“Azneft” İB ekoloji durumun yaxşılaşdırılması istiqamətində tədbirlər görür
Bakı, 12 may, AZƏRTAC
“Azneft” İstehsalat Birliyi ekoloji durumun yaxşılaşdırılması istiqamətində tədbirlər görür.
SOCAR-ın mətbuat xidmətindən AZƏRTAC-a bildirilib ki, həyata keçirilən ekoloji siyasətə uyğun olaraq neftlə çirklənmiş torpaqlar rekultivasiya olunur, idarə və müəssisələrin əraziləri istehsalat tullantılarından təmizlənir, yaşıllaşdırma işləri görülür. Cari ilin yanvar-aprel aylarında SOCAR-ın “Azneft” İstehsalat Birliyində bir çox ekoloji layihələr həyata keçirilib, lay sularının qapalı sistemdə utilizasiyası təmin olunub, çirklənmiş torpaqlar abadlaşdırılıb, mədən ərazilərində yaşıllıqlar salınıb. Bu ilin fevral ayından start götürən növbəti ağacəkmə mövsümündə birliyin demək olar ki, bütün idarə və müəssisələri yaxından iştirak edib.
Keçirilmiş genişmiqyaslı iməciliklər zamanı yaşıllıq zolaqları salınıb, mövcud yaşıllıqlara aqrotexniki qulluq göstərilib, ərazilərdə 8700-ə yaxın iqlimə uyğun olan müxtəlif növ ağac və gül kolları əkilib.
H.Z.Tağıyev adına NQÇİ-də istehsalat fəaliyyəti nəticəsində atmosfer, torpaq və su hövzələrinin çirklənmədən mühafizəsinə nəzarət olunub, Qala sahəsində neftlə çirklənmiş 0,6 hektarlıq quyuətrafı ərazi təmizlənib, sahəyə 1580 kubmetr torpaq daşınaraq abadlaşdırılıb. Qala və Köhnə Qala sahələrində əmələ gələn 167 min kubmetrlik lay suyu 10 ədəd uducu quyu vasitəsilə utilizasiya olunub.
Bölmənin digər xəbərləri
