Balakəndə Xocalı faciəsi qurbanlarının xatirəsinə həsr olunmuş silsilə tədbirlər keçirilir
Balakən, 23 fevral (AZƏRTAC). Bəşər tarixinin ən qanlı cinayətlərindən olan Xocalı faciəsinin ildönümü ilə əlaqədar Yeni Azərbaycan Partiyası Balakən rayon təşkilatının qərargahında “dəyirmi masa” keçirilmişdir.
AZƏRTAC xəbər verir ki, Balakən Rayon Gənclər və İdman İdarəsi, Qarabağ Müharibəsi Əlilləri, Veteranları və Şəhid Ailələri İctimai Birliyinin rayon şöbəsi və YAP rayon təşkilatının birgə təşkilatçılığı ilə keçirilən tədbirdə çıxış edənlər ermənilərin 1992-ci il fevralın 25-dən 26-na keçən gecə Xocalıda həyata keçirdikləri qətliamın bəşəriyyətə və insanlığa qarşı törədilmiş ən dəhşətli cinayət olduğunu bildirmişlər. Bu amansız soyqırımının acı nəticələrinin dünya ictimaiyyətinə çatdırılmasında, Xocalı faciəsinə hüquqi-siyasi qiymət verilməsində ümummilli lider Heydər Əliyevin xidmətləri xüsusi vurğulanmışdır.
Faciənin ildönümü ilə əlaqədar Balakən Olimpiya İdman Kompleksində Xocalı qurbanlarının xatirəsinə həsr olunmuş idman yarışları da keçirilmişdir. Oğlanlardan ibarət komandalar arasında keçirilən voleybol turniri Sarıbulaq kənd məktəbi komandasının qələbəsi ilə başa çatmışdır. Sonrakı yerləri şəhər 1 nömrəli və Şərif kənd məktəblərinin komandaları tutmuşlar.
Kompleksdə təşkil olunan sərbəst güləş yarışlarında isə 80-ə yaxın idmançı 12 çəki dərəcəsində mübarizə aparmışdır. Yarışlara başlamazdan əvvəl Xocalı faciəsi qurbanlarının xatirəsi bir dəqiqəlik sükutla yad olunmuşdur.
Bölmənin digər xəbərləri
