Azərbaycanın səfiri Misir müftisi ilə görüşüb
Bakı, 7 sentyabr, AZƏRTAC
Azərbaycanın Misirdəki səfiri Elxan Poluxov Misir müftisi, Dünya Fətva Evləri və Qurumları Baş Katibliyinin rəhbəri Şövqi İbrahim Əllam ilə görüşüb.
Səfirlikdən AZƏRTAC-a bildiriblər ki, görüş zamanı E.Poluxov iki ölkə arasında əlaqələrin inkişafından söhbət açıb, 2023-cü ildə yüksək səviyyədə qarşılıqlı səfərlərin həyata keçirildiyini xatırladıb, xüsusən cari ilin yanvarında Misir Prezidenti Əbdülfəttah əs-Sisinin Azərbaycana səfəri, parlament rəhbərlərini görüşlərinin ölkələrimiz arasında əlaqələrin daha da dərinləşməsi üçün yeni imkanlar yaratdığını vurğulayıb. O əlavə edib ki, iki dost ölkənin siyasi rəhbərliyi bütün sahələr üzrə əməkdaşlığın möhkəmləndirilməsi istiqamətində əzmkarlıq nümayiş etdirib.
Görüş zamanı Misir müftisi Dünya Fətva Evlərinin fəaliyyəti haqqında geniş məlumat verib. O diqqətə çatdırıb ki, 2014-cü ildə yaradılmış bu qurumun əsas prinsipləri mötədil İslam yanaşmaları əsasında dünya müsəlmanları arasında ekstremizm meyillərinin həlli sahəsində tövsiyələr vermək və qlobal islamofobiya problemləri ilə mübarizə aparmaq üçün fəaliyyət proqramları hazırlamaqdır. Müfti bildirib ki, adıçəkilən qurum tərəfindən indiyədək monitorinq və araşdırmaları əhatə edən 700-ə yaxın hesabat dərc edilib, müsəlman icmaları, xüsusən Qərb ölkələrində olan dini mərkəzlərlə ünsiyyət qurmaq üçün yaradılmış “Fətva Pro” proqramı tətbiq olunub. Ş.Əllam Fətva Evlərində müftilərin yetişdirilməsi və ixtisasartırma üzrə xüsusi şöbənin fəaliyyət göstərdiyini qeyd edib, hüquqi mətnləri rasional və maarifləndirici şəkildə başa düşməyə qadir olan yeni nəsil din xadimlərinin hazırlanmasında həmin strukturun mühüm rol oynadığını vurğulayıb.
Ermənistan-Azərbaycan münaqişəsinə toxunan səfir, 30 ildən artıq müddətdə Ermənistanın Azərbaycan ərazisinin 20 faizini işğal altında saxladığını, təcavüzkar ölkənin həmin dövrdə azərbaycanlı kimliyini yer üzündən silmək üçün İslam irsinə aid olan hər şeyi sistemli şəkildə və qəsdən dağıtdığını, hətta məscidləri, ziyarətgahları belə murdarlayaraq tövlələrə çevirdiyini qeyd edib. O, müvafiq materialları həmsöhbətinə təqdim edib. E.Poluxov, həmçinin işğaldan azad edilmiş torpaqlarda aparılan quruculuq işlərindən bəhs edib, dağıdılmış məscid və ziyarətgahların təmiri, yenidən inşa edilməsinin bu prosesdə əsas yer tutduğunu bildirib.
Bölmənin digər xəbərləri
