Bakıda Özbəkistan universitetlərinin sərgisi keçirilib
Bakı, 3 may, AZƏRTAC
Mayın 3-də “İngla School Baku”nun təşkilatçılığı ilə AMEA Mərkəzi Elmi Kitabxanasında Özbəkistan universitetlərinin sərgisi keçirilib. Tədbirin tərəfdaşları Özbəkistan Ali Təhsil Nazirliyi, Özbəkistanın Azərbaycandakı səfirliyi, AMEA Mərkəzi Elmi Kitabxanasıdır (MEK).
“İngla School Baku”dan AZƏRTAC-a bildirilib ki, qardaş Özbəkistanın 15-dək nüfuzlu universitetindən 40-dan çox nümayəndə sərgiyə qatılıb.
Tədbirin rəsmi açılış mərasimində çıxış edən AMEA-nın prezidenti, akademik İsa Həbibbəyli Azərbaycan-Özbəkistan münasibətlərinin qədim tarixə söykəndiyini vurğulayıb. Qeyd edib ki, özbək şairi Əlişir Nəvai türkcə yazdığı “Xəmsə”sində Nizami Gəncəvini ustadı adlandırıb, Məhəmməd Füzuli isə Nəvaidən öz müəllimi kimi bəhs edib: “Bu münasibətlər Ulu Öndər Heydər Əliyevin təşəbbüsü ilə həm sovet dövründə, həm də müstəqillik illərində davamlı şəkildə inkişaf etdirilib. Özbəkistan Azərbaycan üçün sadəcə dost deyil, qardaş ölkədir. Elm və təhsil sahəsində əlaqələr də sürətlə genişlənir. Əlişir Nəvainin Özbəkistandan sonra ən çox təbliğ olunduğu və araşdırıldığı ölkə məhz Azərbaycandır”.
Milli Məclisin deputatı Müşfiq Cəfərov çıxışında son illərdə Özbəkistanda 100-ə yaxın xarici universitet filialının yaradıldığını bildirib və bu ölkədə təhsilin beynəlxalq səviyyədə inkişaf etdiyini vurğulayıb. O, Özbəkistanın Azərbaycanın Qarabağ bölgəsinin dirçəlişi istiqamətindəki töhfəsini də yüksək qiymətləndirərək deyib: “Biz bu sahədə əməkdaşlığı daha da gücləndirməliyik”.
Bu cür yüksəksəviyyəli tədbirin təşkilatçılarına təşəkkür edən Milli Məclisin deputatı Aydın Hüseynov çıxışında deyib: “Hər bir xalqın gələcəyi elm, təhsil və mədəniyyətdir. Ən önəmlisi isə iki qardaş ölkənin bu gün bir yerdə olmasıdır. Hesab edirəm ki, bu tədbirdən sonra əlaqələrimiz bütün sahələrdə daha da güclənəcək”.
Milli Məclisin deputatı Ceyhun Məmmədov da iki qardaş ölkənin əməkdaşlığının strateji əhəmiyyət daşıdığını qeyd edib. “Bu gün türk dövlətləri arasında əlaqələr daha da inkişaf edir. Özbəkistan Qarabağın bərpasında iştirak edir. Gənclərimizi Özbəkistanın, türk ölkələrinin universitetlərində təhsil almağa təşviq etməliyik. Bu cür sərgilər əlaqələrin möhkəmlənməsinə böyük töhfə verir”, - deyə o əlavə edib.
Tədbirdə Özbəkistanın Azərbaycandakı səfirinin mədəni işlər üzrə köməkçisi Atabəy Ramazanov iki ölkə arasındakı siyasi, mədəni, təhsil və digər istiqamətlərdəki əlaqələrdən, onun müsbət dinamikasından danışıb. O, gələcəkdə bu əlaqələrin daha da inkişaf edəcəyinə inandığını dilə gətirib.
Çıxış edən “Ingla School Baku”nun direktoru Lalə Nəsibova isə qeyd edib ki, sərgi azərbaycanlı tələbələrin Özbəkistan universitetlərinə marağını artıracaq: “Ümid edirəm ki, bu tədbir burada olan gənclər üçün gözəl dialoqun başlanğıcı olacaq. Sizi salamlayır və uğurlar arzulayıram”.
Özbəkistanın STARS Beynəlxalq Universitetinin rektoru Bəhram Qurbanov, Jurnalistika və Kütləvi Kommunikasiya Universitetinin prorektoru Rövşən Rajimjanov, Milli Tədqiqatlar Universiteti “Daşkənd İrriqasiya və Aqrotexnika Avtomatlaşdırma İnstitutu”nun prorektoru Bəxtiyar Khudayarov, Özbəkistan-Finlandiya Pedaqogika Universitetinin birinci prorektoru Zarifa Numinova çıxış edərək iki ölkənin təhsil, mədəni əlaqələrindən, gələcəkdə bu sahədə görülə biləcək işlərdən danışıblar. Onlar “İngla School Baku”ya təşkilatçılığa görə təşəkkür edərək, azərbaycanlı gəncləri Özbəkistanda təhsil almağa dəvət ediblər.
Sərgi çərçivəsində iştirakçılar Özbəkistanın tibb, mühəndislik, informasiya texnologiyaları və digər tələb olunan ixtisaslar üzrə tədris proqramları ilə tanış oldular, universitet nümayəndələri ilə birbaşa ünsiyyət qurublar. Təhsil almaq istəyənlər üçün təqaüd və müraciət imkanları haqqında da geniş məlumat təqdim olunub.
Tədbirin təşkilində əsas məqsəd iki ölkə arasında təhsil sahəsində əməkdaşlığı gücləndirmək, gənclərə alternativ və keyfiyyətli təhsil imkanları təqdim etmək idi.
Bölmənin digər xəbərləri
