Bakıda Qaradağ Sənaye Parkı yaradılacaq
Bakı, 3 iyun, AZƏRTAC
Prezident İlham Əliyev iyunun 3-də Qaradağ Sənaye Parkının yaradılması haqqında Sərəncam imzalayıb.
Sərəncamda bildirilir ki, Sənaye Parkı ölkədə qeyri-neft sektorunun davamlı inkişafının təmin edilməsi, sahibkarlığın dəstəklənməsi, müasir texnologiyalara əsaslanan rəqabətqabiliyyətli sənaye istehsalının təşkili və əhalinin istehsal sahəsində məşğulluğunun artırılması məqsədi ilə yaradılıb. Bakının Qaradağ rayonunun ərazisində yaradılacaq Sənaye Parkı sahibkarlıq fəaliyyətinin həyata keçirilməsi üçün zəruri infrastrukturu və idarəetmə qurumları olan, müasir texnologiyaların tətbiqi ilə rəqabətqabiliyyətli gəmiqayırma və digər sənaye istehsalı sahələrinin təşkili, xidmətlər göstərilməsi üçün istifadə edilən, sahibkarların səmərəli fəaliyyətinə və inkişafına əlverişli şərait yaradan ərazidir.
Qaradağ Sənaye Parkının fəaliyyətinin təşkili, idarə olunması və inkişafı ilə bağlı tədbirlər “Sumqayıt Kimya Sənaye Parkı” Məhdud Məsuliyyətli Cəmiyyəti tərəfindən həyata keçirilir.
Bölmənin digər xəbərləri
