Azərbaycanın və Ukraynanın dövlət bayraqları ilə bəzədilmiş Sevastopolun Belbek hava limanında Baş nazir İlham Əliyevi şəhər icra hakimiyyətinin başçısı Leonid Junko, Azərbaycan Baş nazirinin birinci müavinləri Artur Rasizadə və Abbas Abbasov, ölkəmizin Rusiya və Ukraynadakı səfirləri Ramiz Rizayev və Tələt Əliyev, digər rəsmi şəxslər qarşıladılar. Milli geyimli uşaqlar Azərbaycan hökumətinin başçısına duz-çörək təqdim etdilər.

Azərbaycanın Baş naziri fəxri qarovul dəstəsinin qarşısından keçdi.

Baş nazir İlham Əliyev hava limanından Yaltaya - “Yujnaya” sanatoriyasında onun üçün ayrılmış iqamətgaha gəldi.

AZƏRBAYCAN RESPUBLİKASININ BAŞ NAZİRİ İLHAM ƏLİYEV İLƏ RUSİYA FEDERASİYASININ PREZİDENTİ VLADİMİR PUTİNİN GÖRÜŞÜ

Sentyabrın 18-də Yaltada, Rusiya dövləti başçısının iqamətgahında Azərbaycan Respublikasının Baş naziri İlham Əliyev ilə Rusiya Federasiyasının Prezidenti Vladimir Putin arasında təkbətək görüş olmuşdur. Rusiya rəhbəri Yaltada nəzərdə tutduğu ikitərəfli görüşlərdən birincisini Azərbaycanın Baş naziri ilə keçirmişdir. Prezident VLADİMİR PUTİN Azərbaycan hökumətinin başçısını səmimiyyətlə salamlayaraq dedi: -Cənab Baş nazir, Sizi görmək, yenidən və yeni vəzifədə qarşılamaq mənim üçün çox xoşdur. Mən Sizi, ilk növbədə, bu yüksək vəzifəyə təyin olunmağınız münasibətilə təbrik etmək istəyirəm. Əminəm ki, bu, uğurlu seçimdir. Son vaxtlar bizim əlaqələrimizin inkişafı barədə ölkələrimizin ictimaiyyətinə təqdim etməli məsələlər var. İndicə mən ötən il üçün məlumatı nəzərdən keçirdim və gördüm ki, ötən il ölkələrimiz arasında əmtəə dövriyyəsi 70 faiz, bu ilin ilk beş ayında isə 20 faiz artmışdır. Çox yaxşı dinamikadır və ümidvaram ki, Azərbaycan Prezidenti ilə söhbətlərimiz də öz bəhrəsini verir. Sizdən xahiş etmək istəyirəm ki, ilk fürsət düşən kimi, ilk imkan yaranan kimi mənim ən xoş arzularımı Prezidentə yetirəsiniz. Biz ümidvarıq ki, o, sağalacaq, hər şey normal olacaqdır. Biz bilirik ki, hazırda Azərbaycan getdikcə genişlənən seçkiqabağı mübarizə şəraitindədir. Lakin ümidvar olduğumu ifadə etmək istəyirəm ki, daxili siyasi proseslər ikitərəfli münasibətlərin inkişafının sürətinə təsir göstərməyəcək və o, davam edəcəkdir. Baş nazir İLHAM ƏLİYEV təşəkkürünü bildirərək dedi: -Cənab Prezident, səmimi sözlərə görə çox sağ olun. Mən, ilk növbədə, Prezidentimizin xahişini yerinə yetirmək və Sizə onun ən xoş arzularını çatdırmaq, işinizdə uğurlar dilədiyini bildirmək istərdim. Bizə də çox xoşdur ki, ölkələrimiz arasında münasibətlər bütün sahələrdə dinamik inkişaf edir və siyasi baxımdan da çox yaxşı qarşılıqlı fəaliyyət var. İqtisadiyyata gəldikdə, qeyd etdiyiniz kimi, əmtəə dövriyyəsi sürətlə artır və qarşılıqlı surətdə faydalı olan bir çox layihələr həyata keçirilir. Ancaq deməliyəm ki, münasibətlərimizin belə inkişafına başlıca təkan Sizin Azərbaycana səfərinizdən sonra verilmişdir. Bilirsiniz ki, Rusiya Prezidentinin səfərini Azərbaycanda çoxdan gözləyirdilər və Siz bu səfəri həyata keçirməyi qərara aldıqda, bu səfərdən dərhal sonra hiss etdik ki, bütün istiqamətlərdə çox sürətli irəliləyiş yarandı və münasibətlərimiz fəallaşmağa başladı. Biz bunu çox əziz tuturuq. Prezidentimiz dəfələrlə bəyan etmişdir ki, Rusiya Azərbaycan üçün strateji tərəfdaşdır. İndi bu siyasət aparılır və gələcəkdə də aparılacaqdır. Dövlətlərarası münasibətlərin bütün səviyyələrində yeni uğurlar qazanmağımız, daha yaxından qarşılıqlı fəaliyyət göstərərək ölkələrimizə və xalqlarımıza fayda gətirməyimiz üçün biz özümüzdən asılı olan bütün işləri görəcəyik. Fürsətdən istifadə edərək, Azərbaycan Prezidenti müalicə olunarkən ona göstərdiyiniz qayğıya görə də Sizə öz şəxsi təşəkkürümü bildirmək istəyirəm. Biz bunu yüksək qiymətləndiririk. Bunu Azərbaycanda yüksək qiymətləndirir və həmişə yadda saxlayacaqlar. VLADİMİR PUTİN: Zənnimcə, buna görə təşəkkür etmək lazım da deyildir. Bu, müqəddəs işdir. Təkcə bu məsələlərdə deyil, hər hansı digər məsələlərdə də bizim köməyimizə ümid bəsləyə bilərsiniz. Əgər səfərlər əlaqələrimizə belə kömək edirsə, Sizi Moskvaya işgüzar və ya rəsmi səfərə dəvət etmək istəyirəm. Səfərin formatını yəqin ki, Rusiya Federasiyasının hökuməti ilə razılaşdıracaqsınız. Təkrar edirəm, bütün seçkiqabağı işlərə baxmayaraq, biz çox istərdik ki, münasibətlərimizin inkişaf sürətini itirməyək. Bizim ən müxtəlif sahələrə dair müzakirələr aparmaq üçün imkanımız var. Odur ki, zənnimcə, bu, yerinə düşəcəkdir.

X X X

Sonra təkbətək davam etdirilən görüşdə qarşılıqlı maraq doğuran bir sıra məsələlər barəsində ətraflı fikir mübadiləsi aparıldı.

AZƏRBAYCAN RESPUBLİKASININ BAŞ NAZİRİ İLHAM ƏLİYEV İLƏ QAZAXISTAN RESPUBLİKASININ PREZİDENTİ NURSULTAN NAZARBAYEVİN GÖRÜŞÜ

Sentyabrın 18-də Yaltada Azərbaycan Respublikasının Baş naziri İlham Əliyev ilə Qazaxıstan Respublikasının Prezidenti Nursultan Nazarbayev arasında təkbətək görüş olmuşdur. Qazaxıstan Prezidenti Azərbaycanın Baş nazirini özü üçün ayrılmış iqamətgahın önündə səmimiyyətlə qarşıladı. Görüşdə ölkələrimiz arasında əlaqələrin hazırkı səviyyəsindən məmnunluq ifadə edildi, neft layihələrinin həyata keçirilməsi sahəsində əməkdaşlığın genişləndirilməsinin vacibliyi vurğulandı. Prezident Nursultan Nazarbayev Azərbaycan Prezidenti Heydər Əliyevə onun salamlarını çatdırmağı xahiş etdi, dövlətimizin başçısının tezliklə sağalıb Vətənə dönməsini arzuladı. Baş nazir İlham Əliyev Qazaxıstan rəhbərinə Azərbaycan Prezidenti Heydər Əliyevin salamlarını və xoş arzularını yetirdi. Söhbət zamanı hər iki ölkəni maraqlandıran bir sıra məsələlər barədə ətraflı fikir mübadiləsi oldu.

AZƏRBAYCAN RESPUBLİKASININ BAŞ NAZİRİ İLHAM ƏLİYEV İLƏ UKRAYNA PREZİDENTİ LEONİD KUÇMANIN GÖRÜŞÜ

Sentyabrın 18-də Yaltada, Ukrayna dövləti başçısının “Zarya” iqamətgahında Azərbaycan Respublikasının Baş naziri İlham Əliyev ilə Ukrayna Prezidenti Leonid Kuçma arasında təkbətək görüş olmuşdur. Prezident Leonid Kuçma Baş nazir İlham Əliyevi iqamətgahın önündə səmimiyyətlə və hərarətlə qarşıladı. Mehribanlıq və səmimilik şəraitində keçən görüşün əvvəlində Ukrayna rəhbəri Azərbaycan Prezidenti Heydər Əliyevin səhhəti ilə maraqlandı, onun tezliklə müalicəsini başa çatdırıb Vətənə qayıtmasını arzuladı. Prezident Leonid Kuçma Baş nazir İlham Əliyevi yüksək vəzifəyə təyin olunması münasibətilə təbrik etdi, ona uğurlar dilədi. Səmimi görüşə və xoş sözlərə görə minnətdarlıq edən Baş nazir İlham Əliyev Ukrayna dövlətinin başçısına Azərbaycan Prezidenti Heydər Əliyevin salamlarını və xoş diləklərini yetirdi. Görüşdə Ukrayna-Azərbaycan əlaqələrinin inkişaf perspektivləri, ölkələrimiz arasında, xüsusilə GUÖAM və digər təşkilatlar çərçivəsində əməkdaşlığın daha da genişləndirilməsi məsələləri müzakirə edildi.

AZƏRBAYCAN RESPUBLİKASININ BAŞ NAZİRİ İLHAM ƏLİYEV İLƏ GÜRCÜSTAN PREZİDENTİ EDUARD ŞEVARDNADZENİN GÖRÜŞÜ

Sentyabrın 18-də Yaltada Azərbaycan Respublikasının Baş naziri İlham Əliyev ilə Gürcüstan Prezidenti Eduard Şevardnadze arasında təkbətək görüş keçirilmişdir. Gürcüstanın Prezidenti respublikamızın Baş nazirini özünün iqamətgahı önündə hərarətlə və səmimiyyətlə qarşıladı. Mehribanlıq şəraitində keçən görüşdə cənab Eduard Şevardnadze dövlətimizin başçısı Heydər Əliyevin səhhəti ilə maraqlandı və onun tezliklə müalicəsini başa çatdırıb Vətənə qayıtmasını arzuladı. Gürcüstan Prezidentinə təşəkkürünü bildirən Baş nazir İlham Əliyev respublikamızın rəhbərinin salamlarını və xoş diləklərini ona yetirdi. Görüşdən sonra mətbuat üçün qısa bəyanatla çıxış edən Baş nazir İlham Əliyev və Prezident Eduard Şevardnadze dost ölkələrimiz arasında münasibətlərin səviyyəsindən məmnun olduqlarını vurğuladılar. Prezident Şevardnadze Azərbaycanın Baş nazirini Gürcüstana səfərə dəvət etdiyini bildirdi. Baş nazir İlham Əliyev ölkələrimiz arasında əməkdaşlığın müsbət təcrübəsinin davam etdirilməsinin zəruriliyini vurğuladı. O dedi ki, müasir Azərbaycan və Gürcüstan dünyamiqyaslı iki böyük siyasətçinin - Heydər Əliyevin və Eduard Şevardnadzenin şah əsərləridir. Tarix onların fəaliyyətini qiymətləndirib və gələcəkdə də qiymətləndirəcəkdir.

X X X

Sentyabrın 18-də Yaltada, Ukrayna dövləti başçısının “Zarya” iqamətgahında Ukrayna Prezidenti Leonid Kuçmanın adından MDB ölkələri dövlət başçılarının şərəfinə qeyri-rəsmi qəbul təşkil olundu. Azərbaycanın Baş naziri İlham Əliyev qəbulda iştirak edirdi.