BAS NAZİR İLHAM ƏLİYEV CAVAD XANIN MƏZARINI ZİYARƏT ETDİ
Cavad xanın məzarı qarşısında İlham Əliyevi səmimiyyətlə salamlayan məscidin axundu hacı TAHİR ABBASOV dedi:
-Cənab Baş nazir, Gəncə camaatı Sizə öz təşəkkürünü bildirir. Çünki şəhərimizin sakinləri bilirlər ki, Azərbaycan dövlətini quran, onu yaradan, üçrəngli bayrağını göylərə qaldıran, güclü ordu yaradan, ölkəmizə sülh və əmin-amanlıq gətirən, analarımızın başından qara yaylıq götürən və onların üzünə təbəssüm gətirən cənab Heydər Əliyevdir. Onun davamçısı Sizsiniz. Biz Sizin xidmətlərinizi bəyənirik, Avropa Şurasındakı fəaliyyətinizi, Olimpiya Komitəsində gördüyünüz işləri dəstəkləyirik. Birləşmiş Millətlər Təşkilatında dünya dövlətlərinin başçıları qarşısında ingilis dilindəki çıxışınızı hər birimiz alqışladıq və iftixarla dəstəklədik. Bu gün biz bir nəfər kimi Sizin arxanızdayıq.
Mən bir gəncəli kimi, Cavad xan övladı kimi bütün Cavad xan oğulları adından, bütün şəhid ailələri və müharibə əlilləri adından, bütün Gəncəbasar adından deyirəm. Biz bir nəfər kimi hər zaman Sizinləyik.
Möhtərəm cənab İlham Əliyev, mən doqquz ay Lefortovo məhbusu olmuşam. Vətənim Azərbaycan uğrunda vuruşmuşam və başımdan yaralanmışam. Mən Qarabağ müharibəsi əliliyəm. Üzüqara müxalifətə üzümü tutub deyirəm, Cavad xanın yurdunu bombalamaq istəyən İsa Qəmbərə deyirəm. O, parlamentdə böyük həvəslə Fəhmin Hacıyevi dinləyirdi.
Fəhmin Hacıyev isə Gəncəni bombalayacağıq deyirdi. Mən AXC-Müsavat hakimiyyətini görmək istəyənləri Şəhidlər xiyabanına dəvət edirəm. 1992-1993-cü illərdə cavanlarımız qırğına məruz qaldı, gəlinlərimizin başına qara yaylıqlar bağlandı. Azərbaycan separatizmin qurbanına çevrilirdi. Cənubda “Talış Muğan Respublikası” yaradılır, şimalda sadvalçılar baş qaldırmışdı. Bunların hamısının qarşısını cənab Heydər Əliyev almışdır. O, Azərbaycana sülh, əmin-amanlıq gətirmişdir. Eşq olsun cənab Heydər Əliyevə! Mən Gəncə bölgəsinin ali ruhanisi kimi qədim Şah Abbas məscidi önündə, Cavad xanın məzarı önündə üzümü Allah dərgahına tutub ali rəhbər cənab Heydər Əliyevə, Azərbaycanın parlaq günəşi cənab İlham Əliyevə dua edirəm. Allah Sizi hifz etsin, xalqımıza, millətimizə ruzi, bərəkət qismət eləsin.
Baş nazir İLHAM ƏLİYEV toplaşanlara müraciətlə dedi:
-Əziz bacılar və qardaşlar, bu xoş sözlərə görə sizə minnətdarlığımı bildirirəm. Bilirsiniz ki, möhtərəm cənab Prezident Gəncəyə həmişə qayğı göstərmişdir. Bu diqqətin və qayğının nəticəsində uzun illər ərzində yaranmış çətinliklər, ilk növbədə sosial problemlər öz həllini tapır. Bir az bundan əvvəl Gəncə gil-torpaq zavodunda böyük bir mərasim keçirilmişdir və mən zavodla tanış oldum. Çox sevindim ki, artıq 2700 insan orada işlə təmin olunmuşdur. Digər müəssisələrdə - qənnadı fabrikində, şərab zavodunda, əlvan metallar zavodunda yeni iş yerləri açılıb və gələcəkdə də bu proses davam edəcəkdir. Azərbaycanda minlərlə, on minlərlə, yüz minlərlə iş yerləri açılacaqdır. Gəncədə işıq təminatı sahəsində, qazın verilməsində böyük problemlər var idi. Mən 2000-ci ildə burada olarkən çox narahat oldum ki, Gəncə kimi Azərbaycanın qədim və ikinci əhəmiyyətli şəhəri belə problemlərlə üzləşibdir. Sizin də bildiyiniz kimi, görülən tədbirlərin nəticəsində şəhər demək olar ki, tamamilə qazla, işıqla təmin olunmuşdur.
Bilməlisiniz ki, ancaq qazın alınması üçün Azərbaycan hökuməti hər il Rusiyaya 210 milyon dollar ödəyir. Biz bunu edirik ki, insanlarımız qazdan korluq çəkməsinlər. Əgər Bakıda qaz, işıq varsa, Gəncədə də olmalıdır. Su təminatı məsələsi də həllini tapacaqdır. Bu sahədə işlər görülür, kreditlər ayrılmışdır, nəticədə verilən suyun həcmi də, keyfiyyəti də artırılacaqdır. Digər məsələlər də öz həllini tapacaqdır. Mən sizi əmin etmək istəyirəm ki, Azərbaycan Prezidenti Heydər Əliyevin siyasəti davam edəcəkdir. Gəncə şəhərinə və əhalisinə keçmişdə göstərilən diqqət və məhəbbət bundan sonra göstəriləcəkdir.
Mən daim sizinlə birlikdə olacağam və sizin problemlərlə məşğul olacağam. Bütün problemləri biz birlikdə həll edəcəyik, Azərbaycanı zəngin və qüdrətli dövlətə çevirəcəyik. Bu işləri görmək üçün gəncəlilərin dəstəyinə ehtiyac vardır. Mən bu dəstəyi duyuram, hiss edirəm. Olimpiya Komitəsi tərəfindən Gəncədə tikilmiş idman kompleksi fəaliyyət göstərir. Bu gün bu barədə mənə məlumat verildi və çox sevindim ki, artıq uşaqlar, gənclər öz asudə vaxtlarını orada keçirirlər. Bu, onların həm fiziki cəhətdən sağlamlığı, həm də mənəvi cəhətdən saflığı üçün çox vacibdir. Əminəm ki, Azərbaycanda möhkəm, sağlam gənc nəsil yetişəcəkdir və bizim torpaqlarımızı qoruyacaqdır.
Azərbaycan artıq bütün beynəlxalq təşkilatlarda öz sözünü deyir. Avropa Şurası kimi mötəbər beynəlxalq təşkilat Ermənistanı işğalçı dövlət kimi tanıyır. Birləşmiş Millətlər Təşkilatının tribunasından Ermənistanı ifşa edən nitqlər söylənibdir. Bu fəaliyyət davam etdiriləcəkdir. Əlbəttə, biz çalışacağıq ki, problemi sülh yolu ilə həll edək. Amma bizim səbrimiz də tükənməz deyildir. Azərbaycanın güclü ordusu, cəsarətli xalqı vardır. Biz hər an torpaqlarımızı azad etməyə hazır olmalıyıq. Beləliklə, çalışaraq, Azərbaycanı qüdrətli, zəngin dövlətə çevirməliyik.
Bir daha təşəkkür edirəm. Siz məni çox səmimiyyətlə qarşıladınız və bilməlisiniz ki, mənim də sizə münasibətim çox səmimidir.
X X X
Sonra Baş nazir İlham Əliyev Gəncənin gözəl guşələrindən olan Xan bağına gəldi, burada şəhər ictimaiyyətinin nümayəndələri ilə görüşüb, onların problemləri və qayğıları ilə maraqlandı. Gəncəlilər Azərbaycan hökumətinin rəhbərinə xoş arzularını ifadə etdilər və ölkəmizin gələcəyini yalnız İlham Əliyevdə gördüklərini bildirdilər.
X X X
Daxili işlər naziri Ramil Usubov, nəqliyyat naziri Ziya Məmmədov, vergilər naziri Fazil Məmmədov, Prezidentin İcra Aparatının şöbə müdiri Yusif Hümbətov, Milli Məclisin deputatları və digər rəsmi şəxslər də Baş nazirlə birlikdə Gəncədə olmuşlar.
Bölmənin digər xəbərləri
