AZƏRBAYCANIN DÖVLƏT SƏRHƏDLƏRİ ETİBARLI SURƏTDƏ QORUNUR
Dövlət Sərhəd Xidmətinin mətbuat xidmətindən AZƏRTAC-a bildirmişlər ki, bu ilin fevral ayı ərzində dövlət sərhədinin pozulması, qeyri-leqal miqrasiya və bu cür digər təhlükəli hallara qarşı mübarizə sahəsində bir sıra önəmli nəticələr əldə edilmiş, külli miqdarda qaçaqmalın saxlanılmasına nail olunmuşdur.
Ay ərzində sərhəd nəzarəti məntəqələrində vətəndaşlara və nəqliyyat vasitələrinə gömrük orqanları ilə birgə baxış keçirilərkən 2 halda narkotik maddələrin dövlət sərhədindən keçirilməsinin qarşısı alınmış, nəticədə 2 nəfər Gürcüstan, 1 nəfər İran vətəndaşından 121,59 qram heroin və narkotik tərkibli 10 ədəd 2 milliqramlıq ampulalarda “Pramidol” dərman preparatı aşkar olunmuşdur.
Dövlət sərhədindən buraxılış məntəqələrində sərhəd nəzarəti zamanı axtarışda olan 25 nəfər şəxs müəyyənləşdirilərək yaxalanmış, 5 nəfər İran, 3 nəfər Azərbaycan, 2 nəfər Gürcüstan, 1 nəfər Özbəkistan və 1 nəfər Türkiyə vətəndaşı saxta sənədlərlə, 3 nəfər Azərbaycan vətəndaşı, 1 nəfər Rusiya vətəndaşı, 1 nəfər Türkiyə və 1 nəfər Gürcüstan vətəndaşı başqasına məxsus sənədlərlə, müxtəlif ölkələrin 38 vətəndaşı isə müvafiq sənədləri olmadığına görə saxlanılmışlar. Həmçinin vizaların olmamasına görə 2 nəfər Konqo, 2 nəfər Pakistan, 1 nəfər Nigeriya, 1 nəfər Qana, 1 nəfər Almaniya və 1 nəfər ABŞ vətəndaşı saxlanılaraq barələrində müvafiq tədbirlər görülmüşdür.
Sərhədçilərin sayıqlığı nəticəsində ay ərzində 11 halda dövlət sərhədinin pozulmasının qarşısı alınmış, nəticədə 4 nəfər Azərbaycan, 3 nəfər Rusiya və 1 nəfər İran vətəndaşı sərhəd pozucusu qismində tutulmuş, sərhəd rejimi qaydalarını pozduqlarına görə 18 nəfər Azərbaycan və 1 nəfər Rusiya vətəndaşı sərhədçilər tərəfindən saxlanılmışdır.
Fevral ayı ərzində Azərbaycan Respublikasının Gürcüstan ilə dövlət sərhədində daha çox qaçaqmalın qarşısı alınmışdır. Belə ki, Azərbaycandan Gürcüstana 9 ton 35 litr dizel yanacağının, 100 kiloqram əlvan metalın, 46 kiloqram nərə balığının, Gürcüstandan Azərbaycana 6 ton 8 litr spirtin, 2 ton almanın, 2061 ədəd araq etiketinin, 20 ədəd elektrik generatorunun, 19 adda 420 ədəd peyk teleqəbuledicisi üçün ehtiyat hissələrin və digər müxtəlif çeşidli məişət mallarının qeyri-qanuni keçirilməsinin qarşısı alınmış, sahibsiz 828,5 litr dizel yanacağı və 46 kiloqram əlvan metal aşkar olunaraq götürülmüşdür.
Rusiyadan Azərbaycana 5 kiloqram qara kürünün, 1395 qutu müxtəlif markalı siqaretin, 1 ədəd “MT-512” markalı pnevmatik tüfəngin, külli miqdarda müxtəlif növ avtomaşın, motosiklet və tokar dəzgahı üçün ehtiyat hissələrinin, məişət malların və kosmetik vasitələrin qanunsuz keçirilməsinin qarşısı alınmışdır.
İran İslam Respublikası ilə dövlət sərhədində Azərbaycandan İrana külli miqdarda müxtəlif çeşidli məişət və kosmetik malların, İrandan Azərbaycana isə ölkəmizə gətirilməsi qadağan olunmuş müxtəlif dərman preparatlarının dövlət sərhədindən qanunsuz keçirilməsinə yol verilməmişdir.
Dəniz sərhədlərinin mühafizəsi zamanı 2005-ci il fevralın 21-də Xəzər dənizində Azərbaycan Respublikasının ərazi sularına icazəsiz daxil olmaqla qadağan edilmiş ərazilərdə lövbər salmış Rusiya Federasiyasının Mahaçqala limanına aid “Terek” və “Tülen-4” adlı balıqçı gəmiləri sərhəd rejimi qaydalarını pozduğuna görə sərhəd gözətçi gəmilər dəstəsi tərəfindən saxlanılmışdır. Sərhəd gözətçi gəmisinin heyəti tərəfindən keçirilmiş baxış zamanı gəmilərdə həmçinin, gəmi jurnalının olmadığı müəyyənləşdirilmişdir. Sərhəd rejimi qaydalarını pozmuş hər iki gəmi İnzibati xətalar məcəlləsinin 335-ci maddəsinə əsasən müvafiq tədbirlər görülməsi üçün məhkəməyə verilmişdir.
Bölmənin digər xəbərləri
