AzTU rektorunun rəhbərlik etdiyi nümayəndə heyəti İndoneziya universitetlərində olub
Bakı, 21 may, AZƏRTAC
Azərbaycan Texniki Universitetinin (AzTU) rektoru professor Vilayət Vəliyevin rəhbərlik etdiyi nümayəndə heyəti İndoneziyaya səfər edib. Nümayəndə heyətində AzTU-nun elm və innovasiyalar üzrə prorektoru professor Sübhan Namazov və Tədqiqat və inkişaf departamentinin direktoru Bəxtiyar Bədəlov təmsil olunub.
Universitetdən AZƏRTAC-a bildirilib ki, səfərin əsas məqsədi AzTU ilə İndoneziyanın aparıcı ali təhsil müəssisələri arasında elmi-tədqiqat, tədris və innovasiya sahələrində qarşılıqlı əməkdaşlıq əlaqələrinin qurulması və genişləndirilməsi, eləcə də bu istiqamətdə anlaşma memorandumlarının imzalanması olub.
Səfər çərçivəsində nümayəndə heyəti İndoneziya Universiteti, Cakarta Dövlət Universiteti, Atma Jaya Katolik Universiteti və BINUS Universitetinə baş çəkib. Görüşlər zamanı universitetlər arasında elmi və akademik əməkdaşlıq imkanları geniş müzakirə olunub. Müzakirələr zamanı hər bir universitetin prioritet fəaliyyət istiqamətləri nəzərə alınaraq konkret əməkdaşlıq sahələri müəyyənləşdirilib və gələcəkdə birgə layihələrin həyata keçirilməsi perspektivləri barədə fikir mübadiləsi aparılıb.
İndoneziya Universitetində keçirilən görüş zamanı professor Vilayət Vəliyev AzTU-nun beynəlxalq tərəfdaşlıqlar çərçivəsində ortaq elmi layihələr, tələbə və müəllim mübadiləsi, eləcə də birgə elmi konfrans və seminarların təşkili kimi sahələrə xüsusi önəm verdiyini vurğulayıb. İndoneziya Universitetinin rektoru professor Heri Hermansyah və prorektorlar da bu təşəbbüsləri müsbət qiymətləndirərək mühəndislik və informasiya texnologiyaları sahəsində əməkdaşlıqda maraqlı olduqlarını bildiriblər. Görüşün sonunda tərəflər arasında qarşılıqlı anlaşma və əməkdaşlığı möhkəmləndirmək məqsədilə anlaşma memorandumu imzalanıb.
Cakarta Dövlət Universitetində keçirilən görüşdə birgə tədris proqramlarının reallaşdırılması, mühəndislik ixtisasları üzrə tədris texnologiyalarının təkmilləşdirilməsi, ortaq tədqiqatların təşkili və təcrübə proqramlarının hazırlanması məsələləri ətraflı müzakirə olunub. Görüşdə AzTU-nun rektoru professor Vilayət Vəliyev və Cakarta Dövlət Universitetinin rektoru professor Komaruddin M.Si iştirak ediblər. Tərəflər bu istiqamətdə əməkdaşlıq etmək barədə razılığa gəliblər və əlaqələr anlaşma memorandumu ilə rəsmiləşdirilib.
Səfər çərçivəsində nümayəndə heyəti İndoneziyanın iki aparıcı özəl ali təhsil müəssisəsi olan Atma Jaya Katolik Universiteti və BINUS Universitetində də olub. Atma Jaya Katolik Universitetində tədris və innovasiya potensialı ilə yaxından tanışlıq olub, xüsusilə startapyönümlü tədqiqatlar və birgə layihələr barədə geniş fikir mübadiləsi aparılıb.
BINUS Universitetində isə süni intellekt, rəqəmsal transformasiya və elmi-tədqiqatların kommersiyalaşdırılması sahəsində təcrübə öyrənilib. Tərəflər BINUS-un qabaqcıl tədqiqat platformasının AzTU-da tətbiqi imkanlarını nəzərdən keçirərək qarşılıqlı maraq doğuran sahələr üzrə əməkdaşlıq istiqamətlərini müəyyənləşdiriblər. Görüşün sonunda universitetlər arasında anlaşma memorandumu imzalanıb.
Səfər zamanı rektor professor Vilayət Vəliyev AzTU-nun beynəlxalq elmi-tədqiqat, tədris və innovasiya sahəsində tərəfdaşlıq şəbəkəsinin genişləndirilməsi və dünya elm məkanına inteqrasiya olunması istiqamətində fəaliyyətlərinin artırılmasının, xüsusilə Asiya ölkələri ilə əməkdaşlığın AzTU-nun perspektiv strateji planında mühüm yer tutduğunu vurğulayıb. O, bu əməkdaşlıqların universitet üçün yeni imkanlar yaradacağına əminliyini ifadə edib.
Bölmənin digər xəbərləri
