Bərpa prosesi mərhələli və planlı şəkildə həyata keçirilir
Bakı, 3 fevral, AZƏRTAC
Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusu 30 il işğal altında olan torpaqlarımızı azad edərək, ərazi bütövlüyümüzü bərpa etdi. İndi qarşımızda duran əsas vəzifə işğaldan azad edilmiş kəndlərimizi və şəhərlərimizi yenidən qurub bərpa etməkdir. Artıq bərpa işlərinə start verilib. Rayon mərkəzləri və kəndlərimizə yeni yollar çəkilir, Füzuli rayonunda beynəlxalq hava limanının tikintisinə başlanılıb. Təkcə, Azərbaycanın deyil, İslam dünyasının mədəniyyət beşıyi hesab edilə biləcək Şuşa şəhərinin yenidən qurulması ilə bağlı mühüm işlər həyata keçirilir.
Bunu AZƏRTAC-a açıqlamasında Milli Məclisin deputatı Kamilə Əliyeva deyib.
K.Əliyeva bildirib ki, Prezident İlham Əliyevin Azərbaycan Televiziyasına verdiyi müsahibəsində qeyd etdiyi kimi, bütün işlər mərhələli və planlı şəkildə həyata keçirilir. İlk növbədə, ermənilərin xaraba qoyduqları şəhər və kəndlərimizə dəyən ziyanın məbləği hesablanmalıdır. Öz torpaqlarından məcburi köçürülən vətəndaşlarımızın doğma yurdlarına qayıtmaları üçün kompleks tədbirlər görülür. Təbii ki, təhlükəsizlik nöqteyi-nəzərindən, əvvəlcə ərazilər minadan təmizlənir. Təəssüf ki, ermənilər yenə də öz riyakarlıqlarından əl çəkməyərək, minalanmış sahələrin xəritələrini Azərbaycan tərəfinə verməkdən imtina edirlər.
Deputatın sözlərinə görə, infrastrukturun qurulması və insanların köçüb öz torpaqlarında yaşamaları üçün dövlətimiz tərəfindən müvafiq addımlar atılır. Bərpa işlərinin aparılması üçün Əlaqələndirmə Qərargahı yaradılıb: “Artıq Şuşa şəhərinə Prezidentin xüsusi nümayəndəsi təyin edilib. Görüləcək və planlaşdırılmış bütün işlərə Əlaqələndirmə Qərargahında baxılır və müvafiq qərarlar qəbul edilir. Şuşa şəhəri bizim üçün xüsusi önəm kəsb edir. Dövlətimizin başçısı Şuşa şəhərini Azərbaycanın mədəniyyət paytaxtı elan edib. Bu şəhər əvvəlki memarlıq üslubunu saxlamaqla elə bərpa edilməlidir ki, gələcəkdə buranı ziyarət edəcək hər bir yerli və xarici vətəndaşların marağına səbəb olsun”.
Kamilə Əliyeva vurğulayıb ki, biz nəinki mədəniyyət paytaxtımız olan Şuşanı, bütün Qarabağı cənnət məkanına çevirəcəyik. Çünki Azərbaycan dövlətinin və xalqının buna kifayət qədər gücü və imkanı vardır.
Bölmənin digər xəbərləri
