Azərbaycanın fəaliyyəti və göstərdiyi səylər Qoşulmama Hərəkatına beynəlxalq nüfuz qazandırıb - Deputat
Bakı, 4 mart, AZƏRTAC
Azərbaycan Prezidentinin Qoşulmama Hərəkatına sədrliyi ilə bu təsisat sürətli şəkildə inkişaf edib. Azərbaycanın fəaliyyəti və göstərdiyi səylər ona beynəlxalq nüfuz qazandırıb. Bu gün göstərilən səylər və görülən işlər ölkəmizin dünya miqyasında aparıcı dövlət olmasından irəli gəlir. Hərəkatın Sədri, Prezident İlham Əliyevin təşəbbüsü ilə görülən işlər dünyanın beyin mərkəzləri və supergüc dövlətləri tərəfindən də rəğbətlə qarşılanır. Əminliklə deyə bilərik ki, Qoşulmama Hərəkatı Azərbaycanın rəhbərliyi ilə yeni bir mərhələyə qədəm qoyub. Prezident İlham Əliyev bu il martın 2-də Bakıda keçirilən Qoşulmama Hərəkatının COVID-19-a qarşı mübarizə üzrə Təmas Qrupunun Zirvə görüşündə çıxışında bir çox mühüm məsələlərə toxunub. Bu çıxış dünya əhəmiyyətli məsələləri əhatə edirdi. Prezidentin çıxışı ona Azərbaycan Prezidenti kimi bəslənən rəğbət, ölkəmizin düzgün mövqeyi, bir sıra ölkə əhəmiyyətli məsələlərə dair fikirlərin də ifadəsi baxımından kifayət qədər vacib və əhəmiyyətlidir.
Bu sözləri AZƏRTAC-a açıqlamasında Milli Məclisin deputatı, YAP İdarə Heyətinin üzvü Şahin İsmayılov deyib.
Azərbaycanın Qoşulmama Hərəkatının Sədri olaraq ali məqsədlərə xidmət etməklə ədaləti və beynəlxalq hüququ müdafiə etdiyini vurğulayan Şahin İsmayılov deyib: “Hərəkatın koronavirusla mübarizə sahəsində gördüyü böyük işlərin coğrafiyası kifayət qədər genişdir. Qoşulmama Hərəkatının dövlət və hökumət başçıları səviyyəsində onlayn Zirvə toplantısının keçirilməsi, həmin tədbirdə mühüm qərarların qəbulu və COVID-19-la mübarizəyə ciddi töhfələrin verilməsi, BMT Baş Assambleyasının liderlər səviyyəsində xüsusi sessiyasının çağırılması, BMT-nin İnsan Hüquqları Şurasında və Baş Assambleyasında “peyvənd millətçiliyi”nə qarşı qətnamələrin qəbul edilməsi kimi faktlar buna bariz nümunələrdir. Bütün bunların həyata keçirilməsində Azərbaycan Prezidenti Qoşulmama Hərəkatının Sədri kimi böyük əzm göstərib”.
Deputatın sözlərinə görə, Prezident İlham Əliyevin BMT Təhlükəsizlik Şurasının fəaliyyətinə toxunması Təhlükəsizlik Şurasının üzvlüyü ilə bağlı ədalətli qərarların qəbul edilməsinə çağırışdır. Bir daimi yerin Qoşulmama Hərəkatına verilməsi, Afrikaya da daimi yerlərin ayrılmasının vacibliyinə dair fikirlər qlobal məsələlərin həlli üçün irəli sürülən zəruri təklifdir. Bundan başqa, Azərbaycanın BMT-nin COVID-19-dan sonra Qlobal Bərpa üzrə Yüksək Səviyyəli Panelinin yaradılması təklifi ilə çıxış etməsi onun həm Qoşulmama Hərəkatının sədri kimi, həm də aparıcı dövlət kimi beynəlxalq münasibətlərdə xüsusi rol oynadığını göstərir.
“Şuşa Razılaşması əsasında yaradılmış Qoşulmama Hərəkatının Gənclər Təşkilatının Hərəkatın işinə böyük töhfə verəcəyi şübhəsizdir. Bu qurumun böyük uğurlara imza atacağına inam yaradan amillərdən biri də Təşkilatın daimi katibliyinin Bakıda yerləşməsidir. Çünki Azərbaycanda dünya üçün nümunəvi modelə çevrilən gənclər siyasəti aparılır. Bu, təşkilatın işinə böyük imkanlar yaradır”, - deyə Şahin İsmayılov diqqətə çatdırıb.
Bölmənin digər xəbərləri
