Bakı Slavyan Universitetində elmi konfrans: Nə qədər ki söz mülkü var...
Bakı, 4 may, AZƏRTAC
Mayın 4-də Bakı Slavyan Universitetinin (BSU) Beynəlxalq münasibətlər, regionşünaslıq və jurnalistika fakültəsinin Azərbaycan multikulturalizmi və ölkəşünaslıq kafedrasının təşkilatçılığı ilə dahi Azərbaycan şairi və mütəfəkkiri Nizami Gəncəviyə həsr olunan “Nə qədər ki söz mülkü var...” adlı onlayn elmi konfrans keçirilib.
BSU-nun Mətbuat və informasiya şöbəsindən AZƏRTAC-a bildirilib ki, elmi konfrans Prezident İlham Əliyevin 2021-ci ilin Azərbaycan Respublikasında “Nizami Gəncəvi İli” elan edilməsi haqqında Sərəncamına uyğun olaraq təşkil edilib.
Tədbiri açan BSU-nun rektoru, professor Nurlana Əliyeva bildirib ki, elmi konfrans əlamətdar bir dövrə təsadüf edir. May ayının 10-da xalqımızın dahi oğlu, müasir müstəqil Azərbaycan dövlətinin qurucusu, ümummilli liderimiz Heydər Əliyevin anadan olmasının 98-ci ildönümü tamam olur. Ulu öndər Heydər Əliyev xalqımızın, Vətənimiz Azərbaycanın həyatında, taleyində həlledici rol oynamış görkəmli dövlət xadimidir. Bugünkü müstəqil, hərtərəfli inkişaf edən, dünya birliyində layiqli yeri və mövqeyi olan Azərbaycan Respublikası ulu öndər Heydər Əliyevin şah əsəridir. Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin Ulu Öndərimizin müdrik daxili və xarici siyasətini, dövlətçilik konsepsiyasını uğurla davam etdirməsi nəticəsində həyatımızın bütün sahələrində böyük inkişaf, tərəqqi var. Azərbaycan Respublikasının Birinci vitse-prezidenti, Mehriban Əliyeva ölkəmizin müasir və yeni çağırışlara uyğun olaraq inkişaf etməsi naminə misilsiz xidmətlər göstərir.
Rektor Nurlana Əliyeva qeyd edib ki, hazırda respublikamızda və dünyanın bir çox xarici ölkələrində böyük Azərbaycan şairi və mütəfəkkiri Nizami Gəncəvinin anadan olmasının 880 illiyinə və “Nizami Gəncəvi İli”nə həsr olunan müxtəlif tədbirlər keçirilir. BSU-da da qüdrətli söz ustadının ədəbi-bədii irsinin dərindən öyrənilməsi və daha geniş miqyasda təbliğ edilməsi məqsədilə silsilə tədbirlər keçirilir və tədbirlərin davamlı olması nəzərdə tutulur.
Nurlana Əliyeva vurğulayıb ki, Nizami Gəncəvi kimi böyük sənətkarı olan xalq xoşbəxtdir. Mütəfəkkir şairin əsərləri insanları, cəmiyyəti sülhə, əmin-amanlığa, ədalətə, xeyirxahlığa, müdrik əməllərə səsləyir. Ümumiyyətlə, Nizami Gəncəvinin bədii yaradıcılığında, dünyagörüşündə, ictimai-siyasi baxışlarında ədalətli cəmiyyət və ədalətli dövlət başçısı məsələsi xüsusi yer tutur. Nizami Gəncəvi yaradıcılığı ümumbəşəri xarakter daşıyır. Onun əsərlərində düşündürücü məqamlar çoxdur. Humanist və mütərəqqi ideyalarla zəngin olan dahi şairin yaradıcılığı müasir dövrümüz üçün də çox aktualdır. Biz tələbələrimizə Nizami Gəncəvinin yaradıcılığını, onun irəli sürdüyü humanist ideyaları, yüksək mənəvi-əxlaqi dəyərləri dərindən öyrətməliyik. Bu yaxınlarda BSU-da "Nizami Gəncəvi auditoriyası"nın istifadəyə verilməsi nəzərdə tutulur. Bu da öz növbəsində mütəfəkkir şairin yaradıcılığının daha dərindən öyrənilməsinə və təbliğinə xidmət edir.
Elmi konfransda AMEA-nın Məhəmməd Füzuli adına Əlyazmalar İnstitutunun direktoru, akademik Teymur Kərimli “Nizami yaradıcılığı dünya ədəbiyyatı kontekstində”, Nizami Gəncəvi adına Ədəbiyyat İnstitutunun Cənubi Azərbaycan ədəbiyyatı şöbəsinin müdiri, filologiya üzrə elmlər doktoru Rəhim Əliyev “Nizami və farsdilli Şirvan şairləri”, elmi işlər üzrə prorektor, professor Rafiq Novruzov “Nizami və Dante: yaradıcılıq paralelləri", tədris işləri üzrə prorektor, professor Telman Cəfərov “Nizaminin oğluna nəsihətinin rus dilinə ilk tərcüməsi barədə”, Azərbaycan multikulturalizmi və ölkəşünaslıq kafedrasının müdiri, dosent İbrahim Quliyev “Nizami və Gəncə”, həmin kafedranın dosenti Sevda Axundova “Nizami yaradıcılığında multikultural dəyərlər”, kafedranın müəllimi Nərmin Əzizova “Nizami yaradıcılığında bəşəri dəyərlər”, Əlyazmalar İnstitutunun elmi katibi Əzizağa Nəcəfov “Nizami yaradıcılığında savaş sənəti” mövzularında məruzə ilə çıxış ediblər. Onların məruzələrində Nizami Gəncəvi yaradıcılığının səciyyəvi xüsusiyyətləri ətraflı təhlil edilib.
Məruzələr elmi konfrans iştirakçıları tərəfindən maraqla qarşılanıb.
Bölmənin digər xəbərləri
