BƏƏ-də kriptovalyuta ilə daşınmaz əmlak almaq mümkün olacaq
Bakı, 2 sentyabr, AZƏRTAC
“RAK Properties” inşaat şirkəti yeni xidmətini işə salıb. Belə ki, indi Ras Əl-Xayma Əmirliyində daşınmaz əmlakı kriptovalyuta ilə almaq olar. Bunun üçün şirkət “Hubpay” platforması ilə əməkdaşlığa başlayıb.
AZƏRTAC xarici mətbuata istinadla xəbər verir ki, hesablaşmalar birbaşa kriptovalyuta ilə aparılmayacaq. “Hubpay” vasitəsilə bütün ödənişlər avtomatik olaraq dirhəmə çevriləcək və yalnız bundan sonra inşaat şirkətinin hesabına köçürüləcək.
Ödəniş üçün Bitcoin, Ethereum, USDT və bir sıra digər kriptovalyuta növləri qəbul edilir, onların tam siyahısı hələ açıqlanmır.
“Hubpay” Virtual Aktiv Tənzimləmə Qurumunda (VARA) qeydiyyatdan keçib və əməliyyatların təhlükəsizliyini və şəffaflığını təmin edən Əbu-Dabi Beynəlxalq Maliyyə Mərkəzi (ADGM) tərəfindən ona nəzarət olunur.
“RAK Properties”in maliyyə direktoru Rahul Coqaninin sözlərinə görə, yeni xidmət Mina Əl Ərəb bölgəsinə investisiyaları dünyanın hər yerindən olan müştərilər üçün daha əlçatan və rahat edəcək. “Rəqəmsal aktivlərin dəstəklənməsi texnologiya və rəqəmsal maliyyə sahəsində yaxşı biliklərə malik olan investorları cəlb etməyə, həmçinin “RAK Properties”in müasir və etibarlı tərtibatçı kimi imicini gücləndirməyə kömək edir”, -deyə o bildirib.
Şirkət qeyd edib ki, “Hubpay” ilə əməkdaşlıq Ras Əl-Xaymada blokçeyn texnologiyalarının tətbiqinə və kriptovalyutaların istifadəsinə yönəlmiş “Vision-2030” strategiyasına tam uyğundur.
Bu, BƏƏ-nin ölkədə rəqəmsal maliyyə xidmətlərinin sürətli inkişafını təsdiqləyən ilk belə təşəbbüsü deyil.
Bölmənin digər xəbərləri
