Azərbaycanın Florensiya ilə iqtisadi əlaqələrinin yeni istiqamətləri müzakirə olunub
Səfər çərçivəsində Florensiyanın meri Dario Nardella ilə görüşən səfir Azərbaycan-İtaliya münasibətlərinin hazırkı vəziyyəti, Prezident İlham Əliyevin bu ilin iyulunda İtaliyaya səfərinin nəticələri və ölkələrimiz arasında əlaqələrin strateji tərəfdaşlıq səviyyəsinə qədəm qoyması barədə məlumat verib. İtaliyanın uzun illərdən bəri Azərbaycanın mühüm ticarət tərəfdaşı olduğunu deyən V.Sadıqov işgüzar missiyaların və mədəni tədbirlərin artan dinamikasından məmnunluğunu ifadə edib.
Florensiyanın sənaye sahəsində əldə etdiyi uğurlardan danışan D.Nardella bildirib ki, şəhər dəb və geyim, aqrar-sənaye kompleksi, kimya, mebel və digər sektorlarda uğurlar qazanıb. Mer İtaliya hökumətinin “Trans-Adriatik” (TAP) boru kəməri layihəsi ilə bağlı qərarının vacibliyini vurğulayıb. Diqqətə çatdırıb ki, Azərbaycan ilə həm ikitərəfli, həm də beynəlxalq səviyyədə iqtisadi əlaqələrin, enerji əməkdaşlığının genişləndirilməsi üçün geniş imkanlar mövcuddur.
V.Sadıqov səfirliyin Florensiya Ticarət və Sənaye Palatasının beynəlxalq əlaqələr üzrə qurumu olan “Promo Firenze” ilə birgə təşkil etdiyi toplantıda da iştirak edib. Azərbaycana maraq göstərən xeyli iş adamının qatıldığı toplantını giriş nitqi ilə açan “Promo Firenze”nin prezidenti Klaudio Bianki Florensiyanın işgüzar dairələrinin beynəlxalq əməkdaşlıqda maraqlı olduğunu bildirib. Qeyd edilib ki, özünəməxsus kiçik və orta müəssisələr modelinə malik olan bu şəhərin iş adamları Azərbaycan bazarına böyük maraq göstərirlər.
K.Bianki Toskana regionunun kənd təsərrüfatı, xüsusən zeytunçuluq, şərabçılıq və yüngül sənaye sahələrində, habelə bir sıra texnologiyalar və dizayn sektorlarında zəngin potensiala malik olduğunu və bu istiqamətlərdə əməkdaşlıq imkanlarını diqqətə çatdırıb.
Səfir V.Sadıqov son illər ölkəmizdə müşahidə olunan iqtisadi inkişaf prosesi, Azərbaycan-İtaliya iqtisadi münasibətləri, potensial əməkdaşlıq sahələri və birgə həyata keçirilən layihələr barədə ətraflı məlumat verib. O, İtaliyanın əsas iqtisadi potensialının regionlarda cəmləşdiyini, bu baxımdan Azərbaycan hökumətinin bölgələrlə münasibətlərə xüsusi diqqət yetirdiyini qeyd edib. Bildirib ki, regionlarımız arasında bir sıra sahələrdə əməkdaşlıq əlaqələrinin qurulması üçün geniş imkanlar mövcuddur. Qeyri-neft sektorunun inkişafı strategiyası kontekstində toxuculuq, gön-dəri və ayaqqabı sənayesi müəssisələrinin yaradılması Azərbaycan üçün vacib istiqamətlərdən biridir. Toskananın müvafiq sahələrdə əldə etdiyi nailiyyətləri nəzərə alaraq, yerli sahibkarlar Azərbaycana investisiya yatırmaq imkanlarını araşdıra bilərlər.
Sonda yerli iş adamlarının sualları cavablandırılıb.
Maqsud Dadaşov
AZƏRTAC-ın xüsusi müxbiri
Florensiya
Bölmənin digər xəbərləri
