“BAHAR ÇALARLARI” SƏRGİSİ
Martın 28-də Səttar Bəhlulzadə adına Rəsm Qalareyasında Azərbaycan Dövlət Rəssamlıq Akademiyası tələbələrinin kurs və diplom işlərindən ibarət “Bahar çalarları” mövzusunda sərgisi açılmışdır.
Novruz bayramı ilə bağlı tədbirlər çərçivəsində Bakı Şəhər İcra Hakimiyyətinin təşəbbüsü ilə təşkil olunmuş səgidə 120-yə yaxın tələbənin rəngkarlıq, qrafika, heykəltaraşlıq, dekorativ tətbiqi sənət, teatr-dekor rəngkarlığı, dizayn, plakat və başqa janrlarda 130-dan çox əsəri nümayiş etdirilir.
Akademiyanın rektoru, xalq rəssamı, dövlət mükafatı laureatı Ömər Eldarov sərgini açaraq, dövlətimizin başçısı Heydər Əliyevin fərmanı ilə yaradılmış bu təhsil ocağının əhəmiyyətindən, burada görülən işlərdən danışdı. Bildirdi ki, akademiyada 570-dən artıq tələbə 16 ixtisas üzrə təhsil alır. Burada 150 nəfərə yaxın müəllim çalışır.
Təhsilin keyfiyyətini yüksəltmək və Prezidentimizin etimadını doğrultmaq üçün akademiyada bütün şəraitin olduğunu vurğulayan natiq tələbə- müəllim münasibətlərində də ən müasir metodlardan istifadə edildiyini dedi.
Ömər Eldarov Akademiyanın tarixində belə sərginin ilk dəfə təşkil olunması və burada təhsil alan tələbələrin əsərlərinin geniş ictimaiyyətə təntənəli şəkildə çatdırılması üçün yaradılan şəraitə görə Bakı Şəhər İcra hakimiyyətinə dərin minnətdarlığını bildirdi.
“Hər bir xalq bir çox xüsusiyyətləri ilə tanınır, seçilir və dünya xalqları arasında fərqlənir. Bu xüsusiyyətlərdən ən yüksəyi, ən böyüyü mədəniyyətdir. Yüksək mədəniyyətə malik olan hər bir xalq irəli gedəcəkdir, yaşayacaqdır və inkişaf edəcəkdir”. Çıxışına Respublikamızın prezidenti Heydər Əliyevin bu sözləri ilə başlayan Hacıbala Abutalıbov əmin olduğunu bildirdi ki, Azərbaycan Dövlət Rəssamlıq Akademiyasının məzunları ölkəmizin mədəniyyətini gələcəkdə daha yüksəklərə qaldıracaqlar.
Bakı Şəhər İcra Hakimiyyətinin başçısı sərginin açılması münasibətilə akademiyanın müəllim- professor heyətini, tələbələrini təbrik etdi, onlara yaradıcılıq uğurları arzuladı.
Respublika Rəssamlar İttifaqı İdarə Heyətinin sədri Fərhad Xəlilov, xalq rəssamı Böyükağa Mirzəzadə, Təhsil nazirinin müavini Elmar Qasımov, Ukraynanın ölkəmizdəki səfiri Boris Aleksenko sərginin açılışında çıxış edərək, gənc rəssamlarımızın layiqli varis kimi yetişmələrində belə tədbirlərin əhəmiyyətindən danışdılar, mədəniyyətimizitn inkişafında müəllim və tələbələrə uğurlar arzuladılar.
Ömər Eldarov tələbələrin toxuduqları xalçanı xatirə olaraq Hacıbala Abutalıbova təqdim etdi.
Bölmənin digər xəbərləri
