Çexiya iş axtarmaq üçün ölkəyə gələn Aİ vətəndaşlarına nəzarəti sərtləşdirir
Praqa, 16 iyun, AZƏRTAC
Çexiya hakimiyyəti iş axtarmaq məqsədilə ölkəyə gələn Avropa İttifaqı ölkələrinin vətəndaşları üçün daha sərt yoxlamalar tətbiq edir.
AZƏRTAC xəbər verir ki, yeni tədbirlər ölkədə qalma qaydalarına əməl olunmasına nəzarətin gücləndirilməsinə və sosial dəstək sistemindən sui-istifadə hallarının qarşısının alınmasına yönəlib.
Yenilənmiş tələblərə əsasən, Çexiyada üç aydan artıq müddətdə işləmədən yaşayan Avropa İttifaqı vətəndaşları aktiv iş axtarışında olduqlarını təsdiqləyən sübutlar təqdim etməlidirlər. Səlahiyyətli orqanlar namizədin ixtisasını, təcrübəsini və bu istiqamətdə göstərdiyi səyləri nəzərə alaraq onun işə düzəlmək şanslarını qiymətləndirəcək.
Əgər altı ay keçdikdən sonra iş axtaran şəxs işlə təmin olunmaq perspektivlərinin olduğunu təsdiqləyə bilməsə, onun ölkədə yaşamaq hüququna yenidən baxıla bilər. Çexiya hökuməti vurğulayır ki, bu dəyişikliklər sərbəst hərəkət haqqında Avropa qanunvericiliyinə uyğundur və əmək miqrasiyası azadlığı ilə milli sosial müdafiə sisteminin dayanıqlılığı arasında tarazlığın qorunmasına xidmət edir.
Bölmənin digər xəbərləri
