“Bakı Gəmiqayırma Zavodu”nun istehsal həcmi 3 dəfədən çox artıb
Bakı, 5 sentyabr, AZƏRTAC
İqtisadi Zonaların İnkişafı Agentliyinin (İZİA) idarəçiliyində olan Qaradağ Sənaye Parkının rezidenti “Bakı Gəmiqayırma Zavodu” MMC-nin istehsal həcmi artıb.
İZİA-dan AZƏRTAC-a bildirilib ki, 2023-cü ilin I yarısında zavodun istehsal həcmi 8,3 milyon manat təşkil etmişdirsə, bu ilin eyni dövründə isə ötən ilin analoji dövrü ilə müqayisədə istehsal həcmi 3 dəfədən çox artmaqla 25 milyon manata çatıb. Hazırda zavodda 722 nəfər daimi işlə təmin edilib.
“Bakı Gəmiqayırma Zavodu” MMC Qaradağ Sənaye Parkında tətbiq edilmiş idxal ƏDV və gömrük güzəştləri nəticəsində 2015-ci ildən indiyədək 73 milyon manatdan çox vəsaitə qənaət edib. Müəssisə müasir tələblərə cavab verən müxtəlif təyinatlı gəmilərin tikintisi, təmiri və ümumilikdə dəniz və mühəndislik işlərinin yerinə yetirilməsi istiqamətində fəaliyyət göstərir.
Bölmənin digər xəbərləri
