“Azərpoçt” beynəlxalq poçt göndərişlərinin qəbulunda yenilik tətbiq edib
Bakı, 15 may, AZƏRTAC
Nəqliyyat, Rabitə və Yüksək Texnologiyalar Nazirliyinin tabeliyində fəaliyyət göstərən “Azərpoçt” MMC tərəfindən “Poçta Rossii” ilə aparılan danışıqlar nəticəsində yerüstü nəqliyyatla daşınan beynəlxalq poçt göndərişlərinin qəbulu həyata keçirilib.
Nazirlikdən AZƏRTAC-a bildirilib ki, Rusiya, Belarus və Ukraynadan Azərbaycana daxil olan poçt göndərişləri “Qırmızı Körpü” sərhəd-keçid məntəqəsindən ölkəmizə daxil olub. Həmçinin Ukraynadan Qırğızıstana göndərilən tranzit poçt göndərişlərinin daşınması təmin edilib. Hazırda Azərbaycana daxil olan beynəlxalq poçt göndərişlərinin təyinat məntəqələrinə çatdırılması həyata keçirilir.
Ümumdünya Səhiyyə Təşkilatı tərəfindən qlobal pandemiya hesab olunan koronavirus infeksiyasının yayılmasının qarşısının alınması tədbirləri çərçivəsində bir sıra ölkələr arasında hava nəqliyyatı əlaqələri məhdudlaşdırılıb və mövcud reyslər təxirə salınıb. Bu baxımdan yerüstü nəqliyyat vasitəsilə poçt göndərişlərinin mübadiləsi mühüm əhəmiyyət daşıdığı üçün gələcəkdə bu istiqamətdə danışıqların digər ölkələrlə də aparılması nəzərdə tutulur.
Xatırladaq ki, “Azərpoçt” MMC tərəfindən yük aviaşirkəti ilə aparılan danışıqların nəticəsi olaraq 34 ölkəyə beynəlxalq poçt daşımaları həyata keçirilir.
Bölmənin digər xəbərləri
