Banqladeşdə Denge qızdırması 541 nəfərin həyatına son qoyub
Bakı, 13 dekabr, AZƏRTAC
Banqladeşdə yanvar ayından bəri Denge qızdırmasından ölənlərin sayı 541 nəfərə çatıb.
AZƏRTAC xəbər verir ki, bu barədə Banqladeşin səhiyyə xidməti baş idarəsi məlumat yayıb.
Məlumata görə, son sutka ərzində ölkədə 344 nəfər qızdırma simptomları ilə xəstəxanalara yerləşdirilib, Dəkkə şəhərində isə beş nəfər ölüb. Hazırda səhiyyə müəssisələrində 1840 nəfər bu virusdan müalicə olunur. 2024-cü il yanvarın 1-dən etibarən ölkədə Denge xəstəliyinə 98 min nəfər yoluxub.
Banqladeşdə Denge qızdırmasının ilk böyük epidemiyası 2000-ci ildə qeydə alınıb. 2023-cü ildə virusa yoluxanların sayı 321 min nəfər, ölənlərin sayı isə 1705 nəfər olub. Xəstəlik ölkədə adətən musson mövsümündə - iyun ayından sentyabradək intensiv yayılır. Lakin bu il epidemiyanın hələ də davam etdiyi görünür.
Qeyd edək ki, tropik və subtropik iqlimə malik ölkələrdə geniş yayılan bu virus ağcaqanadlar tərəfindən ötürülür. Ümumdünya Səhiyyə Təşkilatının məlumatına görə, Denge son illər bütün regionlarda sürətlə yayılan infeksiyaya çevrilib.
Bölmənin digər xəbərləri
