“Azəripək”: Bu il respublika üzrə 260 ton yaş barama istehsal edilməsi proqnozlaşdırılır
Qax, 7 may, AZƏRTAC
Barama mövsümünün başlaması ilə əlaqədar bu il respublikanın 40 rayonunun kümçülərinə 6491 qutu ipəkqurdunun paylanması nəzərdə tutulur. Yerlərdə kümçülərə paylanılan tut ipəkqurdunun yemlənməsi düzgün təşkil olunarsa, bu il respublika üzrə yaş barama istehsalının 260 tona çatdırılması mümkündür.
Bu barədə AZƏRTAC-ın bölgə müxbirinə açıqlamasında Qax Damazlıq İpəkçilik Stansiyasında kümçülərə ipəkqurdu toxumunun paylanması prosesində iştirak edən “Azəripək” ASC-nin xidmət rəisi Teymur Musayev məlumat verib.
Qurumun rəsmisi bildirib ki, bu il ilk dəfə olaraq işğaldan azad olunmuş rayonlarımızdan olan Xocalıda da 130 qutu ipəkqurdunun yemlənməsi həyata keçiriləcək.
“Ötən il Xocalıda 85 hektar ərazidə yeni tut plantasiyası salınıb və həmin tut bağları bu ildən məhsul verəcək. Növbəti illərdə həmin rayonda əlavə olaraq 150 hektarda tut plantasiyasının salınması da nəzərdə tutulur. Müəssisənin birnövbəli iş rejimində fasiləsiz işinin təmin olunması üçün minimum 400 ton yaş barama lazımdır. Bu il üçün proqnozlaşdırılan 260 ton yaş barama ilə isə müəssisənin yalnız 6-7 ay fəaliyyət göstərməsi mümkündür”,- deyə xidmət rəisi əlavə edib.
Teymur Musayevin sözlərinə görə, ötən il olduğu kimi, builki mövsümdə də istehsal olunan yaş barama ASC tərəfindən kümçülərdən 5 manata təhvil alınacaq, dövlət isə hər kiloqram yaş baramaya görə kümçülərə 6 manat subsidiya ödəyəcək.
Müxbir – Mustafa Dadaşov
Bölmənin digər xəbərləri
