İDMAN
Azərbaycanın amputant futbolçulardan ibarət millisi Avropa çempionatına vəsiqə qazanıb VİDEO
Bakı, 30 oktyabr, AZƏRTAC
Amputasiya olunmuş şəxslərdən ibarət Azərbaycan milli komandası Avropa Amputant Futbol Federasiyasının təşkilatçılığı ilə Şotlandiyada keçirilən Millətlər Liqasında iştirak edib.
ANAMA-nın mətbuat xidmətindən AZƏRTAC-a verilən məlumata görə, D divizionunda Niderland, Şotlandiya, Albaniya və Kosovo seçmələri ilə mübarizə aparan yığma qrupu 2-ci pillədə tamamlayaraq, 2024-cü ildə Fransada təşkil olunacaq Avropa çempionatının final mərhələsinə vəsiqə qazanıb.
Turnirin bağlanış mərasimində komanda Avropa Amputant Futbol Federasiyasının prezidenti cənab Mateuş Vidlak və Şotlandiyanın sosial qayğı və idman naziri xanım Mari Todd tərəfindən gümüş medallar ilə təltif olunub.
Qeyd edək ki, Azərbaycanın işğaldan azad edilmiş ərazilərində düşmən tərəfindən basdırılan minaların partlaması nəticəsində xəsarət alan şəxslərdən ibarət kollektiv Avropa çempionatının final mərhələsində ilk dəfə iştirak edəcək. 16 ölkənin mübarizə aparacağı final mərhələsində dünya çempionu Türkiyə ilə yanaşı, İngiltərə, Fransa, İspaniya, İtaliya, Almaniya və Polşa kimi güclü yığmalar iştirak edəcək.
Azərbaycan millisinin Millətlər Liqasında iştirakı ANAMA və AFFA arasında minadan zərərçəkənlərin cəmiyyətə reinteqrasiyası və futbol vasitəsilə mina təhlükəsinə dair maarifləndirmədə kütləviliyin təmin edilməsi çərçivəsində bağlanılmış qarşılıqlı anlaşma memorandumu əsasında təşkil olunub.
Bölmənin digər xəbərləri
