Bakı, 10 noyabr, AZƏRTAC

Noyabrın 10-da Bakıda “Gənclik və dövlət müstəqilliyi: gələcəyə baxış” mövzusunda gənclərin respublika konfransı işə başlayıb.

AZƏRTAC xəbər verir ki, dövlət müstəqilliyinin bərpasının 25-ci ildönümünə həsr olunan konfransda Azərbaycan Respublikası Prezidentinin ictimai-siyasi məsələlər üzrə köməkçisi Əli Həsənov, gənclər və idman naziri Azad Rəhimov, Milli Məclisin deputatları, gənclər təşkilatlarının nümayəndələri iştirak ediblər.

Əvvəlcə Azərbaycanın dövlət himni səsləndirilib və ölkəmizin müstəqilliyi və ərazi bütövlüyü uğrunda canlarından keçmiş şəhidlərin xatirəsi bir dəqiqəlik sükutla yad edilib.

Konfransın moderatoru, gənclər və idman nazirinin müavini İntiqam Babayev tədbirdə 25 il ərzində dövlət gənclər və idman siyasəti sahələrində əldə olunmuş uğurlar, gənclər arasında vətənpərvərlik, azərbaycançılıq, dövlətçilik, dünyəvilik ideyalarının təbliği və vətəndaş cəmiyyətinin inkişafında gənclərin iştirakı məsələləri ilə bağlı müzakirələrin aparılacağını bildirib.

Konfransda çıxış edən Əli Həsənov Azərbaycan Respublikasının dövlət müstəqilliyinin bərpasının 25 illiyi münasibətilə təşkil olunan silsilə tədbirlərdə ötən dövrdə ölkəmizin keçdiyi sürətli inkişaf yolunun geniş müzakirə edildiyini diqqətə çatdırıb. Əli Həsənov bildirib ki, bu tədbirlərin ən əhəmiyyətlisi olan Heydər Əliyev Mərkəzindəki toplantıda Azərbaycanın 25 illik inkişafı ilə bağlı Prezident İlham Əliyevin proqram xarakterli, keçdiyimiz bütün inkişaf yolunu geniş təhlil edən, gələcək hədəflərimizi, prioritetlərimizi, siyasətimizin əsas istiqamətlərini müəyyənləşdirən çıxışını dinlədik. Həmin çıxışda Azərbaycan gəncliyinə və gənclər siyasətinə də geniş yer ayrılmışdı.

Müasir Azərbaycan gəncliyinin ölkəmizin müstəqillik tarixinin ayrılmaz tərkib hissəsi olduğunu vurğulayan Prezidentin köməkçisi bildirib ki, bu gün əhalinin fəal təbəqəsi kimi formalaşan Azərbaycan gəncləri respublikamızın inkişafı yolunda bizimlə birlikdə, çiyin-çiyinə addımlayırlar.

Bu gün Azərbaycan gənclərinin müxtəlif sahələrdə böyük uğurlar qazandıqlarını diqqətə çatdıran Əli Həsənov qeyd edib ki, bütün bunlar bizim gənclərimizin gələcəyinə böyük ümidlərlə baxmağımıza əsas verir. Müstəqilliyin əvvəllərindəki gəncliklə bugünkü Azərbaycan gəncliyinin vəziyyətini müqayisə edən Prezidentin köməkçisi deyib: “Ümummilli lider Heydər Əliyev hakimiyyətə gələnə qədər Azərbaycan gəncliyi ambisiyalı insanların girovuna çevrilərək hakimiyyət uğrunda mübarizəyə cəlb olunmuşdu. Gənclik milli, sinfi və digər ideoloji baxışlarına görə bir-birinə qarşı qoyulmuşdu. O dövrdəki hakimiyyət və cəmiyyət qarşıdurmasının təməlində gənclər dayanırdı. Azərbaycan parlamentinin sədri seçilən ümummilli lider Heydər Əliyevin 1993-cü ilin avqustunda gənclərlə görüşündə ilk dəfə olaraq gəncliyin mövcud vəziyyəti, ölkənin gələcəyində gəncliyin təmsil olunmasının əsas prinsipləri müzakirə edildi. Həmin görüşün müsbət nəticələri oldu. Ulu öndər Heydər Əliyev Prezident seçildikdən sonra imzaladığı ilk fərmanlardan biri də Gənclər və İdman Nazirliyinin yaradılması ilə bağlı idi. Beləliklə, gənclər siyasəti faktiki olaraq, dövlətin həyata keçirdiyi siyasətin prioritet istiqamətlərindən birinə çevrildi”.

Sonrakı illərdə Azərbaycan gənclərinin qurultaylarının keçirildiyini, Gənclər Gününün təsis olunduğunu, bu sahədə dövlət proqramlarının, dövlət konsepsiyasının qəbul edildiyini, gənclər və idman siyasətinin dövlətin fəaliyyət istiqamətlərindən birinə çevrildiyini vurğulayan Prezidentin köməkçisi qeyd edib ki, 2003-cü ildən sonra ölkəmizdə gənclərin inkişafı istiqamətlərinə və bu sahədə əldə olunan uğurlara diqqət yetirsək, Azərbaycan dövlətinin qarşısında duran əsas sahələrdən birinin gənclər siyasəti olduğunu görə bilərik. Ötən dövrdə Azərbaycan dövlətinə, xalqına bağlı, milli-mənəvi dəyərlərimizi, dilimizi, adət-ənənələrimizi bilən, çiynini bu dövlətin yükünün altına verməyə hazır olan vətənpərvər nəsil yetişib. Vətənpərvər nəsil olmadan millətin iradəsindən, onun bütün sahələr üzrə siyasətinin uğurundan danışmaq olmaz.

“Ümummilli lider Heydər Əliyev həmişə deyirdi ki, təkcə milli ruhlu, vətənpərvər, iradəli gəncliklə dünyada böyük uğurlar qazana bilmərik. Azərbaycan gəncliyi dünyada müasir elmin, təhsilin, texnologiyanın, inkişafın əsas trendlərinə yiyələnməli, rəqabətə davamlı olmalıdır. Azərbaycan gəncliyi dünya gənclərinin bütün sahələr üzrə əldə etdiyi nailiyyətləri mənimsəməli və ölkəmizə gətirməlidir. Bu baxımdan ümummilli lider Heydər Əliyevin dövründən başlayan və sonrakı illərdə Prezident İlham Əliyev tərəfindən davam etdirilən Azərbaycan gənclərinin xaricdə təhsil alması siyasəti, dünyada mövcud yeniliklərə, müasir texnologiyalara yiyələnmək istiqamətində dövlətin verdiyi dəstək bu gün onu deməyə əsas verir ki, bizim gənclik bütün səviyyələrdə Azərbaycan dövlətini təmsil etməyə hazırdır və ölkəmizi uğurla təmsil edir”, - deyə Əli Həsənov vurğulayıb.

Prezidentin köməkçisi diqqətə çatdırıb ki, müstəqillik dövründə yetişib formalaşan gənclər xarici dilləri, müasir texnologiyaları öyrənib, dünyada bütün texnoloji və innovativ nailiyyətlərə yiyələniblər. Biz bu gəncliklə gələcəyə ümidlə baxırıq. Bu gün dövlət quruculuğu sistemimizdə, qanunvericilik, məhkəmə hakimiyyətində, mətbuatda gənc nəsillə təcrübəli ziyalılarımız çiyin-çiyinə çalışırlar. Gənc nəslin enerjisi ilə yaşlı nəslin təcrübəsinin bir araya gəlməsi dövlətin gücünü təşkil edir. Bu, Azərbaycanda dövlət quruculuğu istiqamətində həyata keçirilən siyasətin əsas istiqamətlərindən biri idi və bu gün buna uğurla nail olunub.

Əli Həsənov vurğulayıb ki, müstəqillik illərində iqtisadiyyat, siyasət, sosial sahələrdə, beynəlxalq aləmdə, ümumiyyətlə, bütün istiqamətlərdə qazanılan nailiyyətlər sırasına gənclər siyasəti sahəsində əldə edilən uğurları də qeyd etmək lazımdır. Çünki bizim 25 ildə əldə etdiyimiz əsas nailiyyətlərin mühüm istiqamətlərindən biri məhz yetişdirdiyimiz gənc nəsildir. Ümummilli Liderimiz həmişə deyirdi ki, əgər bir millətin gəncliyi sağlam yetişdirilirsə, o millətin gələcəyi etibarlı əllərdədir. Bu gün əminliklə demək olar ki, Prezident İlham Əliyev ulu öndər Heydər Əliyevin siyasətini uğurla həyata keçirərək Azərbaycanın gələcəyini gənclərin timsalında tamamilə təmin edib. Azərbaycanın bundan sonrakı inkişafının əsas yükü gənclərin üzərinə düşür. Gənclərimiz artıq bu yükü qəbul etməyə hazırdırlar.

Gənclər və idman naziri Azad Rəhimov çıxışında 1994-cü ildə Ulu Öndərin müvafiq Fərmanına əsasən Gənclər və İdman Nazirliyinin yaradılmasını bu sahədə mühüm mərhələnin başlanğıcı kimi qiymətləndirib. Ulu öndər Heydər Əliyevin bu sahəyə diqqət və qayğısı nəticəsində gənclər siyasəti haqqında qanunun qəbul olunduğunu, Azərbaycan Gəncləri Gününün təsis edildiyini vurğulayan nazir bildirib ki, ölkəmizdə uğurlu gənclər siyasəti bu gün də yüksək səviyyədə həyata keçirilir. Dünyada iqtisadi böhranın hökm sürdüyü bir dövrdə milli dinamik inkişafını qoruyub saxlaya bilən Azərbaycan yeni qlobal çağırışlara uyğun əsaslı islahatlara start verib.

Bildirilib ki, müstəqilliyimizin bərpasından ötən 25 il ərzində ölkəmizdə yeni nəsil formalaşıb. Həmin nəsil Vətənə məhəbbət, milli-mənəvi dəyərlərə bağlılıq və Vətənə sədaqət ruhunda böyüyür. Hazırda ölkə əhalisinin 27 faizini gənclər təşkil edir. Vurğulanıb ki, Prezident İlham Əliyev gənclərin potensialından ölkənin mənafeyi naminə tam və düzgün istifadə olunması, onların məşğulluğunun təmin edilməsi, dövlət idarəçilik sistemində iştirakı istiqamətində kompleks tədbirlər həyata keçirməyi qarşıya məqsəd qoyub. Ötən illər ərzində gənclər siyasətinin normativ hüquqi bazası və strukturu formalaşıb, Azərbaycan gənclərinin inkişafı strategiyası qəbul edilib. Qısa zaman kəsiyində respublikanın 38 rayon və şəhərində Gənclər evləri və mərkəzləri, 300-dən çox gənclər təşkilatı yaradılıb. 2011-ci ildə Azərbaycan Respublikasının Prezidenti yanında Gənclər Fondunun yaradılması minlərlə təşəbbüsün dəstəklənməsinə imkan verdi. Sevindirici haldır ki, gənclərin fəaliyyəti təkcə paytaxtla deyil, həm də regionlarla bağlıdır.

Diqqətə çatdırılıb ki, son beş ildə Gənclər və İdman Nazirliyi tərəfindən 700-dən çox irimiqyaslı layihə və tədbir keçirilib. Onlardan 155-i beynəlxalq statusa malikdir. Ölkəmizdə idmana göstərilən dövlət qayğısından danışan nazir olimpiyaçılarımızın uğurlarını da xüsusi qeyd edib. Nazir bildirib ki, ölkəmizdəki ictimai-siyasi sabitlik, inkişaf prosesləri, gənclər sahəsində əldə olunan uğurlar BMT-nin gənclər siyasəti üzrə I Qlobal Forumun Azərbaycanda keçirilməsi qərarına müsbət təsirini göstərib.

A.Rəhimov vurğulayıb ki, Ulu Öndərin idman sahəsində həyata keçirdiyi siyasət 1997-ci ildə mühüm mərhələyə qədəm qoydu. Rəhbərlik etdiyi sahələrdə uğurlara imza atan İlham Əliyevin Milli Olimpiya Komitəsinin prezidenti seçilməsi ölkə idmanının həyatında mühüm və əlamətdar hadisə kimi tarixə yazıldı. Bu tarixi seçim Ümummilli Liderin respublikada idmanın inkişafı ilə bağlı ideyaların daha sürətlə gerçəkliyə çevrilməsini təmin etdi. Azərbaycanın Olimpiya hərəkatında layiqli yer tutması dövlətimizin başçısının idmanın inkişafına göstərdiyi qayğı və diqqətin, uzaqgörən idman siyasətinin nəticəsidir.

Milli Məclisin gənclər və idman komitəsinin sədri Fuad Muradov bildirib ki, müstəqilliyimizin ilk illərində Azərbaycan gəncliyi pərakəndə şəkildə fəaliyyət göstərirdi. Həmin dövrdə gənclər fürsətçi qruplaşmalar və onların havadarları tərəfindən alət kimi istifadə olunurdu. Gənclər çətin siyasi prosesin qurbanına çevrilmişdilər. Azərbaycanı anarxiya dövründən çıxaran, müstəqilliyin itirilməsi təhlükəsini sovuşduran ümummilli lider Heydər Əliyevin hakimiyyətə qayıdışı dövlət gənclər siyasətində yeni səhifə açdı. Ulu Öndər gənclərin daha mütəşəkkil təşkilatlanması üçün Gənclər və İdman Nazirliyini yaratdı. Nazirlik yaradılandan sonra gənclər siyasətində mütərəqqi irəliləyiş əldə olundu. Daha sonra ümummilli lider Heydər Əliyev ölkədə Gənclər Gününü təsis etdi. İlham Əliyevin Milli Olimpiya Komitəsinin prezidenti seçilməsi isə ölkədə idmanın inkişafına böyük təkan verdi. Bunun nəticəsi olaraq, gənclər arasında idmana maraq artdı və ölkəmiz beynəlxalq yarışlarda güclü idmançılarla təmsil olundu.

F.Muradov vurğulayıb ki, ulu öndər Heydər Əliyevin əsasını qoyduğu gənclər siyasətinin Prezident İlham Əliyevin rəhbərliyi ilə uğurla davam etdirilməsi nəticəsində Azərbaycan dünyada idman ölkəsi kimi tanınır.

Azərbaycan Respublikasının Prezidenti yanında Gənclər Fondunun icraçı direktoru Fərhad Hacıyev deyib ki, ölkəmizdə 25 il ərzində digər sahələrdə olduğu kimi, gənclər sektorunda da böyük inkişafa nail olunub. Bu inkişaf ulu öndər Heydər Əliyevin adı ilə bağlıdır. Azərbaycan gəncliyi dünyanın ən xoşbəxt gəncliyindən biridir. Çünki biz Ulu Öndər ilə eyni dövrdə yaşadıq və bu gün onun yaradıcı gənclər siyasətinin bəhrəsini görürük. Ölkəmizdə Gənclər və İdman Nazirliyi çətin dövrdə - müharibədən sonrakı vaxtda yaradılıb. Nazirliyin əsas məqsədi sağlam nəslin yetişdirilməsinə dövlət dəstəyinin təmin edilməsidir. Gənclər və İdman Nazirliyi ötən müddətdə bu vəzifələrin öhdəsindən uğurla gələrək ona göstərilən etimadı doğruldub.

Gənclər Fondunun fəaliyyəti barədə konfrans iştirakçılarına məlumat verən Fərhad Hacıyev diqqətə çatdırıb ki, qurum yarandığı gündən indiyədək yüz minlərlə gəncin qəlbinə yol tapmağı bacarıb. Fond indiyədək 7 min 98 layihə qəbul edib və onlardan 3341-i dəstəklənib. Bu, təxminən müraciətlərin yarısını təşkil edir. Fond fəaliyyət göstərdiyi dövrdə gənclərimizin etibarını qazanmağı bacarıb.

Vurğulanıb ki, hər il dövlətimizin başçısı tərəfindən Gənclər Fonduna vəsait ayrılır. Bu məbləğ gənclər təşkilatlarının və gənclərin layihələrinin reallaşmasına yönəlib. Gənclər Fondu fərdi şəxslərin layihələrinin həyata keçirilməsinə bilavasitə kömək etməsi baxımından dünyada nadir qurumdur. Bu, Prezident İlham Əliyevin hər bir vətəndaşın qayğısına qalmasının bariz nümunəsidir.

Sonra Milli Məclisin hüquq siyasəti və dövlət quruculuğu komitəsinin sədri Əli Hüseynli, Milli Məclisin deputatı Şahin İsmayılov, Yeni Azərbaycan Partiyası Gənclər Birliyinin sədri Seymur Orucov, Olimpiya çempionu Namiq Abdullayev, Azərbaycan Respublikası Gənclər Təşkilatları Milli Şurasının sədri Seymur Hüseynov, “İrəli” İctimai Birliyinin sədri Mirhəsən Seyidov və Azərbaycan Gənclərinin Avropaya İnteqrasiyası Təşkilatının sədri Nərgiz Eyvazova çıxış edərək ölkəmizdə uğurla həyata keçirilən dövlət gənclər siyasəti nəticəsində əldə olunan uğurlardan danışıblar. Qeyd olunub ki, Azərbaycanda gənclər sahəsində yaradılan münbit şərait onların asudə vaxtının səmərəli təşkilinə, elm, mədəniyyət və idman sahələrində mühüm uğurlar əldə etmələrinə, beynəlxalq tədbirlərdə və yarışlarda ölkəmizi layiqincə təmsil etmələrinə imkan verir.

Sonda ölkəmizin ictimai-siyasi həyatında yüksək fəallıq göstərən paytaxt gənclərinin bir qrupuna fəxri fərmanlar təqdim edilib.