Azərbaycanda oynamış moldovalı qapıçı: “Zirə”-“Şerif” duelində aşkar favorit yoxdur
Bakı, 8 iyul, AZƏRTAC
“Şerif”in “Zirə” ilə keçirəcəyi oyunlara indidən proqnoz vermək çətindir”.
Bu sözləri AZƏRTAC-a açıqlamasında Moldova millisinin və “Şerif” komandasının sabiq qapıçısı Stanislav Namaşko deyib.
Keçmiş komandasının Avropa Liqasının I təsnifat mərhələsində “Zirə” ilə keçirəcəyi oyunlar barədə danışan qolkiper Tiraspol təmsilçisinin avrokubok təcrübəsinin çox olduğunu bildirib: “Lakin hər şey meydanda həll olunacaq. Komandalar mövsümlərarası fasilədə heyətlərində müəyyən dəyişikliklər ediblər. Hansı tərəf daha hazırlıqlı olsa, uğurlu nəticə qazanacaq. Fikrimcə, çətin və maraqlı oyun olacaq. Tiraspolda keçiriləcək ilk matçdan sonra cütün taleyi barədə daha aydın danışmaq olar. Hazırda hansısa komandanı aşkar favorit hesab etmirəm”.
Vaxtilə Azərbaycanda AZAL və “Şamaxı”da çıxış etmiş 38 yaşlı qapıçı “Şerif” komandasına “Zirə” barədə məlumat vermədiyini söyləyib: “Klubdan heç kəs mənimlə əlaqə saxlamayıb. Çünki uzun müddətdir oradan ayrılmışam və hazırkı heyətlə əlaqəm yoxdur”.
Qeyd edək ki, “Zirə” “Şerif”ə qarşı ilk oyununu iyulun 11-də səfərdə, cavab matçını isə bir həftə sonra Bakıda keçirəcək.
Bölmənin digər xəbərləri
