“AZƏRBAYCANTELEFİLM” ŞAİR VƏ DRAMATURQ MİRZƏ MƏHƏMMƏD AXUNDZADƏ HAQQINDA FİLMİN ÇƏKİLİŞİNİ BAŞA ÇATDIRMIŞDIR
Ssenari müəllifi və quruluşçu rejissor Nazim Rza İsrafiloğlu AZƏRTAC-ın müxbirinə bildirmişdir ki, film Azərbaycan Xalq Cümhuriyyətinin xadimlərindən biri, şair və dramaturq Mirzə Məhəmməd Axundzadənin (Axundovun) həyat və fəaliyyətinə həsr olunmuşdur.
1 saat 15 dəqiqəlik filmdə XIX əsrin sonlarında və XX əsrin əvvəllərində baş verən hadisələr, o dövrün bir çox görkəmli şəxsiyyətlərindən – yazıçı Cəlil Məmmədquluzadə, şair Əli Nəzmi, Nəriman Nərimanov, Nəsib bəy Yusifbəyli və başqalarından da söhbət açılır. Çəkilişlər Gəncədə, Bakıda və filmin qəhrəmanının yeganə övladı – yaşı 80-i ötmüş Şəfiqə Axundovanın yaşadığı Şamaxıda, habelə AMEA-nın Füzuli adına Əlyazmalar İnstitutunda Nəsib bəy Yusifbəylinin vaxtilə yaşadığı və M.M.Axundzadənin tez-tez qonaq olduğu evdə, digər yerlərdə aparılmışdır.
Filmdə Azərbaycan Dövlət Tarix Arxivinin, Azərbaycan Dövlət Film Fondunun və Milli Təhlükəsizlik Nazirliyinin arxiv materiallarından da istifadə olunmuşdur.
M.M.Axundzadə Azərbaycanda nizamişünaslığın və teatrşünaslığın banisi və Bakı Dövlət Universitetinin yaradılmasının təşəbbüskarlarından biri olmuşdur, bu da filmdə əsaslı faktlarla öz əksini tapmışdır.
Nazim Rza İsrafiloğlu demişdir ki, Mirzə Məhəmməd Axundzadənin 2005-ci ildə keçiriləcək 130 illik yubileyi münasibətilə onun həyat və yaradıcılığı barədə kitab buraxmaq fikrindədir.
Bölmənin digər xəbərləri
