BERLİNDƏ 20 YANVAR ŞƏHİDLƏRİNİNXATİRƏSİ YAD EDİLMİŞDİR
Berlində fəaliyyət göstərən Nizami Gəncəvi adına Mədəniyyət İnstitutunda keçirilən xatirə mərasimində səfir Pərviz Şahbazov başda olmaqla Azərbaycanın Almaniyadakı diplomatik missiyası, Almaniya Kansler İdarəsi və Berlin Senatının rəsmiləri, Bundestaqın üzvləri, Türkiyə Cümhuriyyətinin Berlindəki baş konsulu Əli Alpmanın başçılıq etdiyi diplomatik korpusun nümayəndələri, Avropa Azərbaycanlıları Konqresi rəyasət heyətinin sədri Bahəddin Kaya, Almaniya ictimaiyyətinin nümayəndələri və Azərbaycan diasporunun öndərləri, azərbaycanlı, türk və alman tələbələr və mətbuat nümayəndələri iştirak edirdilər.
İnstitutun girəcəyində və dəhlizində şəhidlərin şəkilləri önünə düzülmüş qərənfillər və yandırılan şamlar o müdhiş, qanlı gecənin bütün dəhşətlərini xatırladırdı.
Azərbaycanın müstəqilliyi, işıqlı, azad gələcəyi uğrunda canlarını qurban vermiş şəhidlərimizin xatirəsi bir dəqiqəlik sükutla yad edildi.
Anma mərasimini giriş sözü ilə açan, Qanlı Yanvar gecəsinin canlı şahidi, Nizami Gəncəvi adına Mədəniyyət İnstitutunun direktoru Nuridə Atəşi faciə barədə bütün həqiqətləri can yanğısı ilə söylədi və müəllifi olduğu “Qarabağımız - qara bağrımız” kitabından Qanlı Yanvar və Xocalı faciələri ilə bağlı bölümləri mərasim iştirakçılarına təqdim etdi.
Mərasimdə çıxış edərək 20 Yanvar faciəsinin baş verməsi səbəblərini açıqlayan Azərbaycanın Almaniyadakı səfiri Pərviz Şahbazov, xalqımızın on altı il öncə sovet imperiyası tərəfindən mənəvi, siyasi və cismani terrora məruz qaldığını, hadisənin xalqımızın azadlıq, müstəqillik və milli dövlətçilik amallarına sədaqətinə, qeyrətinə və vətənpərvərliyinə, ümumiyyətlə insanlığa qarşı yönəldilmiş dəhşətli cinayət kimi səciyyələndirdi.
Sonra mərasim iştirakçılarına 20 Yanvar faciəsinin dəhşətlərindən bəhs edən “Qanlı Bakı” televiziya filmi nümayiş etdirildi.
Mərasimdə, həmçinin Nizami Gəncəvi adına Mədəniyyət İnstitutunun 2005-ci ildə elan etdiyi “Tarix boyu Azərbaycan xalqına qarşı aparılmış soyqırımı” müsabiqəsinin nəticələrinə yekun vuruldu. Müsabiqənin qalibi, hazırda Almaniyada yaşayan soydaşımız, Qarabağda üç il savaşan müharibə əlili Yadigar Təngərüdlüyə mükafat olaraq institut tərəfindən çap edilmiş “Vətən mənə gün verməz qürbətdə yaşayam” kitabı verilmişdir.
Bölmənin digər xəbərləri
