BEYNƏLXALQ FUTBOL TƏŞKİLATLARI AZƏRBAYCAN FUTBOLUNUN İNKİŞAFINA KÖMƏK EDƏCƏKLƏR
Yanvarın 18-də FİFA prezidenti Yozef Blatter MDB ölkələri futbol federasiyalarının prezidentləri ilə görüşmüşdür.
AZƏRTAC-ın xüsusi müxbiri xəbər verir ki, bundan əvvəl AFFA prezidenti Ramiz Mirzəyevin FİFA prezidenti Yozef Blatterlə ikitərəfli görüşü olmuş və görüşdə bu təşkilatın AFFA ilə gələcək əməkdaşlığının perspektivləri müzakirə edilmişdir.
R.Mirzəyev bu görüşün yekunlarını şərh edərək bildirmişdir ki, tərəflər arasında gələcək əməkdaşlıq barədə geniş fikir mübadiləsi aparılmış və Azərbaycan futbolunun inkişafı sahəsində bu əməkdaşlığın konkret istiqamətləri müəyyənləşdirilmişdir. Milli futbolun inkişafının mövcud vəziyyəti və AFFA-nın yaxın perspektiv üçün nəzərdə tutduğu planlar barədə FİFA prezidentinə məlumat verilmişdir. Eyni zamanda vurğulanmışdır ki, son 10 ildə respublika rəhbərliyi Azərbaycanda idmanın inkişafına xüsusi diqqət yetirir və bu öz bəhrəsini verməkdədir. Təəssüf ki, müəyyən obyektiv səbəblərə görə, idmanın futbol kimi populyar növündə bunu demək olmaz. Belə vəziyyət idmanın bu növünə dövlətin az diqqət yetirməsi ilə deyil, müəyyən obyektiv səbəblər üzündən yaranmışdır. Bu səbəbləri aradan qaldırıb çox yaxşı nəticələr əldə etmək mümkündür. Hazırda milli futbol komandamızın Avropa və beynəlxalq miqyaslı yarışlarda yaxşı çıxış edə bilməsi üçün əlverişli şərait yaradılır. R.Mirzəyev qeyd etmişdir ki, Azərbaycanın dövlət və qeyri-dövlət qurumları tərəfindən göstərilən yardımla yanaşı, FİFA və UEFA da, məsələn, uşaq futbol məktəblərinin təşkilinə, futbolçular üçün idman bazası tikintisinə və digər layihələrin həyata keçirilməsinə kömək göstərəcəklər.
AFFA rəhbəri demişdir: “ AFFA-nın planlaşdırdığı tədbirlər – Azərbaycan futbolçularının ixtisasartırma kurslarında iştirakı, məşqçilərin, hakimlərin, futbolçuların xüsusi hazırlığı, xaricdən məşhur futbolçuların dəvət olunması nəticəsində 5 il ərzində peşəkar futbol yaratmaq və futbolumuzu beynəlxalq səviyyəyə qaldırmaq mümkün olacaqdır”.
R.Mirzəyev komandamızın “Birlik çempionları kuboku” Xİİ beynəlxalq futbol turnirində iştirakını çox səmərəli və faydalı tədbir kimi qiymətləndirmişdir. AFFA prezidentinin sözlərinə görə, onun Moskvada görüşdüyü futbol təşkilatlarının başçıları idmanın inkişaf etdirilməsi sahəsində dövlətimizin indiki siyasətini yüksək qiymətləndirirlər.
AFFA rəhbəri Azərbaycandakı mövcud vəziyyəti yaxşı bilən Rusiya Futbol İttifaqının prezidenti Vyaçeslav Koloskovla görüşünü xüsusi vurğulamışdır. Görüşdə belə bir razılıq əldə edilmişdir ki, AFFA ilə Rusiya Futbol İttifaqı arasında əməkdaşlıq möhkəmləndiriləcək və inkişaf etdiriləcəkdir.
R.Mirzəyev bildirmişdir ki, FİFA, UEFA və Rusiya Futbol İttifaqının rəhbərləri Bakıya dəvət olunmuş və onlar bu dəvəti məmnuniyyətlə qəbul etmişlər.
Bölmənin digər xəbərləri
