BAKIDA OTÜSTÜ XOKKEY ÜZRƏ OLİMPİYA SEÇMƏ TURNİRİ YÜKSƏK SƏVİYYƏDƏ KEÇİRİLƏCƏK
Azərbaycan Otüstü Xokkey Federasiyası aprelin 12-də Bakıda qadınlar arasında otüstü xokkey üzrə start götürəcək Olimpiya seçmə turnirinə yüksək səviyyədə hazırlaşmışdır. Şübhəsiz, bu yarış böyük idman bayramına çevriləcək.
AZƏRTAC xəbər verir ki, bu fikirlər aprelin 11-də yarışın təşkilat komitəsinin, Beynəlxlaq Otüstü Xokkey Federasiyasının nümayəndələrinin iştirakı ilə “Excelsior” mehmanxanasında keçirilən mətbuat konfransında səslənmişdir.
Azərbaycan Otüstü Xokkey Federasiyasının birinci vitse-prezidenti Namiq Əliyev ilk dəfə bu cür turnirdə iştirak edəcək Azərbaycan qadın xokkeyçilərinin hazırlıq səviyyəsinin qənaətbəxş olduğunu söyləmişdir.
Milli komandamızın yarışa ciddi hazırlaşdığını deyən N.Əliyev yığmamızın bir sıra yoldaşlıq oyunlarında gücünü sınadığını xatırlatmışdır. Olimpiya Oyunlarına yalnız birinci yerin sahibinin vəsiqə qazanacağını deyən N.Əliyev tamaşaçıların turnirdə maraqlı mübarizənin şahidi olacaqlarını söyləmişdir. Yarışın ən güclü komandalarından biri İspaniya yığmasının olduğunu deyən federasiyanın birinci vitse-prezidenti favorit komandalarla qarşılaşmada psixoloji faktorun əsas rol oynayacağını söyləmişdir.
“Azərbaycan yığması bu turnirdə tam başqa oyun nümayiş etdirəcək. Mən əminəm ki, komanda idman növlərində millimiz ilk yüksək nəticə əldə edən komanda olacaq”- deyə N.Əliyev əlavə etmişdir.
Turnirin direktoru Karola Meyer yarışın təşkilində görülən işlərdən razı qaldığını söyləmişdir. Qonaq demişdir ki, “Azərbaycan bu turniri yüksək səviyyədə təşkil etmək üçün hər şey etmişdir. Mən ötən il Bakıda keçirilmiş Avropa klub çempionatı turnirində olmuşam və hesab edirəm ki, qarşıdakı yarış da möhtəşəm turnirlərdən biri olacaqdır”.
Beynəlxalq Otüstü Xokkey Federasiyasının yarışlar üzrə meneceri Dennis Meredit Azərbaycanın bu turnirə yüksək səviyyədə ev sahibliyi edəcəyinə əminliyini ifadə etmişdir. Yarışın təşkilatçısı “AtaHoldnq” Açıq Səhmdar Cəmiyyətinin Beynəlxalq Otüstü Xokkey Federasiyasının 4 sponsorundan biri olduğunu deyən Dennis Meredit bütün dünyada bu idman növünün inkişafına verdiyi dəstəyə görə holdinqin rəhbərliyinə təşəkkürünü bildirmişdir.
Tədbirdə iştirak edən gənclər və idman nazirinin müavini İsmayıl İsmayılov Azərbaycan Otüstü Xokkey Federasiyasının fəaliyyətindən, idmançılarımızın son illər qazandıqları nailiyyətlərdən danışmışdır. Nazir müavini federasiyanın regionlarımızda gördüyü işi yüksək qiymətləndirmişdir.
Qeyd edək ki, yarışda Azərbaycan, Belarus, Çili, İspaniya, Keniya və Ukrayna yığma komandaları mübarizə aparacaqlar. Yarışın təntənəli açılış mərasimi aprelin 12-də keçiriləcəkdir. Elə həmin gün Azərbaycan yığması
Çili komandası ilə ilk görüşünü keçirəcəkdir. Daha sonra Azərbaycan xokkeyçiləri, ardıcıl olaraq, Keniya (13 aprel), Belarus (15 aprel), İspaniya (16 aprel), Ukrayna (18 aprel) yığmaları ilə qarşılaşacaqdır.
Final görüşləri və turnirin bağlanış mərasimi aprelin 20-də keçiriləcəkdir.
######
Bölmənin digər xəbərləri
