AZƏRBAYCANDAN RUSİYAYA HUMANİTAR YARDIM GÖNDƏRİLMİŞDİR
Şimali Osetiyanın Beslan şəhərində son illərin ən amansız terror aktlarından biri törədilmişdir. Yüzlərlə insan, o cümlədən məktəblilər bu faciənin qurbanı olmuş, ağır xəsarət almış, sağlamlığını itirmişdir. Bütün dünya həmin terror aktını pisləməkdədir. Ermənilərin qanlı terrorunun dəfələrlə qurbanı olmuş və antiterror koalisiyasının fəal üzvü olan Azərbaycan da bu terrora qəti etirazını bildirmişdir. Dövlətimizin başçısı İlham Əliyev Rusiya Federasiyasının Prezidentinə başsağlığı teleqramı göndərmiş, bu ölkənin Bakıdakı səfirliyinə gələrək matəm kitabına ürək sözlərini yazmış, özünün və Azərbaycan xalqının Rusiyanın bu kədərinə şərik olduğunu bildirmişdir.
Mərhəməti, ümumbəşəri dəyərlərə hörmətlə yanaşması ilə fərqlənən xalqımız bu terror aktı nəticəsində zərər çəkənlərə maddi yardım göstərməyi özünə borc bilmişdir. 7 ton çəkisi olan bu humanitar yardım 150 adda dərman preparatlarından, sarğı materiallarından ibarətdir. Bu preparatların bir hissəsi respublikamızda istehsal olunmuşdur.
