“BAKİNSKİ RABOÇİ” QƏZETİNİN KOLLEKTİVİNƏ
Sizi, Azərbaycan mətbuatının qocaman nümunələrindən biri olan “Bakinski raboçi” qəzetinin bütün kollektivini əlamətdar yubiley – 100 illiyiniz münasibətilə təbrik edirəm.
Azərbaycanın mətbuat tarixində özünəməxsus dəst-xətti və mövqeyi ilə seçilən “Bakinski raboçi” qəzeti bütün dövrlərdə xalqımızın milli dəyərlərini həm ölkə daxilində, həm də beynəlxalq aləmdə yüksək səviyyədə təbliğ etmişdir. 1906-ci ildə əsası qoyulmuş qəzet Azərbaycanın nüfuzlu mətbuat orqanları içərisində həmişə məxsusi yer tutmuş, sabit oxucu auditoriyası qazanmış, vətəndaşların informasiyaya olan ehtiyaclarını ödəməyə çalışmış, öz prinsipial mövqeyi ilə seçilmişdir. Azərbaycanda iqtisadi, siyasi, sosial və mədəni həyatın bütün sahələri, vətəndaşları narahat edən ictimai problemlər və ümumiyyətlə, bütün aktual mövzular həmişə qəzetin diqqət mərkəzində olmuşdur. Rusdilli mətbuatın parlaq nümunəsi kimi “Bakinski raboçi” ölkəmizi və xalqımızı keçmiş SSRİ məkanında nüfuzlu bir qəzet kimi layiqincə təmsil etmişdir.
Müstəqillik illərində digər mətbu orqanlar kimi, “Bakinski raboçi” qəzeti də bazar iqtisadiyyatından irəli gələn yeni tələblər şəraitində işləməyə məcbur olmuş və müvafiq çətinliklərlə qarşılaşmışdır. Lakin qəzet kollektivinin səyləri nəticəsində “Bakinski raboçi” bu vəziyyətdən uğurla çıxmağı bacarmış və ölkənin sayılıb-seçilən mətbu orqanlarından birinə çevrilmişdir. Bu gün qəzet zamanın tələblərinə uyğun olaraq yenidən qurulmuş, öz mövzu dairəsini genişləndirmiş, məqsəd və vəzifələrini, iş prinsiplərini yeniləşdirmişdir.
Hüquqi dövlət, demokratik idarəçilik və siyasi plüralizm şəraitində mətbuatın qarşısında yeni vəzifələr durur, problemlərə yeni yanaşma tələb olunur. “Bakinski raboçi” qəzetinin kollektivi qısa müddətdə cəmiyyətin yeni tələblərini, qarşıda duran vəzifələri dərk edərək, dəyişən şəraitə uyğunlaşmanın öhdəsindən gəldi. Bu gün Azərbaycanın çoxsaylı mətbuat və informasiya vasitələri sırasında “Bakinski raboçi” qəzetinin öz yeri, dəst-xətti, prinsipləri vardır. Qəzetin səhifələrində müstəqil Azərbaycanın həqiqətləri, ölkədə sağlam mənəvi-psixoloji mühitin, vətəndaş həmrəyliyi və milli birliyin yaradılması istiqamətində aparılan məqsədyönlü işlər və ictimai-siyasi proseslər obyektiv, qərəzsiz işıqlandırılır. Qəzetdə ölkəmizdə və dünyada baş verən hadisələr barədə operativ xəbərlər, jurnalist araşdırmaları oxucular tərəfindən maraqla qarşılanır.
Düşünürəm ki, bütün Azərbaycan mətbuatı, o cümlədən “Bakinski raboçi” qəzeti mütərəqqi ənənələrimizi davam etdirərək, daim həqiqət carçısı rolunda çıxış edəcək, cəmiyyətdəki ictimai, siyasi və mənəvi prosesləri oxucuların müzakirəsinə çıxaracaq, vətəndaşların arzu və istəklərinin güzgüsünə cevriləcəkdir. Obyektiv jurnalistika, müstəqil mətbuat demokratik, vətəndaş cəmiyyəti yaradılmasının əsas şərtlərindəndir, onun güclü və əvəzolunmaz vasitəsidir.
İnanıram ki, fəaliyyət göstərdiyi bütün dövrlərdə öz amallarına sadiq qalmış “Bakinski raboçi” qəzetinin kollektivi bundan sonra da Azərbaycan həqiqətlərinin ölkə və dünya ictimaiyyətinə çatdırılmasında yüksək peşəkarlıq, obyektivlik, prinsipiallıq, əsil vətəndaş mövqeyi göstərərək, xalqımızın mütərəqqi mətbuat ənənələrini yeni şəraitdə layiqincə davam etdirəcəkdir.
Bir daha qəzetin kollektivini, keçmiş əməkdaşlarını səmimi qəlbdən təbrik edir, onlara cansağlığı, səadət və yeni yaradıcılıq uğurları arzu edirəm.
İlham Əliyev
Azərbaycan Respublikasının Prezidenti
Bakı şəhəri, 19 may 2006-cı il.
Bölmənin digər xəbərləri
