Berlində Xocalı soyqırımı qurbanlarının xatirəsi yad edilmişdir
Berlin, 24 fevral (AZƏRTAC). Almaniyadakı Türk-Azərbaycan Birliyinin (TAVD), Almaniyadakı Azərbaycanlıların Əlaqələndirmə Mərkəzinin (AAKM), Berlin-Brandenburg Atatürkçü Duşuncə Dərnəyinin (ADD) təşkilatçılığı və Azərbaycan Respublikasının Almaniyadakı səfirliyinin dəstəyi ilə Xocalı soyqırımının 22-ci ildönümü fevralın 22-də Berlində yad edilmişdir.
Berlindəki Türk Evində təşkil olunan tədbirdə Azərbaycanın Almaniyadakı səfiri Pərviz Şahbazov, Türkiyənin Berlindəki baş konsulu Ahmet Başar Şen, Azərbaycan Respublikası Milli Məclisinin deputatı Azay Quliyev, Azərbaycan Milli Elmlər Akademiyasının Qarabağ şöbəsinin müdiri, tarix elmləri doktoru Qasım Hacıyev, “Erməni təcavüzünün tanıdılması” ictimai birliyinin nümayəndəsi, yazıçı Səriyyə Cəfərova, Türkiyə və Azərbaycan diasporunun təmsilçiləri iştirak etmişlər.
Mərasimdə əvvəlcə Xocalı faciəsi qurbanlarının və şəhidlərimizin ruhu bir dəqiqəlik sükutla yad edilmiş, Azərbaycanın dövlət himni və Türkiyənin istiqlal marşı səsləndirilmişdir.
AAKM-nin icraçı direktoru Samira Patzer-İsmayılova çıxış edərək Xocalı soyqırımı həqiqətlərinin Almaniya ictimaiyyətinə çatdırılması ilə əlaqədar keçirilən tədbir və aksiyalar haqqında məlumat vermiş, bu günlərdə Almaniyada 30-a yaxın belə tədbirin keçirildiyini bildirmişdir. O, Almaniyadakı Azərbaycan və Türkiyə diaspor təşkilatlarının nümayəndələrinin Dialoq və Əməkdaşlıq uğrunda İslam Konfransı Gənclər Forumunun Mədəniyyətlərarası Dialoq üzrə baş əlaqələndiricisi Leyla Əliyeva tərəfindən irəli sürülmüş “Xocalıya ədalət!” beynəlxalq təbliğat və məlumatlandırma kampaniyasında fəal iştirak etdiklərini qeyd etmişdir.
ADD-nin sədri Olcay Başegmez Azərbaycan diasporu ilə sıx əməkdaşlıq etdiklərini və birgə anım tədbirlərinin keçirildiyini vurğulamışdır. .
Azərbaycan Respublikasının Almaniyadakı səfiri Pərviz Şahbazov çıxışında Türk Evində türk icması ilə birgə mühüm tədbirlərin keçirilməsinin artıq ənənəvi hal aldığını bildirmiş və bunu sevindirici hal kimi dəyərləndirmişdir. O bildirmişdir ki, Türkiyə və Azərbaycan diaspor təşkilatları Almaniyada sıx əməkdaşlıq edir, bir-birini dəstəkləyir və ulu öndər Heydər Əliyevin nəsihəti olan “Bir millət, iki dövlət” ideyasını əks etdirirlər. Səfir demişdir ki, son illər Almaniyada Azərbaycana qarşı münasibət dəyişmiş və Dağlıq Qarabağ problemi ilə bağlı bir sıra qətnamələr qəbul edilmişdir. O, Prezident İlham Əliyevin Dağlıq Qarabağ münaqişəsinin həllinin sülh yolu ilə və yalnız Azərbaycanın ərazi bütövlüyü çərçivəsində həll edilməsini qarşıya məqsəd qoyduğunu vurğulamışdır.
Türkiyənin Berlindəki baş konsulu Ahmet Başar Şen Xocalı soyqırımı haqqında danışmış, bildirmişdir ki, Azərbaycan xalqına qarşı edilən haqsızlıq Türkiyə xalqını da kədərləndirir. Bu səbəbdən Türkiyə bu acı və üzüntüləri Azərbaycan ilə paylaşır. Türkiyə Azərbaycanı hər zaman dəstəkləyəcəkdir.
Çıxışlardan sonra Heydər Əliyev Fondunun hazırladığı “Xocalı qətliamı” adlı tarixi - sənədli film nümayiş etdirilmişdir.
Filmin nümayişindən sonra Milli Məclisin deputatı Azay Quliyev, tarix elmləri doktoru Qasım Hacıyev, yazıçı-publisist Səriyyə Cəfərova Türkiyə-Azərbaycan qardaşlığından danışmış, Dağlıq Qarabağ münaqişəsi ilə bağlı mülahizələrini söyləmişlər.
Xocalıda anadan olmuş və faciə nəticəsində ailəsini itirmiş Səriyyə Cəfərova həmin günlərdə baş verən dəhşətləri yada salmış, öz ürək ağrılarını qələmi ilə ifadə etdiyini, ictimai fəaliyyətinin həqiqətlərin təbliğatına həsr olunduğunu bildirmişdir. O, Xocalı soyqırımının beynəlxalq ədalət məhkəməsi səviyyəsinə qaldırılacağına və yaxın gələcəkdə doğulduğu Xocalı şəhərinə - tarixi Vətəninə qayıdacağına inandığını vurğulamışdır.
Azay Quliyev Xocalı soyqırımını dünya miqyasında tanımış ölkələr haqqında məlumat vermiş, gələcəkdə görüləcək işlərdən danışmışdır. Azərbaycan Prezidenti İlham Əliyevin “Bir millətin iki diasporu olmaz” sözlərini xatırladan deputat Türkiyə-Azərbaycan diasporunun növbəti birgə addımları barədə fikirlərini bölüşmüş, bu əməkdaşlığın gələcək üçün çox önəmli olduğunu qeyd etmişdir.
Qasım Hacıyev Azərbaycanın qədim tarixi, mədəniyyəti, eləcə də Ermənistan-Azərbaycan, Dağlıq Qarabağ münaqişəsinin tarixi, səbəbləri və türk millətinə qarşı yönəldilmiş soyqırımı aktları barədə maraqlı faktları diqqətə çatdırmışdır.
Tədbirdən sonra qonaqlar və müzakirələri davam etdirmiş, iştirakçıların sualları cavablandırılmışdır.
Vüqar Seyidov
AZƏRTAC -ın xüsusi müxbiri
Berlin
Bölmənin digər xəbərləri
