AZƏRBAYCANIN BİRİNCİ XANIMINA MİNNƏTDARLIQ EDİRLƏR
Bakı şəhər sakini Məlahət Həsənova AZƏRTAC-ın müxbirinə demişdir ki, Ülviyyənin bibisiyəm. Onu müalicə etdirmək üçün respublikada qapısını açmadığımız tibb müəssisəsi, humanitar təşkilat qalmamışdı. Dərdli dərdlini tapar deyiblər. Eyni bəlaya düçar olmuş uşaqların valideynləri ilə də elə həmin müalicə ocaqlarında və qurumlarda tanış olmuşuq. Ümidlə üz tutduğumuz ünvanlardan o qədər peşman qayıtmışıq ki! Nəhayət, Binəqədi rayonunda həkim Esmiralda xanım Rəhimova bizə bildirdi ki, uşaqlarımızın müalicəsi Krımda, Qara dəniz sahilindəki Yevpatoriya delfinarisində mümkündür. Qəlbimiz yenidən ümid hissi ilə isindi: deməli, övladlarımızın müalicəsi mümkündür! Amma yol və müalicə üçün lazım olan vəsaitin məbləğini öyrənəndə əl-qolumuz boşaldı. Lakin tam ümidsizliyə qapılmadıq. Çünki Prezidentimizin xanımı Mehriban Əliyevanın xeyirxahlığı, yanımcıllığı haqqında çox eşitdiyimiz üçün ona müraciət etməyi qərara aldıq...
...Artıq bir neçə gündür ki, Yevpatoriyadan qayıtmışıq. Avqustun 8-dən sentyabrın 2-dək Ülviyyə, Rəşad, Aslan, Elmir xoşbəxtliyin zirvəsində oldular. Professor İ.Lısenkonun səyi, delfinlərlə ünsiyyət sayəsində uşaqlarda xeyli irəliləyiş var. Övladlarımıza bu xoşbəxtliyi bəxş etdiyinə, qəlbimizdə onların sağalacağına ümid oyatdığına görə ölkəmizin birinci xanımına - Mehriban Əliyevaya minnətdarıq.
Mütəxəssislərin dediyinə görə, müalicə seansları davam etməlidir. Başqa sözlə, 2005-ci ildə uşaqları yenidən Yevpatoriyaya aparmalıyıq. Yenidən ümidimizi Mehriban xanıma bağlamışıq...
