AZƏRBAYCAN XARİCİ İŞLƏR NAZİRİNİN GÜRCÜSTANA SƏFƏRİ

28.09.2004 [23:23]
Çap et
A⁺ A^-

AZƏRTAC-ın xüsusi müxbiri Tbilisidən xəbər verir ki, Azərbaycanın xarici işlər naziri Elmar Məmmədyarov sentyabrın 28-də Gürcüstana ikigünlük rəsmi səfərə gəlmişdir. Həmin gün o, Gürcüstanın baş naziri Zurab Jvaniya, Milli Təhlükəsizlik Şurasının katibi Qela Bejuasvili, xarici işlər naziri Salome Zurabişvili ilə görüşmüşdür.

Gürcüstan XİN-də keçirilən mətbuat konfransında Elmar Məmmədyarov bildirmişdir ki, bu, onun Gürcüstana ilk rəsmi səfəridir. Görüşlərdə regional məsələlər, iqtisadi layihələr, o cümlədən Bakı-Tbilisi-Ceyhan neft və Bakı-Ərzurum qaz kəmərlərinin çəkilişi müzakirə olunmuşdur. Nazir dostluq, mehriban qonşuluq əsasında qurulan Azərbaycan-Gürcüstan münasibətlərinin zəngin tarixi olduğunu və bunun hər iki tərəf üçün gözəl nəticələr verdiyini vurğulamışdır.

Sonra xarici işlər nazirləri jurnalistlərin suallarına cavab vermişlər.

Azərbaycanın Gürcüstandakı səfiri Ramiz Həsənov, Gürcüstanın Azərbaycandakı səfiri Zurab Qumberidze mətbuat konfransında iştirak etmişlər.

Sentyabrın 29-da E.Məmmədyarov Gürcüstan Prezidenti Mixail Saakaşvili ilə görüşəcəkdir.