Azərbaycan-Türkiyə parlamentləri arasındakı əməkdaşlıq əlaqələrinin perspektivlərinə dair fikir mübadiləsi aparılıb
Bakı, 25 aprel, AZƏRTAC
Aprelin 25-də Milli Məclisin Azərbaycan-Türkiyə parlamentlərarası əlaqələr üzrə işçi qrupunun üzvlərinin Türkiyə Böyük Millət Məclisinin Azərbaycanla dostluq qrupunun rəhbəri Şamil Ayrımla görüşü olub.
Milli Məclisin Səhiyyə komitəsindən AZƏRTAC-a verilən məlumata görə, Zəfər Qurultayında iştirak etmək üçün Azərbaycanda olan qardaş ölkənin deputatını səmimiyyətlə salamlayan komitə sədri Əhliman Əmiraslanov bildirib ki, Türk dünyasının mədəniyyət və incəsənət beşiyi, Azərbaycanın incisi Şuşa şəhərində belə mühüm bir tədbirin keçirilməsinin “Şuşa İli”nə təsadüf etməsi, böyük rəmzi məna daşımaqla bərabər, ermənilərə və onun havadarlarına ciddi mesaj oldu. Dünyanın hər yerindən Şuşaya toplaşmış Dünya Azərbaycanlılarının V Qurultayının nümayəndələri xalqımızın soykökünə, tarixinə və mədəniyyətinə bağlılıqlarını ifadə ediblər.
Türkiyə ilə parlamentlərarası əlaqələr üzrə işçi qrupun rəhbəri Əhliman Əmiraslanov işğaldan azad olunmuş torpaqlarda hazırda gedən bərpa və quruculuq işlərində də Türkiyə şirkətlərinin yaxından iştirak etdiyini məmnunluqla bildirib.
Azərbaycana münasibətdə “bir millət, iki dövlət” məntiqi ilə hərəkət etdiklərini vurğulayan Şamil Ayrım 44 günlük Vətən müharibəsində Azərbaycanın qazandığı Zəfərdən iftixar duyduğunu diqqətə çatdırıb. O, Azərbaycan xalqının və Ordusunun Ali Baş Komandan İlham Əliyevin ətrafında yumruq kimi birləşərək tarixi Qələbəyə nail olduğunu qeyd edib. Torpaqlarımızın azadlığı uğrunda canından keçən şəhidlərimizə Allahdan rəhmət diləyən, onların valideynlərinə ehtiramını ifadə edən Ş.Ayrım, həmçinin Zəfər Qurultayında iştirakından qürur duyduğunu bildirib.
Görüşdə Azərbaycan-Türkiyə parlamentlərarası əlaqələr üzrə işçi qrupunun üzvləri Eldar İbrahimov və Bəhruz Məhərrəmov dostluq və əməkdaşlığa dair fikirlərini bölüşüblər. Qardaş Türkiyənin dünyada önəminin getdikcə artacağına əminlik ifadə olunub. Həmçinin xalqlarımızı sarsılmaz dostluq və qardaşlıq tellərinin bağladığı vurğulanıb.
Söhbət zamanı parlamentlərimiz arasında əməkdaşlıq əlaqələrinin perspektivlərinə dair fikir mübadiləsi aparılıb.
Bölmənin digər xəbərləri
