Azərbaycanlı dirijor Murtuza Bülbül Sankt-Peterburqda debüt edəcək
Bakı, 25 aprel, AZƏRTAC
Azərbaycanın tanınmış musiqi sülaləsinin nümayəndəsi, gənc dirijor Murtuza Bülbül Sankt-Peterburqdakı Dmitri Şostakoviç adına Filarmoniyanın Böyük zalında debüt edəcək.
AZƏRTAC xəbər verir ki, dirijor Murtuza Bülbülün rəhbərliyi ilə musiqiçilər Pyotr Çaykovskinin “Qu gölü” baletindən süitanı, Edvard Qriqin “Peer Gynt” dramının musiqisindən süitanı, o cümlədən məşhur "Dağ kralının mağarasında" nömrəsini və Lüdviq van Bethovenin, Frans Lisztin, Modest Musorqskinin bəstələrini ifa edəcəklər.
Qeyd edək ki, Murtuza Bülbül görkəmli opera müğənnisi, Xalq artisti, professor Bülbülün nəvəsi, bəstəkar və müğənni, Azərbaycanın Xalq artisti, professor Polad Bülbüloğlunun oğludur. O, Rusiya Milli Orkestri, Rusiya Dövlət Kinematoqrafiya Orkestri, Novosibirsk Akademik Simfonik Orkestri, Moskva Konservatoriyasının Orkestri kimi ansambllarla əməkdaşlıq edir.
Bölmənin digər xəbərləri
