BAKIDA İDMAN GİMNASTİKASI HAKİMLƏRİ ÜÇÜN BEYNƏLXALQ KURSLAR KEÇİRİLİR
Bakıda idman gimnastikası hakimləri üçün beynəlxalq kurslar keçirilir. Azərbaycan Gimnastika Federasiyasından AZƏRTAC-ın müxbirinə bildirmişlər ki, kurslara Beynəlxalq Gimnastika Federasiyasının kişi idman gimnastikası üzrə Texniki Komitəsinin prezidenti Adrian Stoyka rəhbərlik edir. O demişdir: “Bakıya gəlməyimə çox şadam və əminəm ki, biliklərim hakimlərə fəaliyyətlərində faydalı olacaqdır. Azərbaycanda son illər gimnastika yeni səviyyəyə çıxmışdır. Ölkənizdə gimnastikanın inkişafının əsas göstəriciləri təkcə idman nəticələri deyil, həm də onun beynəlxalq münsiflikdə təmsil edilməsidir. Zənnimcə, sizin hakimləriniz tezliklə Avropa və dünya çempionatlarında təmsil ediləcəklər. Kurslar başa çatandan sonra seminar iştirakçıları beynəlxalq kateqoriyalı hakim dərəcəsi alacaqlar”.
Texniki Komitənin prezidenti qadın idman gimnastikası üzrə azərbaycanlı hakim Lalə Abdullayevanın da seminarda iştirak etməsindən məmnunluğunu bildirmişdir. Onun fikrincə, ölkəmizdə qadın idman gimnastikası yeni inkişaf mərhələsinə qədəm qoymuşdur. L.Abdullayevanın sözlərinə görə, tezliklə Bakı Gimnastika Məktəbinə qızların qəbulu başlanacaqdır.
Bölmənin digər xəbərləri
