Bakı, 5 iyun (AZƏRTAC). İyunun 5-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.

“Təzə bazar” MMC-nin həyətindəki yarmarkada alıcılara Sabirabad, Gədəbəy, Hacıqabul və digər rayonlardan gətirilmiş 9 tondan çox məhsul təklif olunurdu.

Paytaxt sakinləri yarmarkaya gələrək həvəslə təzə və keyfiyyətli məhsullar alırdılar. Onlar məhsulların bazarlardakından ucuz olduğuna görə yarmarkanın təşkilatçılarına və fermerlərə minnətdarlıq edirdilər.

Kənd Təsərrüfatı Nazirliyinin nümayəndəsi Fərhad Qəmbərov dedi ki, buradakı qiymətlər bazardakından 20-25 faiz ucuzdur. Qoyun ətinin kiloqramı 4 manat 50 qəpiyə, mal əti 4 manata, yumurtanın biri 7 qəpiyə və s. satılır.

Yarmarkada hər həftə iştirak edən gədəbəyli fermer Arzu Tanrıquliyev 1 tondan çox kartof, soğan və kələm gətirdiyini söyləmişdir. Məhsulları münasib qiymətə satdığını və yaradılan şəraitdən razılığını bildirmişdir.

Şənbə günü Şərifzadə küçəsində, Bakı Rabitə və Nəqliyyat Kollecinin həyətində keçirilən yarmarkaya beş rayondan gətirilmiş kənd təsərrüfatı məhsullarının arasında nübar meyvə və tərəvəz çoxluq təşkil edirdi.

Kənd Təsərrüfatı Nazirliyinin nümayəndəsi Saleh Zərbəliyev məlumat verdi ki, yarmarkanın əsas təchizatçılarından olan Salyan rayonundan bu gün gətirilən məhsulların həcmində məlum hadisələrlə əlaqədar heç bir azalma baş verməmişdir. Rayonun fermerləri alıcılara əvvəlki həftədəkindən daha çox lobya, təzə kartof-soğan, xiyar, yerkökü, ağartı məhsulları və s. təklif edirlər. Qusar, Şabran, Quba və Astara rayonlarının şəxsi təsərrüfat sahibləri də yarmarkaya bol məhsul gətirmişlər. Ümumilikdə yarmarkaya gətirilmiş kənd təsərrüfatı məhsullarının həcmi 77,7 tona çatmışdır.

S.Zərbəliyev bildirdi ki, yarmarkaya gətirilmiş məhsullar arasında mövsümə uyğun olaraq göyərti, faraş kələm, təzə kartof, soğan, xiyar, badımcan, pomidor, çiyələk, alça, alma, tut, ərik, gilas və s. daha çoxdur. Sitrus meyvələrindən portağal, limon, ağartı məhsullarından süd, qatıq, xama, motal pendiri, şor və s. alıcıların daha çox aldıqları məhsullar arasındadır.

Yarmarkada bütün məhsullar bazardakından 25-30 faiz, bəziləri isə yarıbayarı ucuz təklif olunurdu.

Sakinlər yarmarkada məhsulların bolluğu, çeşidlərin müxtəlifliyi, qiymətlərin ucuzluğu və yaradılan şəraitə görə minnətdarlıqlarını bildirirdilər.

Suraxanı rayonunda təşkil olunmuş hər iki yarmarkada - “Günəş” ticarət mərkəzində və “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində sakinlərə Samux, Daşkəsən, Quba, Biləsuvar, Balakən və Cəlilabad rayonlarından gətirilmiş 44,3 ton məhsul təklif olunur. Bazarlarla müqayisədə məhsullar 25-35 faiz ucuz satılır.

Kənd Təsərrüfatı Nazirliyinin nümayəndəsi Mustafa Rüstəmov demişdir ki, yarmarkalarda gilas, çiyələk, bostan bitkilərindən xiyar, pomidor, bibər, badımcan artmış və bu, qiymətlərin xeyli aşağı düşməsinə səbəb olmuşdur.

Yarmarkada məhsulların keyfiyyəti ciddi surətdə yoxlanılır, ət və süd məhsulları baytar müayinəsindən keçirilir.

Biləcəri qəsəbəsi, 284 nömrəli məktəbin yaxınlığındakı yarmarkaya fermerlər Qazax və Ağsu rayonlarından 12 tonadək meyvə-tərəvəz, süd məhsulları gətirmişdilər. Sakinlər məhsulları ucuz qiymətlərə ala bildikləri üçün minnətdarlıq edirdilər.

Binəqədi rayonu 6 nömrəli Bakı Texniki Peşə Liseyinin qarşısındakı yarmarkada Bərdə, Goranboy və ağstafalı fermerlər satışa bazardakından 25-30 faiz ucuz qiymətlərə kənd təsərrüfatı məhsulları çıxarmışdılar.

######