil, demokratik Azərbaycanın vətəndaşı olmağımızdan böyük qürur hissi keçiririk. Tibb Universiteti bütün dövrlərdə dövlətçiliyimizin qayğısına qalan, ona dayaq olan bir kollektiv olub və bu gün də belədir. Əmin ola bilərsiniz ki, kollektivimiz bütün işlərinizdə həmişə Sizinlə birlikdə olacaq, Sizin bütün fəaliyyətinizi, siyasətinizi dəstəkləyəcəkdir.
Möhtərəm Prezident, Sizə Azərbaycanın xoş, gözəl gələcəyi naminə uzun ömür, möhkəm cansağlığı və gələcək bütün işlərinizdə böyük müvəffəqiyyətlər arzu edirik.