BAKIDA DİPLOMATİK NÜMAYƏNDƏLƏRİN FORUMUNUN 8-Cİ İCLASI KEÇİRİLMİŞDİR
Forumda “Prokurorluq orqanlarında insan və vətəndaş hüquq və azadlıqlarının təmin olunması sahəsində görülən işlər, həyata keçirilən demokratik islahatlar və əldə edilmiş nailiyyətlər barədə” məruzə ilə çıxış edən Baş prokurorun müavini Eldar Nuriyev müstəqillik illərində xalqımızın ümummilli lideri Heydər Əliyevin rəhbərliyi altında dünya dövlətləri birliyinə hərtərəfli inteqrasiya edən Azərbaycanda hüquqi, demokratik və sivil dövlət quruculuğu, vətəndaş cəmiyyəti formalaşdırılması yolunda görülən tədbirlər barədə danışmışdır.
Sonra Azərbaycan Respublikası Prokurorluğu orqanlarında aparılan islahatlar və struktur dəyişiklikləri, prokurorluğun fəaliyyətini nizama salan normatik-hüquqi baza yaradılması, “Prokurorluq haqqında” Qanunda nəzərdə tutulmuş fəaliyyət istiqamətləri üzrə işin düzgün təşkili ilə bağlı görülmüş işlər barədə ətraflı məlumat verilmiş, insan və vətəndaş hüquq və azadlıqlarının etibarlı müdafiəsinin və qanunun aliliyinin təmin edilməsi, cinayətkarlığa qarşı mübarizənin gücləndirilməsi istiqamətində prokurorluq orqanlarında həyata keçirilən tədbirlər diqqətə çatdırılmışdır. “Prokurorluğa işə qəbul olunmaq üçün namizədlərlə müsabiqə keçirilməsi qaydaları haqqında” dövlət başçısının təsdiq etdiyi Əsasnaməyə müvafiq olaraq, demokratik və səffaf prosedurlar əsasında aşkarlıq şəraitində 2002-ci və 2003-cü illərdə keçirilmiş prokurorluğa işə qəbul barədə qonaqlara ətraflı məlumat verilmişdir.
Prokurorluğun dövlət təsisatı kimi daha da təkmilləşdirilməsi istiqamətində həyata keçirilən tədbirlər sırasında Prezident İlham Əliyev tərəfindən imzalanmış 3 mart 2004-cü il tarixli “Korrupsiyaya qarşı mübarizə haqqında Azərbaycan Respublikası Qanununun tətbiq edilməsi barədə” Sərəncama müvafiq olaraq, Baş prokurorun yanında Korrupsiyaya qarşı mübarizə idarəsinin yaradılması prokurorluq orqanlarına dövlət səviyyəsində göstərilən etimadın təcəssümü və prokurorluğun strukturunun daha da təkmilləşdirilməsinə yönəldilmiş mühüm bir addım kimi qiymətləndirilmişdir.
Bildirilmişdir ki, həyata keçirilən islahatların tərkib hissələri kimi “Azərbaycan Prokurorluğu” elmi-praktiki jurnalının təsis edilməsi, Respublika Baş Prokurorluğunun veb-saytının yaradılması, habelə Azərbaycan Porkurorluğu muzeyinin yenidən təşkil olunması prokurorluq orqanlarının fəaliyyətində aşkarlığın daha da genişləndirilməsi, milli prokurorluğun tarixi keçmişinin öyrənilməsi və kadrların müasir tələblər səviyyəsində formalaşdırılması üçün əlavə mənbələrin yaradılması baxımından çox müsbət əhəmiyyət daşıyır.
İclasda Azərbaycan Respublikasının beynəlxalq aləmdə mövqelərinin möhkəmləndirildiyi, beynəlxalq təşkilatlarla əməkdaşlığın gücləndirildiyi, ikitərəfli və regional əməkdaşlıq sahəsində böyük uğurlar əldə edildiyi bir şəraitdə, Respublika Prokurorluğunun beynəlxalq əlaqələrinin daha da genişləndirilməsi, dünya dövlətlərinin prokurorluq orqanları ilə ikitərəfli, qarşılıqlı surətdə faydalı əlaqələrin inkişaf etdirilməsi, nüfuzlu beynəlxalq təşkilatlarla səmərəli əməkdaşlıq münasibətlərinin qurulması istiqamətində məqsədyönlü tədbirlərin həyata keçirilməsi nəzərə çarpdırılmışdır. Vurğulanmışdır ki, Azərbaycan Prokurorluğunda aparılan demokratik məzmunlu islahatların beynəlxalq təşkilatlar tərəfindən müsbət dəyərləndirilməsinin nəticəsidir ki, öz sıralarında 80-dən çox dövlətin prokurorlarını birləşdirən Beynəlxalq Prokurorlar Assosiasiyası İcraiyyə Komitəsinin növbəti iclası 2002-ci ilin may ayında Bakı şəhərində keçirilmişdir. Assosiasiyanın prezidenti Nikolas Kouderinin rəhbərlik etdiyi nümayəndə heyətinin xalqımızın ümummilli lideri Heydər Əliyev tərəfindən qəbul edilməsi Bakı şəhərində keçirilən bu beynəlxalq tədbirin gedişində ən əlamətdar hadisə olmuş, səmərəli əməkdaşlıq əlaqələrinin daha da möhkəmləndirilməsinə ciddi zəmin yaratmışdır.
Dünya dövlətlərinin prokurorluq orqanları ilə əlaqələrin inkişaf etdirilməsinə yönəldilmiş tədbirlər sırasında Çin Xalq Respublikası Ali Xalq Prokurorluğunun Baş prokuroru Tszya Çinvanın və Avstriya Respublikasının Baş prokuroru Valter Presslauyerin rəhbərlik etdiyi nümayəndə heyətlərinin Azərbaycana səfərinin, imzalanmış əməkdaşlıq proqramlarının əhəmiyyəti xüsusi vurğulanmışdır.
Müasir dövrdə ən aktual məsələlərdən biri olan korrupsiyaya qarşı mübarizə problemlərinə həsr olunmuş beynəlxalq tədbirlərdə, o cümlədən Korrupsiyaya qarşı dövlətlər qurumu, Çirkli pulların yuyulması problemləri üzrə beynəlxalq maliyyə komissiyası, Cinayət yolu ilə əldə edilmiş gəlirlərin leqallaşdırılmasına qarşı tədbirlərin qiymətləndirilməsi üzrə ekspert komitəsi, İqtisadi Əməkdaşlıq və İnkişaf Təşkilatı kimi nüfuzlu beynəlxalq qurumların keçirdiyi seminar, müşavirə, treninqlərdə Baş Prokurorluğun əməkdaşlarının səmərəli iştirakı qeyd edilmişdir.
İclasda Prokurorluğun əlaqədar struktur qurumlarının rəhbərləri qonaqları maraqlandıran çoxsaylı suallara ətraflı cavab vermiş, ümumi maraq doğuran məsələlər üzrə əməkdaşlığın perspektivləri barədə fikir mübadiləsi aparılmışdır.
Tədbirin gedişində iştirakçılar Baş Prokurorluğun müasir standartlar səviyyəsində təşkil edilmiş tədris mərkəzinin inzibati binası, kitabxanası, auditoriyaları, müxtəlif təyinatlı fənn kabinələri ilə tanış olmuşlar.
Bölmənin digər xəbərləri
