- Əziz tələbələr, əziz müəllimlər,

Əziz həkimlər, əziz dostlar!

Bu gün Azərbaycan Tibb Universitetinin həyatında çox əlamətdar bir gündür. Bu gün biz birlikdə yeni tədris-terapevtik korpusunun təməl daşını qoyduq. Əminəm ki, nəzərdə tutduğumuz vaxtda bu gözəl bina inşa ediləcək və istifadəyə veriləcəkdir. Əhliman müəllimin qeyd etdiyi kimi, bir müddət bundan əvvəl mənə müraciət daxil olmuşdu ki, terapevtik korpusun, klinikanın tikintisinə böyük ehtiyac var. Ancaq 2007-ci ilin büdcəsində bu məqsədlər üçün vəsait nəzərdə tutulmamışdır. Məhz buna görə mən öz Sərəncamımla Prezidentin Ehtiyat Fondundan bu ilin sonuna qədər 3 milyon manat ayrılmasına dair göstəriş vermişəm və əminəm ki, ilin sonuna qədər müəyyən işlər görüləcəkdir. Biz 2008-ci ili də gözləyə bilərdik, yəni çox vaxt qalmayıb. Ancaq mən bilirdim ki, bu klinikanın yaradılmasına çox böyük ehtiyac var və istəmirdim ki, hətta bir neçə ayı itirək. Mən əminəm ki, klinika ən yüksək dünya standartlarına cavab verəcək, burada çox gözəl müalicə imkanları yaranacaqdır. Tələbələr üçün çox gözəl imkanlar yaranacaqdır. Tələbələr bu şəhərcikdə oxuyacaqlar, öz biliklərini artıracaqlar. Beləliklə, oxumaq üçün daha da yaxşı imkanlar yaranacaqdır. Bununla bərabər, ölkəmizdə yeni müasir klinikanın yaranması da çox böyük əhəmiyyətə malik hadisədir.

Bildiyiniz kimi, son illər ərzində bu sahəyə çox böyük diqqət göstərilir. İndi Azərbaycanda həm regionlarda, həm də Bakıda yeni gözəl tibb müəssisələri yaranır. Bakının ən iri tibb müəssisəsi olan Klinik Tibbi Mərkəz əsaslı təmir olunur, faktik olaraq, yenidən qurulur, ən yüksək dünya standartlarına cavab verəcəkdir. Tikintisi 20 il yarımçıq qalmış Milli Onkoloji Mərkəzdə yeni korpus inşa olunub və əminəm ki, gələn il biz onun açılışında iştirak edəcəyik. Elmi Tədqiqat Oftalmologiya İnstitutunun yeni binası tikilir. O da ən yüksək dünya səviyyəsində olacaqdır. Travmatologiya İnstitutunun yeni inzibati korpusunun tikintisinə bu ilin sonuna qədər başlanmalıdır. Bir müddət bundan əvvəl yenə də mənə daxil olan müraciətə əsasən, Respublika Uroloji Xəstəxanasında böyrəkköçürmə mərkəzi tikiləcəkdir. Bu məqsədlər üçün də yaxın zamanlarda vəsait ayrılacaqdır. Böyrəkköçürmə Mərkəzinin yaradılması ilə yanaşı, bütövlükdə Uroloji Xəstəxana tamamilə yenidən qurulacaqdır.

Bu, onu göstərir ki, biz bu məsələlərə çox böyük diqqət göstəririk, bu məqsədlərə qısa müddət ərzində, çox böyük vəsait ayırırıq. Beləliklə, Azərbaycanda çox müasir səhiyyə infrastrukturu yaradılır. Bir müddət bundan əvvəl Müdafiə Nazirliyinin hospitalı istifadəyə verilibdir. O da ən yüksək standartlara cavab verir. İndi Daxili İşlər Nazirliyinin hospitalı tikilir. Yəni, bütün bunlar Azərbaycanın səhiyyə potensialını çox böyük dərəcədə artırır. Nəzərə alsaq ki, bölgələrdə də buna oxşar proseslər gedir, mən əminəm ki, yaxın zamanlarda Azərbaycanda səhiyyə infrastrukturu ən yüksək dünya səviyyəsinə çatacaqdır. İndi Dövlət Neft Şirkətinin xətti ilə Azərbaycanın bölgələrində müxtəlif yeni, müasir diaqnostika-müalicə mərkəzləri tikilir. İlkin mərhələdə müxtəlif bölgələrdə 12 mərkəzin tikintisi nəzərdə tutulubdur. Artıq onlardan ikisi - Lənkəranda və Naxçıvanda istifadəyə verilibdir. Deyə bilərəm ki, həm Lənkəranda, həm də Naxçıvanda artıq ürək əməliyyatları aparılır. Hər bir müalicə-diaqnostika mərkəzində süni böyrək aparatları quraşdırılır və hemodializ üçün imkanlar yaranır. Çünki indi insanlar müxtəlif rayonlardan Bakıya axışırlar. Həftədə 2-3 dəfə 300, 400, 500 kilometr məsafə qət edib Bakıya gəlirlər. Bu, həm böyük əziyyətdir, həm böyük xərcdir, həm də, əlbəttə ki, xəstələrin tam müalicəsi üçün imkan azdır. Yəni, biz bütün bu məsələlərə kompleks şəkildə yanaşırıq. Azərbaycanda həm regionların sosial-iqtisadi inkişafı Dövlət proqramı çərçivəsində yeni tibb müəssisələrinin yaradılması nəzərdə tutulub, eyni zamanda, Bakının qəsəbələrinin inkişafı proqramına əsasən, bu yaxınlarda 25 tibb müəssisəsi tikiləcəkdir.

Bununla bərabər, bu il, 2007-ci ildə 50-dək tibb müəssisəsi tikilib və təmir olunubdur. Bu, çox böyük vəsait tələb edir və biz də bu vəsaiti artırırıq. Bir faktı demək kifayətdir ki, son 4 il ərzində səhiyyəyə ayrılan xərclər 5,4 dəfə artıbdır. 69 milyon manatdan 371 milyon manata çatıb və növbəti illərdə biz bu vəsaiti daha da artıracağıq. Çünki buna böyük ehtiyac var. Azərbaycanın sürətli inkişafı bizə bu imkanları verir. İldən-ilə artan büdcəmiz, ildən-ilə artan iqtisadiyyatımız bizə əlavə imkanlar yaradır. Bu imkanları, ilk növbədə, sosial məsələlərin həllinə yönəltməliyik. Təhsilə, səhiyyəyə, elmə, mədəniyyətə - bütövlükdə humanitar sahəyə. Çünki bu sahə hər bir ölkənin inkişafı üçün çox lazımdır, çox vacibdir. Bir də ki, insanlar yüksək səviyyəli tibbi xidmət almalıdırlar. Xəstəxanalar gözəl olmalıdır, hər yerdə avadanlıq müasir olmalıdır, çox gözəl şərait yaradılmalı, peşəkar kadrlar olmalıdır. Bu baxımdan Azərbaycan Tibb Universitetinin də çox böyük rolu, çox böyük xidməti var. Azərbaycanda peşəkar tibb kadrlarının yetişdirilməsi üçün burada çox böyük işlər görülür. Bildiyiniz kimi, bu yaxınlarda mənim tərəfimdən imzalanmış Sərəncama görə, ən istedadlı gənclər Prezidentin Ehtiyat Fondunun hesabına xarici ölkələrin aparıcı elm və təhsil ocaqlarına göndəriləcəklər. Orada yüksək təhsil alacaq və Vətənə qayıdıb burada gözəl işlər görəcəklər.

Bütün bu işləri görmək üçün, əlbəttə ki, iqtisadi potensial möhkəm olmalıdır. Biz də bunu yaradırıq. Bu yaxınlarda imzalanmış digər Sərəncama görə, Azərbaycanda, ilk növbədə, Bakıda təcili tibbi yardımın bütün infrastrukturu dəyişdiriləcəkdir. Xaricdən alınmış 150 yeni, müasir təcili yardım maşınları gətiriləcəkdir. Yeni rabitə sistemi quraşdırılacaq ki, əhalinin zənglərinə operativ qaydada cavab verilə bilsin. Bütün təcili tibbi yardım sistemi dərmanlarla təchiz olunacaq və beləliklə, insanlara çox gözəl xidmət göstəriləcəkdir.

Yəni, sadaladığım bütün bu işləri görmək üçün çox vaxt lazımdır. Bir şey demək kifayətdir ki, Azərbaycanda aparılan iqtisadi islahatlar, siyasi islahatlar, ulu öndərin siyasi xətti bu gün uğurla davam etdirilir və ölkəmizin iqtisadi inkişafı artdıqca, əlbəttə ki, bütün sosial məsələlər daha da tezliklə öz həllini tapacaqdır. Bir də demək istəyirəm ki, ilk növbədə səhiyyə sahəsinə çox böyük diqqət göstərilir və bundan sonra da göstəriləcəkdir. Mən bu gün çox şadam ki, biz birlikdə bu gözəl, yeni korpusun təməlini qoyduq. Şübhə etmirəm ki, bu bina yaxın zamanlarda tikilib istifadəyə veriləcək, ən yüksək standartlara cavab verəcəkdir. Ondan sonra da nə kimi müraciətlər olarsa, mən onların hamısını yerinə yetirməyə hazıram. Bu korpusun yaranma tarixi bunu əyani şəkildə göstərir. Əhliman müəllim təxminən bir ay bundan əvvəl, bəlkə də, bir az qabaq müraciət etmişdir. Qısa müddət ərzində qərar qəbul olundu, artıq təməl daşı qoyuldu. İndi Əhliman müəllim mənə deyir ki, cərrahiyyə korpusunun tikintisinə də böyük ehtiyac var. Biz bu məsələyə də baxacağıq və sizin bütün problemlərinizi həll edəcəyik. Korpusun təməl daşının qoyulması münasibətilə sizi bir daha təbrik edirəm, sizə cansağlığı, uğurlar arzulayıram.

Sağ olun.