MƏDƏNİYYƏT
Uşaqların Beynəlxalq Müdafiəsi Günü “Azərxalça” ASC-də qeyd olunub
![](/files/galleryphoto/2024/2/1200x630/17172384322184019626_1200x630.jpg)
Bakı, 1 iyun, AZƏRTAC
1 İyun - Uşaqların Beynəlxalq Müdafiəsi Günüdür. Bu gün artıq dördüncü ildir ki, “Azərxalça” ASC daxilində geniş şəkildə qeyd olunur. Bu il Uşaqların Beynəlxalq Müdafiəsi günü “Azərxalça” ASC-nin Azərbaycanın müxtəlif bölgələrində - Abşeron, Nardaran, Şabran, Ağdam, Horadiz, Tərtər, Qazax, Şəmkir, Quba, Xaçmaz, İsmayıllı, Qəbələ, Lənkəran və Kürdəmirdə fəaliyyət göstərən 14 emalatxananın hər birində qeyd olunub.
“Azərxalça” ASC-dən AZƏRTAC-a bildirilib ki, bu gün münasibətilə bütün emalatxanalarda fəaliyyət göstərən toxucu və digər işçi heyət bir günlük öz övladlarını çalışdıqları müəssisəyə gətiriblər. Uşaqlar üçün öncə geniş əyləncə təşkil olunub daha sonra onlarla emalatxanada qısa tur baş tutub, xalçaçılıq və xalçaların toxunma prosesi haqqında geniş məlumat verilib, ustad dərsləri keçirilib.
Daha sonra “Azərxalça” ASC İdarə Heyətinin Sədri, Əməkdar incəsənət xadimi Emin Məmmədovun uşaqlara ünvanladığı təbrik məktubu balaca dostlara təqdim olunub.
Məlum olduğu kimi bu gün sürətlə inkişaf etməyə can atan “Azərxalça” ASC-nin əsas məqsədi milli-mənəvi, mədəni irsimiz olan xalçaların qorunması, xalçaçılıq işinin təbliği, xalça və xalça məmulatlarının istehsalı, ixracı, ölkə daxilində və xaricdə satışının təşkili, yeni texnologiyaların tətbiqi, maddi-texniki bazanın müasirləşdirilməsi, beynəlxalq sərgi və konfranslarda iştirakının təmini - bir sözlə, Azərbaycanın milli xalça brendinin inkişafı üçün lazım olan bütün tədbirlərin görülməsidir. Bütün görülən işlərin yalnız indiki zamanda deyil gələcəkdə də effektiv olması, xalçaçılıq sənətinin inkişaf etməsi və gələcək nəsillərə uğurla ötürülməsi üçün milli mənəvi irsimizi uşaqlara, gənc nəslə sevdirmək, tanıtmaq və daim bu sahə ilə əlaqələrini canlı saxlamaq əsas şərtlərdən biridir. “Azərxalça” ASC ilin yalnız bir günü deyil il ərzində körpələrin, məktəbli uşaqların və gənclərin asudə vaxtının səmərəli təşkil olunması işlərində yaxından iştirak edir. İl ərzində Cəmiyyətin müxtəlif emalatxanalarında rayonlarda fəaliyyət göstərən bağça, məktəb və müxtəlif təhsil ocaqlarının müəllim və tələbə heyəti üçün gəzinti, maarifləndirici görüş və tədbirləri təşkil olunur.
Məlumat üçün bildirək ki, 1 İyun - Uşaqların Beynəlxalq Müdafiəsi Günü Azərbaycanda uzun illərdir geniş qeyd edilir. Ölkəmizdə uşaqların müdafiəsi və onlara qayğı göstərilməsi istiqamətində çoxsaylı işlər görülüb, uşaqların sosial və hüquqi müdafiəsi ilə bağlı məsələlər Konstitusiya, qanunverici və normativ-hüquqi aktlarla tənzimlənir. Uşaq hüquqlarının müdafiəsi ilə bağlı Azərbaycanda qanunvericilik bazası formalaşıb, “Uşaq hüquqları haqqında” qanun (1998-ci il 19 may) və bəzi digər normativ-hüquqi aktlar qəbul edilib. Azərbaycanda uşaqların sağlam, savadlı, hərtərəfli, vətənpərvər və ən əsası vətəndaş kimi formalaşması üçün şərait yaradılmasına xüsusi diqqət yetirilir.