“AZMIŞ” VƏ “İTALİYALI” FİLMLƏRİ NÜMAYİŞ ETDİRİLMİŞDİR
Film göstərilməzdən əvvəl ssenari müəllifləri və rejissorlar Qulandom Muxabbatova və Daler Rəhmətov lentə aldıqları ekran əsərinin çəkiliş prosesi, aktyor seçimi barədə tamaşaçılara məlumat vermişlər.
Film Tacikistanda çox aktual bir prosesdən - kütləvi miqrasiyadan bəhs edir. Ailənin başçıları məcburiyyət qarşısında iş axtarmaq üçün, çörək dalınca doğma yurd-yuvalarını tərk edərək, başqa yerlərə üz tuturlar. Nəticədə, ata-anasız böyüyən uşaqlar valideynlərinin qayıtması arzusu ilə yaşayırlar. Bu vəziyyət tamaşaçıları da həyəcanlandırır.
Kinosevərlər də zalı uşaqların arzusunun çin olması ümidi ilə tərk edirlər. Ekran əsərində rollara Alidjon Şokirov, Fotima Qulamova, Abduxolik Sufiyev, Bəxtiyar Rəhimov, Sayfiddin İdiyev və Şaraf Sadıkov çəkilmişlər.
Filmin quruluşçu operatoru Zikriyyə İsroilov, rəssamı Abduraşid Cəlilov, bəstəkarı İkbol Zavkibekovdur.
Həmin gün tamaşaçılara Rusiyanın “Lenfilm” kinostudiyasında rejissor Andrey Kravçukun 2005-ci ildə lentə aldığı “İtaliyalı” bədii filmi də göstərilmişdir.
İtaliyalı ailənin uşaq evindən övladlığa götürdüyü Vanyanın başına gələn əhvalatlardan söz açılan filmdə rollara Kolya Spiridinov, Mariya Kuznetsova, Yuri İtsikov və Nikolay Peytov çəkilmişlər.
Filmin ssenari müəllifi Andrey Pomanov, quruluşçu operatoru Aleksandr Burov, rəssamı Vladimir Svetozarov, bəstəkarı Aleksandr Klayfeldir.
Hər iki film Bakı kinosevərləri tərəfindən maraqla qarşılanmışdır.
Bölmənin digər xəbərləri
