Bəxtiyar Vahabzadəsiz 16 il - Böyük şairin ev muzeyindən xüsusi REPORTAJ VİDEO
Şəki, 13 fevral, AZƏRTAC
Bu gün Azərbaycanın Xalq şairi, ədəbiyyatımızın parlaq simalarından olan Bəxtiyar Vahabzadənin vəfatının 16-cı ildönümüdür. Bununla əlaqədar AZƏRTAC-ın bölgə müxbiri şairin Şəkidə yerləşən ev muzeyində olub, muzeyin əməkdaşları ilə görüşüb.
Böyük şair B.Vahabzadənin ev muzeyi Şəkinin Yuxarı Baş məhəlləsində yerləşir. Şair sağlığında buranın uşaq bağçası kimi fəaliyyət göstərməsini istəyib. Lakin dövlətimiz balaca fidanlar üçün yaxınlıqda yeni uşaq bağçası inşa edərək şairin evini muzeyə çevirib.
Bu həyətə ilin hansı fəslində gəlməkdən asılı olmayaraq, insan sanki hansısa sehrli bir aləmə düşür, ovsunlanır. İnsanda fərqli bir ovqat yaranır. Ev muzeyinin direktoru, B.Vahabzadə yaradıcılığının tədqiqatçısı Elşən Zəkəriyyəbəyli bildirib ki, 80-dən çox şeir kitabı ilə böyük oxucu sevgisi qazanan B.Vahabzadə 2 monoqrafiyanın, 11 elmi-publisist kitabın və yüzlərlə məqalənin müəllifi kimi öz sözünü deyib. Həmçinin görkəmli söz ustadı hələ ötən əsrin 60-cı illərindən ölkəmizdə sovet imperiyasına qarşı milli azadlıq hərəkatının öncüllərindən biri olub. İki yerə parçalanmış Azərbaycanın tarixi faciəsini 1959-cu ildə yazdığı "Gülüstan" poeması ilə dilə gətirərək, imperiya pəncəsi altında inləyən Azərbaycan xalqının azadlıq və istiqlal uğrundakı ədalətli mübarizəsinə qoşulub.
“B.Vahabzadə bu evdə dünyaya gəlib və 9 yaşınadək burada yaşayıb. Üç otaqdan ibarət muzeydə 980 eksponat nümayiş olunur. Birinci otaq şairin iş dünyasını, ikincisi yaradıcılığını, üçüncüsü isə ictimai-siyasi fəaliyyətini əhatə edir. Burada şairin orden və mükafatları, eləcə də bir çox ölkələrdə keçirdiyi görüşlərdən fotoşəkillər yer alıb. B.Vahabzadənin Bakıdakı evindən yazı masası, kitabları və şəxsi əşyaları Şəkiyə gətirilib və burada qorunur. Burada, eyni zamanda, şairin atası, anası, babası, övladları və xanımı ilə olan şəkillər nümayiş etdirilir. Şairin kitabları 29 dilə tərcümə olunub. O, bütün yaradıcılığı ilə mənsub olduğu millətin yaddaşına hopmuş sənətkar kimi tarixin bütün zamanlarında hörmət və ehtiramla anılır. B.Vahabzadə xalqımızın yüz illər boyu təşəkkül tapmış yüksək milli-mənəvi dəyərlərinin qorunması, adət-ənənələrimizin yaşadılması naminə 60 ildən çox müddətdə yorulmadan yazıb-yaradıb”, - deyə o bildirib.
E.Zəkəriyyəbəyli deyib ki, B.Vahabzadə yaradıcılığında əsas mövzulardan biri ana dilidir. Onun qəti qənaətinə görə, dil xalqın varlığının nişanələrindən biri, onun ən qiymətli sərvətidir. Həm də nəsillər silsiləsini birləşdirən, babaların vəsiyyətini nəvələrə çatdıran qüdrətli tərbiyə vasitəsidir. “Görkəmli şərqşünas alim Əhməd Şmide yaradıcılığını dərindən öyrəndiyi, əsərlərini alman dilinə tərcümə etdiyi Vahabzadə barədə belə deyib: "Bir insanın öz xalqını və doğma dilini dəlicəsinə sevə bilmək qabiliyyətini mən Bəxtiyar Vahabzadədən öyrəndim”. Şairin Əhməd Şmide haqda qələmə aldığı şerin əlyazması muzeydə nadir eksponat kimi nümayiş olunur”, - deyə muzeyin direktoru qeyd edib.
Ev muzeyinin direktoru həm də bu il böyük şairin 100 illik yubileyi olduğunu xatırladıb. O, bu yubileyə hazırlaşdıqlarını və indidən müxtəlif tədbirlərin keçirildiyini bildirib. “Artıq Şəkidə şairin 100 illik yubileyi münasibətilə tədbirlərə start verilib. Şəki şəhər 3 nömrəli musiqi məktəbinin kollektivi Şəki Dövlət Dram Teatrında “Bəxtiyar sözü Azərbaycan musiqisində” adlı geniş konsert proqramı ilə çıxış edib, şairin sözlərinə bəstələnən əsərlər səsləndirilib. Ötən il ev muzeyini 53 ölkədən 9870 nəfər ziyarət edib. Bu il isə şairin 100 illik yubileyi ilə əlaqədar gələnlərin sayının 10 mindən çox olacağını gözləyirik”, - deyə o vurğulayıb.
E.Zəkəriyyəbəyli, həmçinin qəlblərdə əbədi taxt quran B. Vahabzadənin 100 illik yubileyinin adına layiq qeyd olunacağına inandığını deyib.
Bölmənin digər xəbərləri
