BEYNƏLXALQ ƏLİLLƏR GÜNÜ MÜNASİBƏTİLƏ İDMAN TƏDBİRLƏRİ
Azərbaycan Milli Paralimpiya Komitəsi Beynəlxalq Əlillər günü münasibətilə idman yarışları keçirmişdir.
Respublika Milli Paralimpiya Komitəsinin baş katibi, əməkdar bədən tərbiyəsi və idman xadimi Afiq Süleymanov AZƏRTAC-ın müxbirinə bildirmişdir ki, Sumqayıt Paralimpiya Mərkəzində şəhərin Qarabağ müharibəsi veteranları olan voleybolçulardan ibarət komandalar arasında yoldaşlıq oyunu keçirilmişdir. Veteranlar əsl idman ruhu və qələbə əzmi nümayiş etdirmişlər. Bu oyun əlil gənclərin yüksək potensiala malik olduğunu göstərdi. Elə həmin gün əlillərin uşaqları və valideyn qayğısından məhrum uşaqlar üçün internat-məktəblər arasında futbol turnirinin final görüşü olmuşdur.
Xatırladaq ki, ölkəmizdə nadir idman kompleksi sayılan Sumqayıt Paralimpiya Mərkəzi dövlətimizin başçısı İlham Əliyevin göstərişi ilə tikilmişdir. Burada əlillərin idmanla məşğul olması və onların asudə vaxtının təşkili üçün hər cür şərait yaradılmışdır. Bir rəmzi faktı da qeyd edək ki, sözügedən mərkəz Pekində XIII Paralimpiya Oyunlarının açılışı ərəfəsində istifadəyə verilmişdir. Bu münasibətlə keçirilən təntənəli mərasimdə iştirak etmiş Azərbaycan Prezidenti İlham Əliyev ölkəmizin milli paralimpiya komandasına xeyir-dua vermişdi.
Bölmənin digər xəbərləri
