QAN YADDAŞI
AZƏRBAYCANIN TÜRKİYƏDƏKİ SƏFİRLİYİ 20 YANVAR FACİƏSİNİN İLDÖNÜMÜ İLƏ BAĞLI TƏDBİRLƏR KEÇİRƏCƏKDİR
Ankara, 18 yanvar (AZƏRTAC). Azərbaycanın Türkiyədəki səfirliyi 20 Yanvar faciəsinin 20-ci ildönümü ilə əlaqədar silsilə tədbirlər keçirəcəkdir.
Yanvarın 20-də faciə ilə bağlı TRT-nin xəbərlər proqramında məlumatlar veriləcək, qanlı hadisəni əks etdirən sənədli filmlər göstəriləcəkdir. Həmçinin, səfirlik “TRT Avaz” kanalının “Yenigün” səhər proqramında iştirak edəcəkdir. Türkiyənin nüfuzlu qəzetlərində də müvafiq məlumatların dərci nəzərdə tutulur.
Türkiyə Xarici İşlər Nazirliyinə və Ankarada akkreditə olunmuş səfirliklərə ingilis dilində faciə ilə bağlı faktların əks olunduğu mətbuat açıqçaları göndəriləcəkdir.
Ankarada və Türkiyənin digər bölgələrində təhsil alan tələbələrimiz tərəfindən 20 Yanvar faciəsinə həsr olunmuş müvafiq tədbirlər keçiriləcəkdir.
Türkiyə paytaxtının məscidlərində 20 Yanvar şəhidlərinə xütbələr oxunacaqdır.
Oqtay Bayramov
AZƏRTAC-ın xüsusi müxbiri
Ankara