BAKIDA “NUR XƏZİNƏSİ” ADLI SƏRGİ AÇILMIŞDIR
AZƏRTAC xəbər verir ki, İran İslam Respublikasının “Şəcəreye-Tuba” Müəssisəsinin və Azərbaycan Qadınlar Cəmiyyəti “əz-Zəhra” islam şöbəsinin birgə təşkilatçılığı ilə fevralın 8-də Bakıda, İran Ticarət Mərkəzində hər iki ölkənin mədəniyyət və incəsənət nümunələrinin nümayiş etdirildiyi “Nur xəzinəsi” adlı sərgi açılmışdır.
Sərgidə 10-dan artıq bölmədə müxtəlif mədəniyyət və incəsənət nümunələri nümayiş etdirilir. “Şuşa qalasından gətirilmiş əlyazmalar” bölməsində Xoşqədəm Quliyevaya məxsus 400 il yaşı olan Quran, Mərkəzin foyesində dairəvi formalı parça üzərində bir neçə müxtəlif məscidin rəsmləri, “Kitab” bölməsində böyük Azərbaycan şairləri Xaqaninin, Nizaminin və başqalarının nəfis şəkildə nəşr edilmiş əsərləri, “Müsəlman qadınlarının həyatı” bölməsində iranlı qadınların ictimai fəallığını göstərən fotoşəkillər və sair xüsusi maraqla qarşılanır.
Açılış mərasimindən əvvəl Quran oxunmuşdur.
Qonşu dövlətin Bakıdakı səfiri Əfşar Süleymani, akademik Bəkir Nəbiyev, Azərbaycan Qadınlar Cəmiyyətinin sədri Şəfəq Abdullayeva və başqaları çıxış edərək, İran islam inqilabının 26-cı ildönümü günlərində keçirilən tədbirin ölkələrimiz arasında mədəni əlaqələrin genişləndirilməsində rolundan danışmışlar. Xalqlarımızın bir-birinin tarixini, incəsənətini, ədəbiyyatını daha yaxından tanımalarında belə tədbirlərin əhəmiyyəti xüsusi vurğulanmışdır.
Mərasimdə dövlətlərimizin başçılarının ölkələrimizə qarşılıqlı səfəri
xalqlarımız arasındakı müxtəlifyönlü mədəni əlaqələrin
möhkəmləndirilməsində yeni mərhələ kimi qiymətləndirilmişdir.
Bölmənin digər xəbərləri
