BAKIDA BMT-NİN HİMAYƏSİ İLƏ “ENERJİ SƏMƏRƏLİLİYİ VƏ DAVAMLI İNKİŞAF” MÖVZUSUNDA SİMPOZİUM KEÇİRİLƏCƏKDİR

26.03.2006 [08:11]
Çap et
A⁺ A^-

Sənaye və Energetika Nazirliyindən (SEN) AZƏRTAC-a bildirmişlər ki, martın 28-30-da Bakıda BMT-nin davamlı inkişaf üzrə komissiyasının himayəsi ilə “Enerji səmərəliliyi və davamlı inkişaf” mövzusunda simpozium keçiriləcəkdir. Bu mötəbər tədbirin Bakıda keçirilməsini Azərbaycan Prezidenti İlham Əliyev şəxsən dəstəkləmişdir.

Simpoziumun təşkilatçıları BMT-nin İqtisadi və Sosial İşlər Departamentinin davamlı inkişaf komissiyası və Azərbaycan Respublikasının Sənaye və Energetika Nazirliyidir.

Tədbirdə Xəzər hövzəsi ölkələrində neft və qaz hasilatında istifadə edilən texnologiyalar və enerji sistemlərində əldə edilmiş nailiyyətlər, perspektiv inkişafla əlaqədar məruzələr dinləniləcəkdir.

Simpoziumun qonaqları paytaxtımızın görməli yerləri, tarixi mədəniyyət abidələri ilə tanış olacaq, Səngəçal terminalına səfər edəcəklər.

Tədbirin son iş günü Bakı Deklarasiyası qəbul ediləcəkdir.